پاکستان کے وزیرِ اعظم شہباز شریف سے جمعے کو اسلام آباد میں فلسطینی صدر کے مشیر برائے مذہبی امور اور شرعی عدالت کے چیف جسٹس محمود الھباش نے ملاقات کی۔ 

محمود الھباش اسلام آباد میں سیرت کانفرنس میں شرکت کے لیے فلسطینی وفد کی قیادت کر رہے ہیں۔ آج ہونے والی اس ملاقات میں مسجد اقصیٰ کے امام احمد حسین اور پاکستان میں فلسطینی سفیر بھی موجود تھے۔

وزیر اعظم ہاؤس سے جاری بیان کے مطابق ملاقات کے دوران وزیر اعظم نے فلسطین کے صدر ڈاکٹر محمود عباس کے لیے اپنا تہنیتی پیغام دیا۔ 

انہوں نے فلسطین کے لیے پاکستانی عوام کی غیر متزلزل حمایت کا اعادہ کرتے ہوئے یقین دلایا کہ ’پاکستان فلسطین کے برادر عوام کے لیے اپنی مکمل حمایت جاری رکھے گا جنہوں نے بے پناہ قربانیاں دی ہیں اور بہادری سے اسرائیلی جارحیت کا سامنا کرہے ہیں۔‘

وزیر اعظم نے مزید کہا کہ وہ ہر سفارتی فورم پر فلسطینی عوام کے حقوق کے لیے پوری قوت سے آواز بلند کرتے رہیں گے۔ 

بیان میں کہا گیا کہ غزہ کی انسانی صورتحال پر وزیر اعظم نے فلسطینی وفد کو یقین دلایا کہ پاکستان غزہ کے لوگوں کے لیے انسانی امداد کی فراہمی جاری رکھے گا جو اسرائیلی قابض افواج کے ہاتھوں انسانی ساختہ قحط کا شکار ہیں۔

 فلسطینی صدر کے مشیر نے فلسطینی عوام کی جانب سے مسلسل اور غیر متزلزل حمایت پر پاکستانی عوام اور حکومت کا تہہ دل سے شکریہ ادا کیا۔ 

انہوں نے پاکستان اور فلسطین کے عوام کے درمیان دیرینہ اور تاریخی رشتوں کا ذکر کرتے ہوئے کہا کہ پاکستان اس مشکل وقت میں ان کے لیے تقویت کا باعث ہے۔ 

انہوں نے پاکستان میں حالیہ سیلاب پر تعزیت کا بھی اظہار کیا۔

ملاقات کے اختتام پر صدر محمود عباس کی جانب سے ایک خط بھی وزیراعظم کو دیا گیا۔

 نائب وزیراعظم و وزیر خارجہ سینیٹر محمد اسحاق ڈار، وزیر اطلاعات و نشریات عطا اللہ تارڑ، وزیر مذہبی امور سردار محمد یوسف، معاون خصوصی طارق فاطمی، چیئرمین اسلامی کونسل، سیکرٹری خارجہ اور سیکرٹری مذہبی امور نے ملاقات میں وزیراعظم کی معاونت کی۔