آئی فون 15 فروخت کے لیے پیش کیا جا چکا ہے اگرچہ اسے حاصل کرنے کے لیے صارفین کو مشکلات کا سامنا کرنا پڑ سکتا ہے۔

آئی فون کے چار نئے ورژن اور اپ ڈیٹ شدہ ایپل گھڑیوں کی رونمائی گذشتہ ہفتے کیلیفورنیا میں ایک تقریب کے دوران کی گئی اور جمعہ 15 ستمبر کو پری آرڈرز لینا شروع کر دیے گئے تھے۔

جن صارفین نے پری آرڈرز دیے تھے انہیں ایک ہفتے بعد فون مل گئے ہیں اور آئی فونز اب سٹورز میں بھی دستیاب ہیں۔

حالیہ برسوں میں، ایپل نے ان قطاروں کی حوصلہ شکنی کی ہے جو نیا آئی فون لانچ کرنے کے موقعے پر ہوتی تھیں اور اس کی بجائے لوگوں کو آن لائن پری آرڈر کرنے کی ترغیب دیتا ہے۔

اس کے باوجود نئی لانچ کے موقعے پر ایپل سٹورز پر(لوگوں کی) قطاریں نظر آئیں۔

تاہم، فونز کے کچھ ورژن ڈیلیور ہونے میں پہلے ہی طویل انتظار دیکھا جا رہا ہے۔ آئی فون 15 پرو میکس کے زیادہ تر ماڈلز اکتوبر کے آخر تک ڈیلیئور ہونے کی توقع نہیں- اور کچھ اس سے بھی زیادہ تاخیر کا شکار ہیں۔

متعدد افواہوں میں کہا گیا تھا کہ ایپل اس سال کے ماڈلز کی قیمت میں اضافہ کرے گا۔ لیکن حقیقت میں لاگت وہی رہی – اور برطانیہ میں ایک حیرت انگیز اقدام میں اسے کم کر دیا گیا۔

آئی فون 15 چار مختلف آپشنز میں آتا ہے: بیسک آئی فون 15، ایک پلس ماڈل اور آئی فون 15 پرو اور پرو میکس۔

آئی فون 15 میں گذشتہ سال پرو فونز میں آنے والی بہت سی اپ گریڈز ہیں۔

ایک اپ ڈیٹڈ چپ، بہتر کیمرے اور سکرین کے اوپری حصے میں ’ڈائنامک آئی لینڈ‘ - جبکہ اس سال کے پرو ماڈلز میں ایک نیا ٹائٹینیم ڈیزائن، کیمرے کی بہتری اور بہت تیز پروسیسر شامل ہے۔

کمپنی نے ایپل واچ کا ایک نیا ورژن، سیریز 9 بھی جاری کیا ہے، جس میں ایک بہتر ڈسپلے اور ’ڈبل ٹیپ‘ کی خصوصیت ہے جس سے لوگ صرف اپنے ہاتھوں کا استعمال کرکے ڈیوائس کنٹرول کر سکتے ہیں۔ اس خصوصیت کے لیے ایپل واچ الٹرا کو بھی اپ ڈیٹ کیا گیا ہے۔