پولیس کے مطابق پشاور میں واقع فیڈرل کانسٹیبلری (سابقہ فرنٹیئر کانسٹبلری) کی عمارت کے مرکزی گیٹ کے قریب پیر کو دو دھماکے ہوئے ہیں۔ 

ایس ایس پی آپریشنز پشاور ڈاکٹر زاہد اللہ نے انڈپینڈنٹ اردو کو بتایا کہ ہیڈکوارٹر کے گیٹ پر دو دھماکوں اور فائرنگ کی آوازیں سنی گئیں۔

ڈاکٹر زاہد اللہ نے بتایا: ’پولیس اور دیگر قانون نافذ کرنے والے ادارے جائے وقوعہ پر موجود ہے اور مزید تفصیل بعد میں دی جائے گی کہ دھماکوں میں کوئی نقصان ہوا ہے یا نہیں۔‘

صدر بازار کے قریب واقع ایف سی کی عمارت ایک تاریخی عمارت ہے، جہاں فیڈرل کانسٹیبلری کے دفاتر موجود ہے۔ 

یہ عمارت ایک مصروف شاہراہ پر واقع ہے، جہاں دونوں اطراف میں مختلف دکانیں، گاڑیوں کی ورک شاپس اور عمارت کے بالکل سامنے صدر بازار کا مشہور ڈینز ٹریڈ سنٹر واقع ہے۔

یہ واقعہ ایک روز قبل خیبر پختونخوا کے وزیر اعلیٰ سہیل آفریدی کی جانب سے دہشت گردی سے نمٹنے کے لیے سپیشل برانچ کو ایک علیحدہ اور خصوصی پولیس یونٹ میں تبدیل کرنے کی منظوری کے بعد سامنے آیا۔ یہ فیصلہ صوبے میں عسکریت پسندانہ حملوں کی نئی لہر کے تناظر میں کیا گیا۔

حالیہ دنوں میں خیبرپختونخوا میں شدت پسندی کے متعدد واقعات پیش آئے ہیں، جن میں کئی سکیورٹی اہلکاروں کی اموات ہوئی ہیں۔

یہ ابتدائی خبر ہے، جسے اپ ڈیٹ کیا جا رہا ہے۔