موسم سرما کے آغاز سے ہی سندھ اور پنجاب میں دھند اور سموگ کے باعث فضائی سروسز اور ٹرانسپورٹ کے ساتھ ساتھ ریل گاڑیوں کی آمد و رفت بھی متاثر ہوتی ہے اور مسافروں کو اپنی منزل تک پہنچنے میں گھنٹوں کی تاخیر ہو جاتی ہے۔

ٹرین سے کراچی پہنچنے والے ملتان کے رہائشی محمد رمضان کے مطابق ’ملتان سے کراچی کا سفر عام طور پر 10 سے 12 گھنٹے کا ہوتا ہے، مگر دھند اور سموگ کے باعث ٹرین کی رفتار کم ہوجاتی ہے، اس لیے وہی سفر 20 گھنٹے کا ہوجاتا ہے۔‘

محمد رمضان کا کہنا ہے کہ ’پنجاب میں بہت دھند ہے، جس کے باعث ٹرین کئی گھنٹے تاخیر کا شکار ہوتی ہیں۔ جلد پہنچنے کے لیے ہم بس کا سفر کرتے ہیں۔ دھند اور سموگ کے باعث بس کو بھی کچھ تاخیر ہوجاتی ہے، مگر ٹرین کی نسبت بس جلد پہنچ جاتی ہے۔'

پشاور کے رہائشی شمس الرحمنٰ  بذریعہ ٹرین کراچی میں اپنے رشتہ داروں کی شادی میں شرکت کے لیے آئے ہیں۔

انڈپینڈنٹ اردو سے گفتگو کرتے ہوئے شمس الرحمنٰ  نے کہا کہ ’دھند کے باعث ٹرین تاخیر کا شکار ہوئی۔ ہماری ٹرین دوپہر دو بجے پہنچنی تھی جو شام سات بجے پہنچی۔

’پشاور سے فیصل آباد تک ٹرین کی نارمل سپیڈ تھی مگر فیصل آباد سے روہڑی اور سکھر تک ٹرین دھند کے باعث بہت سست رفتار ہو گئی۔جس کے باعث کراچی پہنچنے میں تاخیر ہوئی۔‘

ڈویژنل سپرنٹنڈنٹ پاکستان ریلویز کراچی ناصر خلیلی کے مطابق ’دھند اور سموگ کا اثر ٹرین سروس پر اس طرح نہیں پڑتا جس طرح فلائیٹس اور روڈ ٹرانسپورٹ پر ہوتا ہے۔ دھند اور سموگ کے باعث ٹرین سروس کے شیڈول پر 35 سے 40 فیصد فرق آتا ہے۔‘ 

انڈپینڈنٹ اردو سے گفتگو کرتے ہوئے ناصر خیلی نے کہا کہ ’سموگ کا پنجاب میں زیادہ اثر ہوتا ہے۔ ریل گاڑیوں کے لیے پنڈی بھٹیاں سے ساہیوال تک کا سفر حد نگاہ کم ہو جانے کے باعث آہستہ کٹتا ہے، جس کے باعث ٹرین کے شیڈول میں تاخیر ہوتی ہے۔‘

ان کے مطابق ’ان مخصوص علاقوں کے علاوہ ٹرین کا سفر نارمل ہے۔ مخصوص علاقے میں دھند اور سموگ کے باعث آہستہ سفر کی وجہ سے کچھ گھنٹے تاخیر عام بات ہے۔‘

مستند خبروں اور حالات حاضرہ کے تجزیوں کے لیے انڈپینڈنٹ اردو کے وٹس ایپ چینل میں شامل ہونے کے لیے یہاں کلک کریں۔