سعودی وزارت خارجہ کے سوشل میڈیا پر جاری بیان میں کہا گیا کہ مملکت ’امریکہ اور اسلامی جمہوریہ ایران کے درمیان فوجی کارروائیوں کے خاتمے اور 60 دن کے اندر تفصیلی مذاکرات شروع کرنے کے معاہدے‘ کا خیرمقدم کرتی ہے تاکہ ایک مستقل معاہدے تک پہنچا جا سکے۔

بیان میں کہا گیا کہ ایک پائیدار امن معاہدہ وہ ہو گا ’جو علاقائی ریاستوں کے سکیورٹی مفادات کو مدنظر رکھے اور ایک دوسرے کے داخلی معاملات میں عدم مداخلت کے اصول پر قائم رہے۔‘

اقوام متحدہ کے سیکریٹری جنرل انتونیو گوتریش نے کہا: میں امریکہ اور ایران کو اس امن معاہدے پر دلی مبارکباد پیش کرتا ہوں، جس میں فوری اور مستقل جنگ بندی، آبنائے ہرمز کے دوبارہ کھلنے اور مزید مذاکرات کے لیے ایک فریم ورک شامل ہے۔ یہ اقدام اس تنازعے کے پرامن حل کی طرف ایک انتہائی اہم قدم ہے۔

انہوں نے مزید کہا کہ ’پاکستان، قطر، مصر، سعودی عرب، ترکی اور دیگر علاقائی ممالک کا بھی تہہ دل سے شکریہ ادا کیا جاتا ہے جنہوں نے مذاکرات میں تعمیری کردار ادا کیا اور اس امن معاہدے تک پہنچنے میں مدد فراہم کی۔‘

چین نے پیر کے روز امریکہ اور ایران کے درمیان مشرقِ وسطیٰ کی جنگ ختم کرنے کے معاہدے کا خیرمقدم کیا اور پاکستان کی ثالثی کی کوششوں کو سراہا۔

چینی وزارت خارجہ کے ترجمان لِن جیان نے کہا کہ چین اس معاہدے کا خیرمقدم کرتا ہے اور پاکستان کی ثالثی کی کوششوں کی تعریف کرتا ہے۔ انہوں نے امید ظاہر کی کہ معاہدہ طے شدہ وقت کے مطابق دستخط ہو جائے گا۔

برطانیہ کے وزیراعظم کیئر سٹارمر نے کہا: ’میں صدر ٹرمپ، پاکستان اور قطر کے ثالثوں، اور اس عمل میں شامل تمام افراد کو مبارکباد پیش کرتا ہوں۔‘

وزیراعظم سٹارمر نے مزید کہا: ’یہ ایک انتہائی اہم لمحہ ہے۔ ہم طویل عرصے سے کشیدگی میں کمی کے لیے مطالبہ کرتے رہے ہیں اور یہ ضروری ہے کہ تمام فریق اس موقع سے فائدہ اٹھائیں تاکہ خطے میں استحکام قائم ہو اور آبنائے ہرمز میں بحری آمدورفت کی آزادی بحال ہو سکے۔‘

آسٹریلوی وزیراعظم انتھنی البانیز نے بھی اس مفاہمی یاداشت کا خیر مقدم کیا ہے۔

کینیڈا کے وزیراعظم مارک کارنی نے کہا: ’کینیڈا امریکہ اور ایران کے درمیان نئے معاہدے کا خیرمقدم کرتا ہے۔ ہم پاکستان، قطر اور دیگر علاقائی شراکت داروں کا شکریہ ادا کرتے ہیں جنہوں نے مذاکرات میں انتہائی اہم کردار ادا کیا۔

انہوں نے کہا کہ کینیڈا واضح طور پر سمجھتا ہے کہ ایک پائیدار جنگ بندی کے لیے ضروری ہے کہ آبنائے ہرمز سے محفوظ اور بلا رکاوٹ آمدورفت یقینی بنائی جائے، اور ساتھ ہی ایران کے جوہری پروگرام سے پیدا ہونے والے مستقل خطرے کو بھی حل کیا جائے۔

اٹلی کی وزیر اعظم جارجیا میلونی نے کہا: ’گذشتہ رات ہی ہم نے فرانس، جرمنی اور برطانیہ کے ساتھ مل کر امریکہ اور ایران کے درمیان حالیہ گھنٹوں میں دستخط کیے گئے مفاہمتی یادداشت پر اپنی بھرپور تعریف اور حمایت کا اظہار کیا ہے۔

انہوں نے کہا کہ تمام ثالثوں کا دل کی گہرائیوں سے شکریہ ادا کیا جاتا ہے، خاص طور پر قطر اور پاکستان کا جنہوں نے اس معاہدے کو ممکن بنانے میں اہم کردار ادا کیا۔

فن لینڈ کے صدر الیگزینڈر سٹب نے کہا: ’میں امریکہ اور ایران کے درمیان معاہدے کے اعلان کا خیرمقدم کرتا ہوں۔ میں پاکستان، قطر اور اس میں شامل دیگر ثالثوں کو مبارک باد پیش کرتا ہوں۔

یورپی یونین، فرانس، قطر، بیلجیم، آسٹریا، نیدرلینڈز، مصر اور دیگر ممالک کے سربراہان اور وزرائے خارجہ نے بھی امن معاہدے کا خیرمقدم کرتے ہوئے پاکستان کی کوششوں کی تعریف کی۔

انڈیا کے وزیر اعظم نریندر مودی نے بھی ایران اور امریکہ کے درمیان امن معاہدے کا خیر مقدم کیا تاہم انہوں نے ایکس پر جاری اپنے بیان میں پاکستان کی کاوشوں کا ذکر نہیں کیا۔

امریکہ اور ایران نے اعلان کیا ہے کہ وہ مشرق وسطیٰ میں جاری جنگ کو لبنان سمیت تمام محاذوں پر ختم کرنے اور اہم آبنائے ہرمز کو دوبارہ کھولنے کے لیے ایک معاہدے پر پہنچ گئے ہیں۔

تاہم تہران کے جوہری پروگرام جیسے پیچیدہ مسئلے پر انہوں نے بہت کم تفصیلات فراہم کی ہیں۔

واشنگٹن اور اسلام آباد نے کہا ہے کہ معاہدے پر جمعے کو سوئٹزرلینڈ میں دستخط کیے جائیں گے۔