پاکستان کے وفاقی وزیر داخلہ محسن نقوی اور سعودی وزیر کھیل شہزادہ عبدالعزیز بن ترکی الفیصل نے بدھ کو ریاض میں ایک ملاقات میں سعودی عرب میں کرکٹ کے فروغ سے متعلق تبادلہ خیال کیا۔

محسن نقوی، جو پاکستان کرکٹ بورڈ (پی سی بی) کے سربراہ بھی ہیں، نے ایکس پر ایک پوسٹ میں لکھا کہ ملاقات میں کرکٹ کے فروغ کے علاوہ دونوں ممالک کے نوجوانوں کی کھیلوں کے ذریعے مثبت سرگرمیوں میں شمولیت اور دونوں ممالک کے درمیان سپورٹس میں تعاون کو مزید مستحکم بنانے پر بھی تفصیلی تبادلہ خیال ہوا۔

پاکستانی وزیر داخلہ نے کہا کہ سعودی عرب میں کرکٹ انفراسٹرکچر کی ترقی، مشترکہ ٹریننگ پروگرامز، باہمی دوروں اور جونیئر و یوتھ لیول ٹورنامنٹس کے ذریعے دونوں ملکوں کے نوجوانوں کے لیے نئے مواقع پیدا کیے جا سکتے ہیں۔ 

ملاقات میں دونوں ملکوں کے درمیان کھیلوں خصوصاً کرکٹ کو دوستی اور علاقائی ہم آہنگی کا مضبوط پل بنانے پر بھی اتفاق ہوا۔  

ملاقات میں اتفاق ہوا کہ دونوں ممالک کے متعلقہ ادارے رابطوں کو مزید تیز کریں گے اور عملی منصوبہ بندی کے ذریعے جلد مشترکہ اقدامات کو حتمی شکل دی جائے گی تاکہ نوجوانوں کو زیادہ سے زیادہ مثبت مواقع فراہم کیے جا سکیں۔ 

محسن نقوی نے کہا کہ شہزادہ عبدالعزیز بن ترکی الفیصل وژن 2030 کے تحت سعودی عرب میں کھیلوں کے شعبے کو غیر معمولی انداز میں آگے بڑھا رہے ہیں۔ 

انہوں نے کہا کہ سعودی قیادت کی سرپرستی میں مملکت کا بڑے بین الاقوامی ٹورنامنٹس کی میزبانی حاصل کرنا ایک نئی تاریخ رقم کرنا ہے۔  

محسن نقوی نے خصوصاً ایشیا فٹ بال کنفیڈریشن (اے ایف سی) کپ 2027، ایشین ونٹر گیمز 2029، ایشین گیمز 2034 اور فیفا ورلڈ کپ 2034 کی میزبانی کے حصول پر سعودی وزیر کھیل کو مبارکباد دی۔