صوبہ خیبر پختونخوا کے ضلع ڈیرہ اسماعیل خان میں ہفتے کو پولیس چیک پوسٹ پر ہوئے خودکش حملے میں پولیس اور محکمہ ایکسائز کے اہلکاروں سمیت 12 افراد جان سے گئے جبکہ 32 زخمی ہوئے۔
ریسکیو 1122 کے ترجمان بلال فیضی نے بتایا کہ درازندہ کے علاقے امن میلہ کے قریب دھماکہ خیز مواد سے لدی گاڑی کو چیک پوسٹ سے ٹکرایا گیا۔
مقامی پولیس سربراہ صفدر بلوچ نے کہا کہ جان سے جانے والوں اور زخمیوں میں زیادہ تر سکیورٹی اہلکار اور راہ گیر شامل ہیں۔
ڈیرہ اسماعیل خان پولیس کے ترجمان ذوالقرنین یعقوب نے بتایا کہ مرنے والوں میں 10 پولیس اور ایکسائز اہلکار شامل ہیں، جو چیک پوسٹ پر ڈیوٹی انجام دے رہے تھے۔
انڈپینڈنٹ اردو کا واٹس ایپ گروپ یہاں جوائن کریں
دھماکے سے وسیع و عریض چیک پوسٹ تباہ ہو گئی جبکہ عینی شاہدین نے بتایا کہ حملے کے بعد فائرنگ کی آوازیں بھی سنی گئیں۔
فیضی نے کہا کہ امدادی کارکن متاثرین کو قریبی ہسپتال منتقل کر رہے تھے کہ مسلح افراد نے ایک ایمبولینس پر فائرنگ کی، جس کے نتیجے میں ایک ریسکیو اہلکار جان سے گیا اور دو دیگر زخمی ہو گئے۔
انہوں نے بتایا کہ حملے میں مرنے والوں میں دو خواتین اور ایک بچہ بھی شامل ہیں۔
امریکی خبر رساں ایجنسی ایسوسی ایٹڈ پریس کے مطابق کالعدم تحریک طالبان پاکستان (ٹی ٹی پی) نے ایک بیان میں حملے کی ذمہ داری قبول کی ہے۔
ریسکیو حکام کے مطابق امدادی کارروائی میں چھ ایمبولینسیں، ایک فائر وہیکل اور 25 سے زیادہ اہلکار شریک ہوئے۔
ڈی آئی خان میں سکیورٹی صورت حال
ڈیرہ اسماعیل خان کو گذشتہ برسوں میں حملوں کا سامنا رہا ہے جبکہ درازندہ اور اس کے اطراف میں پولیس چوکیوں اور سکیورٹی اہلکاروں کو خاص طور پر ہدف بنایا گیا ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اسی وجہ سے علاقے میں قائم چیک پوسٹیں آمدورفت کی نگرانی اور سکیورٹی کے لیے اہم سمجھی جاتی ہیں۔
جولائی 2026 میں ٹانک کے منجی خیل چیک پوسٹ پر حملے کے بعد گورنر خیبر پختونخوا فیصل کریم کنڈی نے صوبے میں انٹیلی جنس بنیادوں پر کارروائیاں تیز کرنے اور سکیورٹی اداروں کے درمیان رابطہ بہتر بنانے پر زور دیا تھا۔
صدر آصف علی زرداری اور وزیراعظم شہباز شریف نے حملے کی شدید مذمت کی ہے۔
صدر زرداری نے متعلقہ اداروں کو ہدایت کی کہ زخمیوں کو علاج کی بہترین ممکنہ سہولیات فراہم کی جائیں اور امدادی کارروائیوں کو مزید مؤثر بنایا جائے۔
انہوں نے کہا کہ غیر ملکی سرپرستی میں ایسے گھناؤنے اور سفاکانہ کارروائیوں میں ملوث ’فتنہ الہندوستان‘ اور ’فتنہ الخوارج‘ کے دہشت گردوں کے خلاف کارروائیوں کو مزید مؤثر بنایا جائے۔
وزیراعظم شہباز شریف نے اپنے بیان میں کہا کہ دہشت گردی کے خلاف جنگ میں ملک کے محافظوں کی قربانیاں کبھی رائیگاں نہیں جائیں گی۔
انہوں نے اس عزم کا اعادہ کیا کہ حکومت ملک سے دہشت گردی کے مکمل خاتمے کے لیے پوری طرح پُرعزم ہے۔
