’پی ڈی ایم اے‘ پنجاب نے جمعرات کی صبح ایک الرٹ جاری کیا تھا جس کے مطابق لاہور، فیصل آباد اور راولپنڈی سمیت پنجاب کے مختلف اضلاع میں بارشوں کے سبب ہنگامی صورتحال سے نمٹنے کے لیے متعلقہ محکموں کو الرٹ رہنے کا کہا گیا ہے۔ 

الرٹ میں کہا گیا تھا کہ ’صوبائی کنٹرول روم سمیت تمام اضلاع کے ڈسٹرکٹ ایمرجنسی آپریشن سینٹرز کو بھی الرٹ کر دیا گیا ہے جبکہ پی ڈی ایم اے کنٹرول روم میں صورتحال کی مانیٹرنگ 24/7 جاری ہے۔‘

الرٹ میں مزید کہا گیا کہ نشینی علاقوں سے پانی کی نکاسی کو جلد از جلد ممکن بنانے کے لیے اقدامات کیے جائیں۔

’شہری احتیاط کریں بجلی کے کھمبوں اور لٹکتی تاروں سے دور رہیں۔ شہر ی کچے مکانات اور بوسیدہ عمارتوں سے دور رہیں۔‘

2022 میں مون سون بارشوں اور ملک کے شمالی پہاڑی علاقوں میں برف پگھلنے کے بعد آنے والے سیلابوں کے سبب 1700 سے زائد افراد کی جان گئی تھی جب کہ تین کروڑ سے زائد افراد متاثر ہوئے تھے۔ 

 

حکومت پاکستان کے تخمینے کے مطابق اس دوران ملکی معیشت کو 30 ارب ڈالر سے زائد کا نقصان ہوا۔

اس صوت حال میں لوگوں کو متنبہ کیا گیا کہ وہ ’گلیشیئرز اور دریا کے کناروں سے دور رہیں۔ سیلابی ریلوں کو عبور کرنے سے گریز کریں اور مقامی انتظامیہ کی ہدایات پر سختی سے عمل کریں۔‘ 

پاکستان کے نیشنل ایمرجنسیز آپریشن سینٹر کی ایڈوائزری کے مطابق 25 جون سے یکم جولائی تک ملک کے مختلف شہروں بشمول اسلام آباد، لاہور، راول پنڈی، مظفرآباد، کراچی، حیدرآباد، تھرپارکر، پشاور، سوات، گلگت، سکردو، ہنزہ سمیت ملک کے کئی علاقوں میں آندھی، طوفان اور بارش کا امکان ہے۔

پاکستان مسلسل موسمیاتی تبدیلیوں سے سب سے زیادہ متاثر ہونے والے ممالک میں شامل ہے جس سے ملک کو غیر معمولی طور پر شدید بارشوں، خشک سالی اور گرمی کی لہر کا سامنا ہے۔

سیلاب سے عطا آباد جھیل کے قریب واقع ہوٹل کا زمینی رابطہ منقطع

گلگلت بلتستان کے علاقے ہنزہ میں واقع عطا آباد جھیل کے قریب برساتی نالے میں طغیانی کی وجہ سے معروف ہوٹل لکسس سے زمینی رابطہ منقطع ہو گیا۔

گلگلت بلتستان پولیس کے مطابق گذشتہ روز (بدھ کو) بارشوں کی وجہ سے برساتی نالے میں طغیانی آئی تھی جس کی وجہ سے سڑک کا ایک حصہ بہہ گیا۔

ہنزہ پولیس کنٹرول کے اہلکار نے نامہ نگار اظہار اللہ کو بتایا کہ گذشتہ روز ہوٹل میں پھنسے سیاحوں کو کشتیوں کے ذریعے ریسکیو کر کے محفوظ مقامات پر منتقل کر دیا گیا۔

لکسس ہوٹل عطا آباد جھیل کے قریب بنایا گیا ہے اور برساتی نالہ ہوٹل کی ایک طرف سے گزر کر جھیل میں گرتا ہے۔

ہوٹل کے ایک عہدے دار نے فون پر بتایا کہ ہوٹل آپریشنل ہے لیکن روڈ کی جانب سے ہوٹل کے ساتھ رابطہ منقطع ہے۔

انہوں نے بتایا کہ ’آج (26 جون) کی شام تک روڈ کا ہوٹل کے ساتھ رابطہ بحال کیا جائے گا اور سیاح آ سکتے ہیں۔‘

کچھ دن پہلے یہ ہوٹل خبروں کی زینت تب بنا تھا جب ایک غیر ملکی سیاح نے ہوٹل کی سیوریج کی مبینہ طور پر جھیل میں ڈالنے کی ویڈیو سوشل میڈیا پر اپ لوڈ کی تھی۔

اس کے بعد مقامی انتظامیہ نے ہوٹل کا ایک حصہ سیل کیا تھا لیکن ہوٹل کے مطابق ہوٹل کی سیوریج جھیل میں نہیں ڈالا گیا بلکہ گدلا پانی دراصل قریبی پہاڑی سے نکلنے والی مٹی کی وجہ سے ہے۔

عطا آباد جھیل 2010 میں شدید لینڈ سلائیڈنگ کی وجہ سے وجود میں آئی تھی، جس کی گہرائی تقریباً 100 میٹر ہے اور یہ 21 کلومیٹر احاطے پر پھیلی ہوئی ہے۔

جھیل بننے کی وجہ سے 2010 میں ایک پورا علاقہ ڈوب گیا تھا جس میں کئی لوگ بھی جان سے گئے، لیکن ابھی یہ جھیل سیاحوں کے لیے ایک معروف سیاحتی مقام ہے۔