سابق وزیراعظم عمران خان کی اڈیالہ جیل سے منتقلی اور ان کی صحت سے متعلق خبروں کے بعد پاکستان تحریک انصاف (پی ٹی آئی) کی قیادت سراپا احتجاج ہے اور اپنے بانی چیئرمین سے جلد از جلد ملاقات کا مطالبہ کر رہی ہے۔
عمران خان اگست 2023 سے جیل میں ہیں۔ انہیں متعدد مقدمات میں سزا سنائی گئی جنہیں ان کے حامی وسیع طور پر سیاسی بنیادوں پر قائم کیے گئے مقدمات قرار دیتے ہیں۔ پی ٹی آئی رہنما مسلسل جیل میں ان کی صحت اور قانونی مشیروں اور خاندان تک محدود رسائی پر تشویش کا اظہار کرتے رہے ہیں۔
منگل (25 نومبر) کو بھی عمران خان کی بہنوں علیمہ خان اور نورین نیازی کی قیادت میں کارکنوں نے بانی پی ٹی آئی سے اہل خانہ کی جیل میں ملاقات نہ کروائے جانے کے خلاف احتجاجاً راولپنڈی میں واقع اڈیالہ جیل کے کچھ فاصلے پر گورکھپور کے مقام پر کئی گھنٹوں تک دھرنا دیا، تاہم انتظامیہ کی جانب سے آئندہ ہفتے ملاقات کی یقین دہانی کے بعد رات گئے دھرنا ختم کر دیا گیا تھا۔
جمعرات کو وزیراعلیٰ خیبر پختونخوا سہیل آفریدی نے مقامی قیادت کے ہمراہ پی ٹی آئی کے بانی عمران خان سے ملاقات کی اجازت کے لیے اڈیالہ جیل سے کچھ فاصلے پر دھرنا دیا، جو جمعے کی صبح تک جاری رہا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
سہیل آفریدی نے جمعے کو طلوع آفتاب سے قبل میڈیا کے نمائندوں سے کہا کہ اس دھرنے کی باقاعدہ کال نہیں دی گئی تھی البتہ آئندہ منگل کو احتجاج کی کال دی گئی ہے جس میں ان کے بقول پی ٹی آئی کے تمام قانون ساز شرکت کریں گے۔
انہوں نے کہا: ’ہم نے کال منگل کے دن کی دی ہوئی ہے، جس میں تمام پارلیمنٹرینز چاہے ان میں سینیٹرز ہیں، ایم این ایز ہیں یا ایم پی ایز ہیں، تمام شرکت کریں گے اور منگل دن بہت اہم دن ہے۔‘
دھرنے میں شامل پی ٹی آئی رہنماؤں نے کہا کہ وہ عمران خان سے ملاقات کی اجازت کے لیے منگل کو اسلام آباد ہائی کورٹ سے رجوع کریں گے۔
حکومت میں شامل عہدیدار اور اڈیالہ جیل کے حکام کہہ چکے ہیں کہ نہ تو بانی پی ٹی آئی کو اڈیالہ جیل سے منتقلی اور نہ ہی ان کی صحت کی خرابی سے متعلق خبروں میں کسی طرح کی صداقت ہے۔
