سعودی عرب کی کابینہ نے ریاض میں ایک اجلاس میں غزہ میں فوری طور پر جنگ روکنے کی اپیل کی ہے۔

سعودی ولی عہد اور وزیر اعظم شہزادہ محمد بن سلمان کی صدارت میں اجلاس میں سعودی عرب اور اٹلی کے وزرائے خارجہ کے مشترکہ بیان کی اہمیت پر زور دیتے ہوئے مشرق وسطیٰ میں منصفانہ، محفوظ اور جامع امن کے قیام کے عزم کو دہرایا۔

کابینہ نے ان اقدامات کی مذمت کی جو دو ریاستی حل کو نقصان پہنچاتے ہیں۔

کابینہ نے خطے اور دنیا کے حالات کا جائزہ لیا، بالخصوص مقبوضہ فلسطینی علاقوں کی صورت حال پر غور کیا گیا۔ اجلاس میں اس امر پر روشنی ڈالی گئی کہ سعودی عرب عالمی برادری کے ساتھ مسلسل رابطے میں ہے تاکہ غزہ میں انسانی المیے کو ختم کیا جا سکے اور بین الاقوامی اداروں کے تعاون سے امدادی سامان اور انسانی ہمدردی کی امداد کو وہاں تک پہنچایا جا سکے۔

ولی عہد شہزادہ محمد بن سلمان نے کابینہ کو روسی صدر ولادی میر پوتن کا پیغام اور فلسطینی اتھارٹی کے نائب صدر حسین الشیخ کے ساتھ اپنی ملاقات کی تفصیلات سے بھی آگاہ کیا۔

فلسطین کے نائب صدر حسین الشیخ نے سوشل میڈیا پلیٹ فارم ایکس پر ایک پیغام میں سعودی عرب اور فرانس کے اس کردار کا خیرمقدم کیا جو یہ دونوں ممالک بین الاقوامی حمایت کو منظم کرنے اور فلسطینی ریاست کے اعتراف کے لیے انجام دے رہے ہیں۔

انہوں نے کہا کہ فلسطینی وفد کو ویزے نہ دینا ناقابلِ قبول ہے اور یہ اقدام میزبان ملک کے معاہدے کے تحت بین الاقوامی ذمے داریوں کے منافی ہے۔

الشیخ نے مزید کہا کہ فلسطین کی ریاست اپنے اس عزم کا اعادہ کرتی ہے کہ وہ سعودی عرب، فرانس اور تمام بین الاقوامی شراکت داروں کے ساتھ مل کر 22 ستمبر کو نیویارک میں ہونے والی کانفرنس کی کامیابی کو یقینی بنائے گی۔

سرمایہ کاری کانفرنس

کابینہ نے خادم حرمین شریفین شاہ سلمان بن عبدالعزیز کی سرپرستی میں ریاض میں منعقد ہونے والی نویں سرمایہ کاری کانفرنس کو سراہا، جو 27 سے 30 اکتوبر 2025 تک ’ترقی کی کنجی‘ کے عنوان سے ہوگی۔ اس کانفرنس کا مقصد سرمایہ کاری کو ایک پائیدار اور خوشحال مستقبل کے قیام کے لیے بروئے کار لانا ہے۔

اجلاس میں ولی عہد کی سربراہی میں تین سال کے لیے ’ای سپورٹس ورلڈ کپ فاؤنڈیشن‘ کے بورڈ آف ٹرسٹیز کے قیام کی بھی منظوری دی گئی۔

علاقائی اور بین الاقوامی تعاون

کابینہ نے ریڈ سی اور خلیج عدن میں ماہی گیری اور آبی حیات کی افزائش سے متعلق علاقائی تعاون کے پروٹوکول کی منظوری دی۔ اسی کے ساتھ سعودی وزارت صنعت و معدنیات اور برطانیہ و شمالی آئرلینڈ کی وزارت تجارت و صنعت کے درمیان معدنی وسائل کے شعبے میں تعاون کی یادداشت پر بھی اتفاق کیا گیا۔

کابینہ نے سعودی اور بھارتی سپیس ایجنسی کے درمیان پرامن مقاصد کے لیے خلائی سرگرمیوں میں تعاون کی یادداشت کی منظوری دی۔ اجلاس میں بحیرہ احمر کی پائیداری کے لیے اپ ڈیٹ شدہ قومی حکمتِ عملی کے جغرافیائی دائرہ کار کی توثیق بھی کی۔