یو اے ای میں لوگ بندرگاہوں، امریکی فوجی پناہ گاہوں سے دور رہیں: پاسداران انقلاب کی تنبیہ

ایران کے خلاف امریکہ اور اسرائیل کی مشترکہ جنگ 15ویں روز بھی جاری ہے۔ امریکہ نے اسے ’آپریشن ایپک فیوری‘ جبکہ ایران نے جوابی کارروائی کو ’وعدہ صادق 4‘ کا نام دیا ہے۔ تازہ ترین اپ ڈیٹس

14ویں دن کے احوال کے لیے یہاں کلک کریں

شام 4 بج کر 45 منٹ: خارگ جزیرے پر 90 سے زائد ایرانی فوجی اہداف کو نشانہ بنایا: سینٹ کام

امریکی سینٹرل کمانڈ (سینٹ کام) نے ہفتے کو کہا ہے کہ امریکی افواج نے گذشتہ رات ایران کے خارگ جزیرے پر 90 سے زائد فوجی اہداف کو نشانہ بنایا ہے۔

سینٹ کام نے ایکس پر جاری بیان میں کہا کہ گذشتہ رات کیے گئے بڑے پیمانے کے اس درست نشانہ بنانے والے حملے میں بحری بارودی سرنگوں کے ذخائر، میزائل ذخیرہ کرنے والے بنکرز اور دیگر فوجی تنصیبات کو تباہ کر دیا گیا۔

بیان میں کہا گیا ہے کہ کارروائی کے دوران خارگ جزیرے پر موجود ایران کے فوجی اہداف کو نشانہ بنایا گیا جبکہ تیل کے بنیادی ڈھانچے کو محفوظ رکھا گیا۔

دوپہر دو بج کر 55 منٹ: ایران کی یو اے ای میں امریکی تنصیبات کو نشانہ بنانے کی دھمکی

ایرانی سرکاری میڈیا کے مطابق پاسداران انقلاب نے ہفتے کو خبردار کیا ہے کہ متحدہ عرب امارات میں امریکہ سے منسلک تنصیبات — جن میں بندرگاہیں، ڈاکس اور فوجی مقامات شامل ہیں — اب ’جائز اہداف‘ بن سکتے ہیں، اگر ایران کے خلاف حملے جاری رہے۔

خبر رساں ادارے روئٹرز کے مطابق پاسداران انقلاب کے بیان میں متحدہ عرب امارات میں رہنے والے لوگوں سے اپیل کی گئی ہے کہ وہ بندرگاہوں، ڈاکس اور امریکی فوجی پناہ گاہوں سے دور رہیں تاکہ ممکنہ حملوں کی صورت میں شہری اموات سے بچا جا سکے۔

دوپہر ایک بج کر 45 منٹ: ’امریکی حملوں میں کسی بھی تیل کے انفراسٹرکچر کو نقصان نہیں پہنچا‘

ایرانی میڈیا نے ہفتے کو رپورٹ کیا کہ خلیج میں ایران کے تیل کی برآمدات کے مرکز جزیرہ خارگ پر امریکی حملوں میں کسی بھی تیل کے انفراسٹرکچر کو نقصان نہیں پہنچا۔

خبر رساں ایجنسی فارس نیوز نے جزیرے پر موجود ذرائع کے حوالے سے بتایا کہ امریکی حملوں میں تیل کی تنصیبات کو کوئی نقصان نہیں ہوا۔

دوسری جانب ایران نے بھی امریکہ سے منسلک تیل کے انفراسٹرکچر کو نشانہ بنانے کی دھمکی دی ہے۔

فارس نیوز کے مطابق امریکی کارروائی میں ’فوج کے دفاعی نظام، جوشن بحری اڈے، ہوائی اڈے کے کنٹرول ٹاور اور کانٹیننٹل شیلف آئل کمپنی کے ہیلی کاپٹر ہینگر کو نقصان پہنچانے کی کوشش کی گئی۔‘

دن 11 بج کر 40 منٹ: ایران پڑوسی ممالک کو نشانہ نہ بنائے: حماس

حماس نے ہفتے کو ایران سے کہا ہے کہ وہ پڑوسی ممالک کو نشانہ بنانے سے گریز کرے، جبکہ ساتھ ہی یہ بھی کہا کہ اسرائیل اور امریکہ کے خلاف تہران اپنے دفاع کا حق رکھتا ہے۔

خبر رساں ادارے اے ایف پی کے مطابق حماس نے بیان میں کہا ہے کہ ’ایران کے اس حق کی توثیق کرتے ہوئے کہ وہ بین الاقوامی اصولوں اور قوانین کے مطابق اس جارحیت کا ہر ممکن ذریعے سے جواب دے، تحریک ایران میں اپنے بھائیوں سے اپیل کرتی ہے کہ وہ پڑوسی ممالک کو نشانہ بنانے سے گریز کریں۔‘

دن 11 بجے: دوحہ کے بعض علاقے خالی کروا رہے ہیں: قطری وزارت داخلہ

قطر کی وزارت داخلہ نے اعلان کیا ہے کہ عوامی سلامتی کے پیش نظر اور خطرہ ختم ہونے تک متعلقہ ادارے عارضی احتیاطی اقدام کے طور پر دوحہ کے چند مخصوص علاقوں کو خالی کرا رہے ہیں۔

وزارت نے اپنی ایکس پوسٹ میں لوگوں سے اپیل کی ہے کہ وہ معلومات کے لیے سرکاری ذرائع پر اعماد کریں اور دی گئی ہدایات پر عمل کریں۔

وزارت داخلہ نے واضح کیا کہ پہلے سے اعلان کردہ عارضی احتیاطی انخلا کے اقدامات صرف ان مخصوص علاقوں کے رہائشیوں کے لیے ہیں جنہیں قومی الرٹ سسٹم کے ذریعے اطلاع موصول ہوئی۔ متاثرہ افراد کے لیے محفوظ متبادل رہائش کا انتظام کر دیا گیا ہے۔

بعض لوگوں نے خطرہ ٹلنے تک اپنی مرضی سے محفوظ مقامات پر منتقل ہونے کا فیصلہ کیا ہے۔

صبح 10 بجے: ایران اسرائیل جنگ میں جزیرہ خارگ اہم کیوں؟

صبح نو بج کر 30 منٹ: امریکہ کا ایران کے جزیرہ خارگ پر حملہ

صدر ڈونلڈ ٹرمپ نے ہفتے کو کہا کہ امریکی افواج نے ایران کے اہم ترین مقام جزیرہ خارگ پر حملہ کر کے فوجی ہدف کو ’مکمل طور پر تباہ‘ کر دیا ہے۔

ڈونلڈ ٹرمپ نے ٹروتھ سوشل پر اپنے بیان میں کہا کہ ’کچھ لمحے پہلے، میری ہدایت پر امریکی سینٹرل کمانڈ نے مشرقِ وسطیٰ کی تاریخ کی سب سے طاقتور بمباری کی اور ایران کے قیمتی ترین مقام جزیرہ خارگ پر موجود ہر فوجی ہدف کو مکمل طور پر تباہ کر دیا۔‘

انہوں نے کہا کہ ’ہمارے ہتھیار دنیا میں اب تک بنائے گئے سب سے زیادہ طاقتور اور جدید ہیں، لیکن میں نے جزیرے پر موجود تیل کے انفراسٹرکچر کو تباہ نہ کرنے کا فیصلہ کیا ہے۔

’لیکن اگر ایران، یا کوئی اور آبنائے ہرمز کے ذریعے جہازوں کی آزاد اور محفوظ آمد و رفت میں کسی قسم کی مداخلت کرتا ہے تو میں فوری طور پر اس فیصلے پر دوبارہ غور کروں گا۔‘

صبح نو بج کر 12 منٹ: نئے سپریم لیڈر مجتبیٰ خامنہ ای زخمی ہیں: امریکہ

امریکی وزیر دفاع پیٹ ہیگسیتھ نے جمعے کو کہا کہ ایران کے نئے سپریم لیڈر مجتبیٰ خامنہ ای زخمی ہیں اور ممکنہ طور پر ان کے چہرے کو نقصان پہنچا ہے۔

برطانوی خبر رساں ادارے روئٹرز کے مطابق امریکی وزیر دفاع نے نے ایران پر تقریباً دو ہفتوں کے امریکی اور اسرائیلی حملوں کے بعد خامنہ ای کی حکمرانی کی صلاحیت پر سوال اٹھایا۔

ہیگسیتھ نے ایک بریفنگ میں بتایا کہ ’ہمیں معلوم ہے کہ نام نہاد نئے لیڈر جو اتنے سپریم بھی نہیں زخمی ہیں اور ممکنہ طور پر ان کا چہرہ خراب ہو چکا ہے۔ انہوں نے کل ایک بیان جاری کیا۔ درحقیقت ایک کمزور بیان، لیکن اس میں کوئی آواز تھی اور نہ ہی کوئی ویڈیو۔ یہ ایک تحریری بیان تھا۔

'ایران کے پاس بہت سے کیمرے اور بہت سے وائس ریکارڈر موجود ہیں۔ تحریری بیان کیوں؟ میرا خیال ہے کہ آپ جانتے ہیں کیوں۔ ان کے والد جان سے جا چکے ہیں۔ وہ خوفزدہ ہیں۔ زخمی ہیں۔ چھپ رہے ہیں اور ان کی کوئی قانونی حیثیت نہیں۔‘

دوسری جانب ایران نے کہا ہے کہ نئے سپریم لیڈر زخمی ہوئے ہیں۔ ایک ایرانی اہلکار نے بدھ کو بتایا کہ ان کے زخم معمولی نوعیت کے ہیں۔ جمعے کو، جاپان میں ایران کے سفیر پیمان سعادت نے کہا کہ مجتبیٰ خامنہ ای ’معذور‘ نہیں ہوئے۔

صبح 8 بج کر 55 منٹ: امریکہ کا ایرانی رہنماؤں کی معلومات فراہم کرنے پر ایک کروڑ ڈالر انعام کا اعلان

امریکہ نے ایران کے نئے سپریم لیڈر آیت اللہ مجتبیٰ خامنہ ای سمیت سینیئر فوجی اور انٹیلی جنس اہلکاروں کے بارے میں معلومات فراہم کرنے پر ایک کروڑ ڈالر انعام کی پیشکش کی ہے۔ 

امریکہ دفتر خارجہ کی ویب سائٹ کے مطابق اس انعام کا اعلان ایران کے پاسداران انقلاب (آئی آر جی سی) سے وابستہ 10 اہلکاروں کے لیے کیا گیا ہے۔

سپریم لیڈر کے علاوہ امریکہ ایران کے سکیورٹی چیف علی لاریجانی، انٹیلی جنس وزیر اسماعیل خطیب، وزیر داخلہ وزیر سکندر مومنی اور خامنہ ای کے دفتر کے دو اہلکاروں کے بارے میں بھی معلومات چاہتا ہے۔

روئٹرز نے ایرانی میڈیا کے حوالے سے رپورٹ کیا ہے کہ ایرانی مسلح افواج نے ہفتے کہا کہ ایران کے تیل اور توانائی کے ڈھانچے پر کسی بھی حملے کے جواب میں خطے میں امریکہ کے ساتھ تعاون کرنے والی تیل کمپنیوں کی ملکیت توانائی کے ڈھانچے کو نشانہ بنایا جائے گا۔

یہ انتباہ اس کے بعد سامنے آیا جب صدر ڈونلڈ ٹرمپ نے کہا کہ امریکہ نے ایران کے اہم تیل مرکز خارگ جزیرے پر فوجی اہداف تباہ کر دیے۔ یہ جزیرہ ایران کی 90 فیصد تیل برآمدات کے لیے برآمدی ٹرمینل کے طور پر کام کرتا ہے۔