پاکستان کے قبائلی علاقے شمالی وزیرستان اور بلوچستان میں دہشت گردوں کے حملوں کے نتیجے میں ایک افسر سمیت پاکستان فوج کے دس جوان ہلاک ہوگئے۔

فوج کے شعبہ تعلقات عامہ (آئی ایس پی آر) کی جانب سے جاری کیے گئے اعلامیے کے مطابق شمالی وزیرستان کے علاقے گرباز میں افغانستان کی جانب سے فوج کی پیٹرولنگ پارٹی پر فائرنگ کی گئی، جس کی زد میں آکر چھ جوان ہلاک ہوئے۔

آئی ایس پی آر کے مطابق ہلاک ہونے میں حوالدار خالد، سپاہی نوید، سپاہی بچل، سپاہی علی رضا، سپاہی محمد بابر اور سپاہی احسن شامل ہیں۔

فوج کی جانب سے جاری کیے گئے دوسرے اعلامیے کے مطابق: ’بلوچستان کے علاقوں ہوشاب اور تربت میں کومبنگ آپریشنز کے دوران عسکریت پسندوں کی فائرنگ سے فرنٹیئر کور (ایف سی) بلوچستان کے چار اہلکار ہلاک ہوئے۔‘

آئی ایس پی آر کے مطابق ہلاک ہونے والوں میں کیپٹن عاقب، سپاہی نادر، سپاہی عافط الطاف اور سپاہی حفیظ اللہ شامل ہیں۔

کیپٹن عاقب (تصویر: آئی ایس پی آر)

فوج کے ترجمان میجر جنرل آصف غفور نے ’شمالی وزیرستان اور بلوچستان میں جوانوں کی شہادت کو خطے میں امن کی راہ میں پاکستان کی قربانی‘ قرار دیا۔

ان کا مزید کہنا تھا: ’قبائلی علاقوں میں کوششوں کے بعد سکیورٹی صورتحال بہتر ہو گئی ہے، اب تمام توجہ سرحدوں کو محفوظ بنانے پر مرکوز کی جارہی ہے۔‘

ٹوئٹر پر اپنے پیغام میں میجر جنرل آصف غفور نے لکھا: ’دشمن قوتیں بلوچستان کو غیر مستحکم کرنے کی کوشش کر رہی ہیں، جو انشااللہ ناکام ہوں گی۔‘

اپنی ایک اور ٹویٹ میں انہوں نے آرمی جنرل جنرل قمر جاوید باجوہ کا پیغام شیئر کیا، جس میں جوانوں کو ان کی قربانیوں پر خراج عقیدت پیش کیا گیا ہے۔