اکبر اعظم کے بعد ہندوستان میں دوسرا اہم مرتبہ ٹیپو سلطان کو حاصل رہا ہے، جسے ایک قوم پرست مزاحمتی رہنما کے طور پر پیش کیا جاتا رہا، جو انگریزوں کے خلاف قومی مزاحمت کی علامت بن گیا تھا۔

انڈیا کی مرکزی حکومت اور کرناٹک کی صوبائی حکومت کئی دہائیوں تک ان کی سالگرہ اور برسی کا دن سرکاری سطح پر مناتی رہی ہیں۔ 

ٹیپو سلطان کے نام پر سڑکیں، پارک اور ادارے بنائے گئے۔ ان کے نام پر ٹرینیں چلائی گئیں۔

لیکن جب سے کرناٹک میں بی جے پی برسرِ اقتدار میں آئی تو اس نے ٹیپو سلطان کی یاد میں ہونے والی تقریبات کی روایت ختم کر دی۔ آر ایس ایس ٹیپو سلطان کو ہندوؤں کا مخالف اور مذہبی طور پر متعصب سمجھتی ہے۔

اسی طرح اس کا موقف ہے کہ جب اکبر کے ساتھ اعظم کا لقب لگایا جاتا ہے تو گویا ہندو طلبہ کو ایک مسلمان حکمران سے مرعوب کیا جا رہا ہوتا ہے۔ 

اسی تناظر میں انڈیا کے قومی نصاب میں جہاں تاریخ کو نئے انداز سے پیش کیا جا رہا ہے، وہیں ان شخصیات کے ساتھ اعظم جیسے القابات ہٹا دیے گئے ہیں۔

نصاب سے مغل اور دہلی سلطنت کے ابواب نکال کر ان کی جگہ مگدھ، موریہ، سنگھا اور ستاواہانا ادوار کو ہندو تہذیب کی شناخت کے طور پر پیش کیا جا رہا ہے۔ 

جسے بعض ماہرین نصاب کو ہندو نظریاتی رنگ دینے کی کوششوں کا حصہ سمجھتے ہیں۔

انڈیا ایسا کیوں کر رہا ہے؟

انڈین نصاب مرتب کرنے والے ادارے این سی ای آر ٹی کا موقف ہے کہ وہ صرف بنیادی فریم ورک دیتا ہے، انڈیا کے وفاقی نظام میں ریاستیں اپنے تعلیمی نصاب میں اپنے علاقائی اور تاریخی واقعات کو شامل کر سکتی ہیں۔ 

یہ ان کی اپنی صوابدید ہے کہ وہ کس کو کس انداز سے پیش کرتی ہیں۔

نصاب میں کسی شخصیت کو مثالی انداز یا ہیرو کے طور پر پیش کرنے کی بجائے طلبہ کو یہ موقع دیا جا رہا ہے کہ وہ کسی بھی کردار کو اس کی تمام تر پیچیدگیوں کو سامنے رکھتے ہوئے خود یہ اخذ کریں کہ وہ کیا تھا؟ تاکہ وہ اپنے مشاہدے اور علم کے ذریعے تنقیدی فکر اختیار کر سکیں۔

دوسری جانب انڈیا کے سیکولر حلقے یہ اعتراض اٹھاتے ہیں کہ اگر ایسا ہی ہے تو پھر یہ رویہ ہندو شناخت رکھنے والے تاریخی کرداروں کے ساتھ کیوں روا نہیں رکھا جا رہا اور اس کا نشانہ صرف وہ کردار ہی کیوں ہیں جو غیر ہندو ہیں۔

لیکن یہ بھی ایک حقیقت ہے کہ انڈیا وہ پہلا ملک نہیں جس نے اس ہدف کے تحت اپنے نصاب میں تبدیلیاں کی ہیں۔

پاکستان کے قومی نصاب کے حوالے سے اقلیتوں کو ایسی شکایات ایک عرصے سے ہیں۔ ترکی، روس، چین، پولینڈ، ہنگری، جرمنی، فرانس، جاپان حتیٰ کہ امریکہ میں بھی تاریخی شخصیات کو قومی بیانیے کے تناظر میں ہی پیش کیا جاتا ہے۔

ہندوستان کا جب قومی بیانیہ سیکولر تھا تو اکبر اعظم تھا، ٹیپو سلطان عظیم تر تھا، مگر اب ہندوستان اگر اپنی شناخت ایک ہندو ریاست کے طور پر کرنے کا فیصلہ کر چکا ہے تو پھر ظاہر ہے کہ اسے اکبر اور ٹیپو سلطان کی جگہ نئی شخصیات کو نصاب میں جگہ دینی ہے، جنہیں وہ اپنے مذہبی فخر کے تناظر میں عظیم سے عظیم تر حیثیت میں پیش کر سکے۔

نوٹ: یہ خبر بلاگر کی ذاتی آرا پر مبنی ہے، جس سے انڈپینڈنٹ اردو کا متفق ہونا ضروری نہیں۔