وفاقی وزیر خزانہ محمد اورنگزیب نے پیر کو واشنگٹن میں ورلڈ بینک گروپ کی مینیجنگ ڈائریکٹر (آپریشنز) انا بیردے سے ملاقات میں پاکستان کی معاشی صورتحال، خاص طور پر مشرق وسطیٰ میں جاری تنازع کے اثرات سے نمٹنے کے اقدامات پر غور کیا گیا۔
پاکستان کے وزیر خزانہ محمد اورنگزیب واشنگٹن میں ہیں جہاں وہ پیر کو عالمی مالیاتی فنڈ ’آئی ایم ایف‘ اور ورلڈ بینک کے سالانہ سپرنگ اجلاسوں میں ملک کی نمائندگی کر رہے ہیں۔
آئی ایم ایف اور ورلڈ بینک کے یہ اجلاس 13 اپریل سے 18 اپریل تک واشنگٹن میں منعقد ہوں گے، جن میں مرکزی بینکرز، وزرائے خزانہ اور نجی شعبے کے رہنما عالمی معیشت اور مالی استحکام پر تبادلہ خیال کریں گے۔
ان اجلاسوں میں سیمینار، بریفنگ اور مکمل اجلاس شامل ہوں گے، جن میں بین الاقوامی مالیاتی و مالیاتی کمیٹی (آئی ایم ایف سی) کا اجلاس بھی شامل ہے۔
Finance Minister Senator Muhammad Aurangzeb arrives in Washington for World Bank-IMF Spring Meetings 2026. Following engagements at Harvard, the Minister will hold key meetings with global financial leaders to advance Pakistan’s reform agenda and economic priorities. pic.twitter.com/fBST3rOh3t
— Ministry of Finance, Government of Pakistan (@Financegovpk) April 13, 2026
وزارت خزانہ کی جانب سے جاری بیان کے مطابق پیر کو ہونے والی ملاقات میں محمد اورنگزیب پاکستان میں معاشی اصلاحات اور ترقیاتی ایجنڈے کے لیے ورلڈ بینک گروپ کی مسلسل حمایت کو سراہا۔
بیان میں بتایا گیا کہ دونوں فریقین نے اس بات پر اتفاق کیا کہ بیرونی دباؤ کے اثرات سے عوام کے کمزور طبقات کو بچانے کے لیے سماجی تحفظ کے اقدامات کو مزید مضبوط بنانے کی ضرورت ہے۔
ملاقات میں کنٹری پارٹنرشپ فریم ورک (سی پی ایف) کے تحت پیش رفت کا بھی جائزہ لیا گیا۔
بیان کے مطابق اس دوران مختلف شعبوں میں ہونے والی پیش رفت پر تسلی کا اظہار اور طے شدہ اہداف کے حصول کے لیے مزید مسلسل کوششوں کی ضرورت پر زور دیا گیا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
وزیر خزانہ نے پاکستان کے آبادی سے متعلق چیلنجز سے مؤثر طور پر نمٹنے کے لیے وفاق اور صوبوں کے درمیان بہتر ہم آہنگی کی اہمیت پر روشنی ڈالی اور اس ضمن میں انہوں نے ورلڈ بینک سے ایک جامع ماسٹر پلان تیار کرنے میں تعاون کی درخواست کی۔
اس سے قبل محمد اورنگزیب نے اتوار کو ہاورڑ یونیورسٹی میں منعقدہ پاکستان کانفرنس میں بھی شرکت کی، جہاں انہوں نے پاکستان کی معاشی صورت حال پر ایک پینل مباحثے میں حصہ لیا۔
وزارت خزانہ کے مطابق، محمد اورنگزیب نے اس اعتماد کا اظہار کیا کہ پاکستان اپنے بیرونی قرضوں کی ادائیگی بروقت مکمل کرے گا۔
انہوں نے اس بات پر زور دیا کہ پائیدار معاشی ترقی کے لیے برآمدات پر مبنی ترقی اور تجارت کے فروغ پر توجہ دینا ضروری ہے۔
وزارت خزانہ نے مزید کہ ’انہوں نے نشاندہی کی کہ مشکل مگر ضروری فیصلوں میں تاخیر نے ماضی میں ترقی کو نقصان پہنچایا، جس کے باعث معیشت بار بار بحران کا شکار ہوئی اور آئی ایم ایف پروگرامز پر انحصار بڑھتا گیا۔‘
پاکستان اور عالمی مالیاتی فنڈ (آئی ایم ایف) کے درمیان جولائی 2024 میں سات ارب ڈالر کے قرض کے نئے پروگرام پر سٹاف لیول معاہدہ طے پایا تھا اور موجودہ حکومت ٹیکس محصولات میں اضافے کے لیے بھی کوشاں ہے تاکہ ملک کی معشیت کو اپنے پاؤں پر کھڑا کیا جا سکے۔
