’پی ٹی آئی کو تراشنے کا کام شروع‘: گنڈاپور کے استعفے پر تبصرے

علی امین گنڈا پور نے بدھ کو خیبر پختونخوا کے وزیراعلیٰ کے عہدے سے استعفیٰ دے دیا، جس پر زیادہ تر سوشل میڈیا صارفین ملا جلا ردعمل دے رہے ہیں تاہم کچھ پاکستان تحریک انصاف (پی ٹی آئی) کے بانی چیئرمین عمران خان کے نئے وزیراعلیٰ کے انتخاب پر بھی سوال اٹھا رہے ہیں۔

پی ٹی آئی کے سیکریٹری جنرل سلمان اکرم راجہ نے بدھ کو تصدیق کی تھی کہ بانی پی ٹی آئی عمران خان نے وزیر اعلیٰ خیبرپختونخوا علی امین گنڈا پور کو عہدے سے ہٹانے کا فیصلہ کرتے ہوئے ان کی جگہ سہیل آفریدی کو نامزد کیا ہے۔

جس کے بعد علی امین گنڈا پور نے سوشل میڈیا پر اعلان کیا کہ وہ وزیراعلیٰ کے عہدے سے مستعفی ہو رہے ہیں۔

صوبے میں ہونے والی اس تبدیلی کو کچھ صارفین نے سراہا، کچھ نے علی امین گنڈاپور کے وزارت اعلیٰ کا منصب چھوڑنے پر افسوس کا اظہار کیا تو کچھ نے بانی چیئرمین پی ٹی آئی عمران خان کے انتخاب پر سوالات بھی اٹھائے۔

سوشل میڈیا صارف محمد طلحہ نے عمران خان کی وزارت عظمیٰ سے معزولی کے بعد کی گئی تقریر کے ساتھ علی امین گنڈا پور کے استعفے کا حوالہ دیتے ہوئے لکھا: ’میرے خلاف سارش کی گئی ہے۔ مجھے ہٹانے کے لیے ڈیرہ اسماعیل خان سے اڈیالہ جیل سائفر بھیجا گیا۔‘

ایکس صارف حمزہ تنویر کا کہنا تھا: ’عمران خان نے پی ٹی آئی کو تراشنے کا کام شروع کر دیا ہے، جو لیڈر کمپرومائزذ تھام اس کو پی ٹی ائی سے نکال دیا جائے گا۔‘

علی امین گنڈاپور کے استعفے پر جمیل قاضی نامی صارف نے کہا کہ ’عثمان بزدار، علی امین گنڈاپور اور اب نئے وزیراعلیٰ سرحد (موجودہ خیبر پختونخوا) کے لیے سہیل آفریدی صاحب کی نامزدگی عمران خان کی لیڈرشپ پر بھی سوالیہ نشان ہیں۔‘

اسی طرح حبیب الحسن نامی صارف نے علی امین گنڈاپور کی وزارت اعلیٰ سے سبکدوشی پر اظہار افسوس کرتے ہوئے کہا: ’علی امین گنڈاپور کو وزارت اعلیٰ سے ہٹانے کا افسوس ہوا۔ عمران خان ہمیشہ اپنی پارٹی کا نقصان کرتے ہیں۔‘