انڈیا اور پاکستان کے درمیان حالیہ کشیدگی کے بعد کئی ایشیائی ایئرلائنز نے بدھ کو یورپ جانے اور آنے والی پروازوں کے راستے تبدیل یا منسوخ کرنے کا اعلان کیا ہے۔

انڈیا نے منگل اور بدھ کی درمیانی شب پاکستان اور اس کے زیر انتظام کشمیر پر حملہ کیا، جبکہ پاکستان نے دعویٰ کیا کہ اس نے پانچ انڈین لڑاکا طیارے مار گرائے ہیں۔

ایسے میں پاکستان نے موجودہ صورت حال میں اسلام آباد انٹرنیشنل ائیرپورٹ کو پروازوں کے لیے بند کرتے ہوئے تمام فلائٹس کو کراچی ائرپورٹ کی طرف موڑ دیا ہے۔

جبکہ پاکستان نے اپنی ائیر سپیس بھی ابتدائی طور پر 48 گھنٹوں کے لیے بند کرتے ہوئے مسافروں کو واپس گھر جانے کی ہدایت کی ہے۔

پروازوں کی آمد ورفت پر نظر رکھنے والے ایکس اکاونٹ فلائٹ ریڈار24 نے رپورٹ نے اس حوالے سے پاکستانی فضائی حدود کی عکاسی کرنے والی ایک تصویر بھی شائع کیے۔

اس صورت حال کے پیش نظر تائیوان کی ایوا ایئر نے کہا کہ انڈیا اور پاکستان کے درمیان لڑائی کے باعث یورپ جانے اور آنے والی پروازوں کے روٹ کو ایڈجسٹ کیا جائے گا تاکہ متاثرہ فضائی حدود سے بچا جا سکے۔

خبر رساں ادارے روئٹرز کو دیئے گئے بیان میں کمپنی نے کہا ہے کہ ایک پرواز جو ویانا سے روانہ ہوئی تھی، اسے واپس وہیں بھیج دیا جائے گا، جبکہ تائپے سے میلان جانے والی پرواز کو ایندھن بھرنے کے لیے ویانا کی جانب موڑ دیا جائے گا، جس کے بعد یہ اپنی منزل کی طرف روانہ ہوگی۔

کوریئن ایئر نے کہا کہ اس نے اپنے سیول انچیون-دبئی پروازوں کے راستے کو تبدیل کر دیے ہیں، اور اب یہ راستہ میانمار، بنگلہ دیش اور انڈیا کے اوپر سے گزرے گا، جو پہلے پاکستانی فضائی حدود سے گزرتا تھا۔

تھائی ایئرویز نے اعلان کیا کہ یورپ اور جنوبی ایشیا کے مقامات کی پروازوں کے راستے بدھ کی صبح سے تبدیل کیے جائیں گے، اور بعض پروازوں میں تاخیر کا خدشہ بھی ظاہر کیا گیا ہے۔

تائیوان کی چائنا ایئرلائنز نے کہا کہ اس نے ہنگامی منصوبہ بندی کو فعال کر دیا ہے اور ’مسافروں اور عملے کی حفاظت کو یقینی بنانے کے لیے کئی اقدامات اٹھائے ہیں۔‘

تاہم، ان اقدامات کی تفصیلات فراہم نہیں کی گئی ہیں۔

تائیوان کے مرکزی بین الاقوامی ہوائی اڈے تاؤیوان کے ویب سائٹ کے مطابق، بدھ کو لندن جانے والی چائنا ایئرلائنز کی نان سٹاپ پرواز منسوخ کر دی گئی ہے۔

روس کے یوکرین پر حملے سے پہلے تائیوان سے یورپ جانے والی کئی پروازیں روس کے اوپر سے گزرتی تھیں، لیکن تائیوانی ایئرلائنز پر اب پابندی ہے کیونکہ تائیوان نے ماسکو کے خلاف مغربی پابندیوں میں شرکت کی ہے۔

اس کے بعد سے یہ پروازیں انڈیا، پاکستان اور وسطی ایشیا کے اوپر سے گزرتی ہیں۔

دوسری جانب قطر ایئر ویز نے بھی ایکس پر اپنے ایک بیان میں کہا ہے کہ پاکستان کی فضائی حدود بند ہونے کی وجہ سے پروازیں عارضی طور پر وہاں سے نہیں گزریں گی۔