وزیرِاعظم پاکستان محمد شہباز شریف جمعرات سے عید الاضحیٰ کے موقع پر مملکتِ سعودی عرب کا دو روزہ سرکاری دورہ کریں گے اور حالیہ پاکستان انڈیا کشیدگی میں کمی کے لیے سعودی قیادت کے تعمیری کردار پر اُن کا شکریہ ادا کریں گے۔
پاکستانی دفتر خارجہ کے مطابق اس دورے کے دوران وزیرِاعظم پاکستان، ولی عہد اور وزیرِاعظم مملکتِ سعودی عرب، شہزادہ محمد بن سلمان سے ملاقات کریں گے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
وزیر اعظم کے ہمراہ اعلیٰ سطحی وفد بھی ہو گا۔
ملاقات میں تجارت و سرمایہ کاری، مسلم اُمہ کی فلاح و بہبود، اور علاقائی امن و سلامتی سمیت اہم شعبوں میں دوطرفہ تعاون کو مزید مضبوط بنانے پر بات چیت ہوگی۔
دفتر خارجہ کے مطابق یہ دورہ پاکستان اور سعودی عرب کے گہرے، آزمودہ اور دیرینہ تعلقات کا مظہر ہے جو باہمی احترام اور سٹریٹیجک شراکت داری پر مبنی ہیں۔
یہ دورہ دونوں ممالک کی قیادت کی اقتصادی اور سفارتی تعلقات کو مزید گہرا کرنے کی عزم کا اعادہ بھی ہے، جو سعودی وژن 2030 اور پاکستان کی ترقیاتی ترجیحات سے ہم آہنگ ہے۔
وزیرِاعظم شہباز شریف کا یہ دورہ پاکستان اور سعودی عرب کے تعلقات کو مزید مستحکم کرنے اور کثیر جہتی تعاون کے نئے امکانات کھولنے کا باعث بنے گا۔
