پاکستان کرکٹ بورڈ (پی سی بی) نے اتوار کو سہ ملکی ٹی ٹوئنٹی سیریز اور ایشیا کپ کے لیے پاکستان کے 17 رکنی سکواڈ کا اعلان کر دیا۔
اتوار کو لاہور میں مشترکہ پریس کانفرنس میں چیف سلیکٹر اور ڈائریکٹر ہائی پرفارمنس عاقب جاوید اور ہیڈ کوچ مائیک ہیسن نے بتایا کہ سلمان علی آغا کو 17 رکنی سکواڈ کا کپتان برقرار رکھا گیا ہے جبکہ دیگر کھلاڑیوں میں فخر زمان، شاہین شاہ آفریدی، حارث رؤف، صائم ایوب، خوش دل شاہ، حسین طلعت، محمد نواز، محمد وسیم جونیئر، محمد حارث، ابرار احمد، فہیم اشرف، حسن علی، حسن نواز، صاحبزادہ فرحان، سلمان مرزا اور سفیان مقیم شامل ہیں۔
پاکستان، افغانستان اور متحدہ عرب امارات کی سہ ملکی سیریز 29 اگست سے سات ستمبر تک شارجہ میں ہو گی جب کہ ایشیا کپ نو سے 28 ستمبر تک ابو ظبی اور دبئی میں ہو گا۔
چیف سلیکٹر عاقب جاوید کا کہنا تھا کہ یہ ایک جیسا گروپ ہے، جو کھیل رہا ہے۔ ’امید ہے کہ یہ کھلاڑی جو چل رہے ہیں وہ آگے بھی اچھا کھیلیں گے۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
انہوں نے مزید کہا کہ ’صائم، صاحبزادہ اور فخر زمان اچھا کھیل رہے ہیں ان پر کسی کو شک نہیں ہونا چاہیے۔‘
چیف سلیکٹر کے مطابق کسی کھلاڑی کی فارم کو تین میچز کی فارم پر جانچنا سخت فیصلہ ہے۔ بابر نے پہلا میچ اچھا کھیلا۔ انہیں کچھ ایریاز میں بہتر کرنے کا کہا گیا۔ صاحبزادہ فرحان چھ میچز میں سے تین میں مین آف دی میچ رہے ہیں۔
عاقب جاوید نے مزید کہا کہ ’بابر اعظم اور محمد رضوان اس سے پہلے تین سیریز میں نہیں تھے۔ وہ دیگر کی طرح کھیلیں گے تو ضرور ٹی ٹوئنٹی کھیلیں گے۔ ان کے ساتھ کسی کو پرابلم نہیں لیکن اس وقت ہمارے پاس آپشنز اچھے ہیں۔‘
ساتھ ہی انہوں نے کہا کہ صائم، فخر اور صاحبزادہ فرحان ہی ٹاپ آرڈر میں تھے۔ کسی کھلاڑی کو دو تین میچز کی بنیاد پر زیر غور نہ لانے والی بات درست نہیں۔ ’ہم یہ نہیں کہہ سکتے کہ اب ہم بابر اور رضوان کو کبھی زیر غور نہیں لائیں گے۔‘
عاقب جاوید کا مزید کہنا تھا کہ ابھی سینیئر کھلاڑیوں کے پاس بگ بیش کا موقع ہے۔ جو اچھا پرفارم کریں گے وہی ٹیم میں آئیں گے۔ ’پاکستان ٹی ٹوئنٹی ٹیم انڈیا کو ہرا سکتی ہے، انڈیا پاکستان کا میچ بہت بڑا ہوتا ہے۔ یہ 17 رکنی سکواڈ کسی بھی ٹیم کو ہرا سکتا ہے۔‘
ہیڈ کوچ مائیک ہیسن نے کہا کہ ہم نے نو میں سے چھ میچز جیتے ہیں، ایک میچ ہم آخری بال پر ہارے۔ ہم نے ٹیم میں زیادہ تبدیلی نہیں جبکہ سلمان مرزا کو بنگلہ دیش میں پرفارمنس کی وجہ سے سکواڈ میں رکھا گیا ہے۔
