پاکستان اور دوسرے ملکوں کے مشترکہ بحری آپریشن کمبائنڈ میری ٹائم فورس (سی ایم ایف) نے بتایا ہے کہ پاکستانی بحریہ کے ایک جہاز نے بحیرہ عرب میں بادبانی کشتیوں سے تقریباً ایک ارب ڈالر مالیت کی منشیات پکڑی ہے۔

کمبائنڈ میری ٹائم فورس (سی ایم ایف)، ایک بحری شراکت داری ہے جس میں امریکہ بھی شامل ہے۔ اس کے منگل کو جاری ہونے والے ایک بیان میں بتایا گیا کہ پاکستانی بحریہ کے جہاز نے گذشتہ ہفتے 48 گھنٹوں کے اندر دو مختلف کشتیوں کو روکا۔

سی ایم ایف نے بتایا کہ پاکستانی بحریہ کے عملے نے کئی ٹن کرسٹل میتھ ایمفیٹامین اور تھوڑی مقدار میں کوکین قبضے میں لی۔

(سی ایم ایف ویب سائٹ)

یہ بتائے بغیر کہ منشیات لانے والی کشتیاں کہاں سے آ رہی تھیں بیان میں مزید کہا گیا کہ روکے گئے جہازوں کی ’کوئی قومیت نہ ہونے کے طور پر شناخت کی گئی۔‘ 

اس آپریشن کو انجام دینے والی سی ایم ایف ٹاسک فورس کے کمانڈر رائل سعودی نیول فورسز کموڈور فہد الجوید نے کہا کہ ’یہ سی ایم ایف کے لیے منشیات کی سب سے کامیاب ضبطی تھی۔‘

امریکی سینٹرل کمانڈ نے ایکس پر ایک پوسٹ میں سی ایم ایف کو مبارکباد دی۔

کمبائنڈ میری ٹائم فورسز (سی ایم ایف) ایک کثیر القومی بحری شراکت داری ہے جو تقریباً 32 لاکھ مربع میل بین الاقوامی پانیوں میں سلامتی، استحکام اور خوشحالی کو فروغ دیتی ہے۔ اس کا صدر دفتر بحرین میں ہے اور اس کی کمانڈ یو ایس نیوی کے وائس ایڈمرل کے پاس ہے۔

یہ 47 رکن ممالک کا ’رضامندانہ اتحاد‘ ہے، جس کی توجہ اہم شپنگ لین کی حفاظت کرتے ہوئے دہشت گردی، بحری قزاقی اور دیگر غیر قانونی سرگرمیوں کا مقابلہ کرنے پر مرکوز ہے۔

سی ایم ایف کی ویب سائٹ پر موجود تفصیلات میں بتایا گیا ہے کہ پاکستان نیوی کے جہاز پی این ایس یمامہ 274 نے، جو سعودی قیادت میں کمبائنڈ میری ٹائم فورسز کی براہ راست زیر نگرانی کام کر رہے ہیں، نے 28 ستمبر کو بھی بحیرہ عرب میں ایک بحری جہاز سے 120 ملین امریکی ڈالر سے زیادہ مالیت کی غیر قانونی منشیات ضبط کیں تھیں۔

پی این ایس یماما نے معمول کے گشت کے دوران 155 کلو گرام میتھم فیٹامائن اور 65 کلو گرام کوکین قبضے میں لیا تھا۔