پاکستان انڈیا سیز فائر: انڈین شہریوں کی وزیراعظم مودی پر تنقید

پاکستان اور انڈیا کے درمیان کئی روز تک جاری رہنے والی کشیدگی اور جھڑپوں کے بعد دونوں ممالک نے امریکی ثالثی کے نتیجے میں ہفتے کو سیز فائر کا اعلان کر دیا ہے۔

اس اعلان کے بعد کئی انڈین شہریوں کی جانب سے وزیراعظم نریندر مودی اور ان کی حکومت کے اقدامات پر سخت تنقید کی جا رہی ہے۔

زارا پروال نامی ایک صارف نے ایکس پر لکھا: ’تو اب امریکی صدر ہم انڈینز کو ٹویٹ کے ذریعے بتائیں گے کہ ہماری حکومت نے کیا فیصلہ کیا ہے۔ یہ ہماری حکومت اور میڈیا کا مذاق ہے۔‘

انکت میانک نامی صارف نے لکھا کہ ’نریندر مودی نے پہلگام میں مرنے والوں کو دھوکا دیا ہے۔ یہ ایک کمزور وزیراعظم ہیں۔‘

ریشما عالم نامی صارف نے سابق انڈین وزیراعظم اندرا گاندھی اور نریندر مودی کی تصاویر پوسٹ کرتے ہوئے لکھا ’وہ ایک آئرن لیڈی تھیں، لیکن یہ ایک سائرن مین ہیں۔‘

تیجسوی پرکاش نامی صارف نے لکھا کہ ’سی این این کے رپورٹر کہتے ہیں کہ یہ انڈیا تھا جس نے پاکستانی میزائل حملوں کے بعد امریکہ سے رابطہ کیا، یہ حملے انڈیا کی توقع کے خلاف تھے۔ یہ احمقانہ پن بند کریں اور اپنی شکست تسلیم کریں۔ یہ دنیا آپ کے حامیوں کی طرح اندھی نہیں ہے مودی جی۔‘

تنقید کے ساتھ ساتھ کچھ لوگ جنگ کے خلاف اور امن کے حق میں بھی بات کر رہے ہیں۔

’ہاؤ ہیومینزسویڈ فٹ بال‘ کے ایکس ہینڈل سے کی گئی ٹویٹ میں کہا گیا: ’ٹرمپ نے انڈیا پاکستان کا سیز فائر کروا دیا۔ ہماری زمین اس کائنات میں ایک چھوٹا سا ذرہ ہے۔ جنگ نہیں ہونی چاہیے۔ ہمارے پاس رہنے کی کوئی اور جگہ نہیں اور ایک انسان کی اوسط عمر صرف 72 سال ہے۔ انسانوں کو امن سے رہنا چاہیے۔‘

راہل نے لکھا: ’آخر کار سیزفائر ہو گیا۔ کون جیتا؟ کوئی بھی نہیں۔ کون ہارا۔ انسانی جانیں۔ کیا انصاف مل گیا؟‘

ایک طرف جہاں انڈین شہری سیز فائر پر تنقید کر رہے ہیں، وہیں پاکستان میں اس فیصلے کو سراہا جا رہا ہے۔