پاکستان کی پہلی اوپرا سنگر سائرہ پیٹر نے اتوار کی شام اسلام آباد کے ہنر کدہ میں ایک خصوصی کنسرٹ پیش کیا جہاں اوپرا اور مشرقی دھنوں کے امتزاج نے حاضرین کو خوب محظوظ کیا۔ اس تقریب میں نوجوان فنکاروں، طلبہ اور موسیقی کے شائقین کی بڑی تعداد شریک ہوئی۔
سائرہ پیٹر کے مطابق پاکستان میں اوپرا گائیکی کا رجحان ابھی اپنے ابتدائی مرحلے میں ہے۔
اسلام آباد میں انڈپینڈنٹ اردو سے گفتگو کرتے ہوئے انہوں نے بتایا کہ 2017 سے پہلے پاکستان میں اس فن کا تقریباً کوئی وجود نہیں تھا تاہم اب نوجوانوں کی دلچسپی اس میں مسلسل بڑھ رہی ہے۔
اوپرا سنگنگ مغربی کلاسیکی موسیقی کا نہایت تکنیکی اور جامع آرٹ سمجھا جاتا ہے جس میں گائیکی کے ساتھ اداکاری، جذبات اور کہانی کو بھی یکجا کیا جاتا ہے۔
ان کے بقول: ’یہ محض آواز کا اظہار نہیں بلکہ مکمل سٹیج پرفارمنس ہوتی ہے۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
سائرہ پیٹر کا کہنا تھا کہ اوپرا محض مغربی موسیقی نہیں بلکہ آواز اور ایکسپریشن کی ایسی تکنیک ہے، جسے مشرقی سُروں میں ڈھال کر ایک بالکل نیا انداز تخلیق کیا جا سکتا ہے۔ ان کے مطابق پاکستانی نوجوانوں میں ٹیلنٹ بھی ہے اور سیکھنے کا جذبہ بھی، ضرورت صرف مناسب مواقع اور پلیٹ فارمز کی ہے۔
تقریب کے مہمان خصوصی سابق وزیر ثقافت جمال شاہ نے بھی اوپرا کے بڑھتے رجحان پر بات کی۔ ان کا کہنا تھا کہ اگرچہ پاکستان میں اوپرا ابھی ابتدائی مرحلے میں ہے، لیکن ثقافتی ادارے، آرٹ سکولز اور آن لائن پلیٹ فارمز اس صنف کو متعارف کروانے میں اہم کردار ادا کر رہے ہیں۔ ان کے مطابق سائرہ پیٹر جیسے فنکار پاکستانی موسیقی میں ایک نئی جہت اور نیا ذوق پیدا کر رہے ہیں۔
سائرہ پیٹر نے لاہور میں بھی ’سائرہ آرٹ سکول‘ قائم کر رکھا ہے جہاں اوپرا سمیت مختلف میوزیکل ٹریننگ پروگرامز جاری ہیں۔ ان کا کہنا ہے کہ اب نوجوان گلوکار نہ صرف عالمی موسیقی کے رجحانات سے واقف ہو رہے ہیں بلکہ اوپرا کی تکنیک سیکھنے میں بھی سنجیدہ نظر آتے ہیں۔
