امریکی پولیس کے مطابق ہفتے کی شب کیلیفورنیا کے شہر سٹاکٹن کے ایک بینکویٹ ہال میں ایک خاندانی تقریب کے دوران فائرنگ کے ایک واقعے میں چار افراد جان سے گئے اور 10 زخمی ہو گئے۔
سان واکین کاؤنٹی شیرف آفس کے ترجمان ہیدر برینٹ نے نیوز کانفرنس کے دوران بتایا کہ متاثرین میں بچے اور بڑے دونوں شامل ہیں، جبکہ ابتدائی شواہد بتاتے ہیں کہ ’یہ واقعہ ممکنہ طور پر ہدف بنا کر کیا گیا حملہ‘ ہے اور تفتیش کار تمام امکانات کا جائزہ لے رہے ہیں۔‘
مقامی حکام کا کہنا ہے کہ مشتبہ حملہ آور کو ابھی تک گرفتار نہیں کیا گیا اور انہوں نے عوام سے مدد کی درخواست کی ہے۔ تفتیش کار اب بھی ممکنہ محرکات جاننے کے لیے کام کر رہے ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
سان واکین کاؤنٹی کے ڈسٹرکٹ اٹارنی ران فریٹاس نے نیوز کانفرنس میں کہا: ’اگر آپ کے پاس اس فرد کے بارے میں کوئی معلومات ہیں تو فوری طور پر رابطہ کریں اور اگر آپ خود وہ فرد ہیں تو فوراً خود کو (پولیس کے) حوالے کر دیں۔‘
یہ واقعہ شام 6 بجے کے قریب بینکویٹ ہال کے اندر پیش آیا۔ سٹاکٹن کی آبادی تقریباً تین لاکھ 20 ہزار ہے۔
شہر کی میئر کرسٹینا فوگازی نے کہا: ’خاندانوں کو ہسپتال میں کھڑے ہونے کے بجائے ایک ساتھ ہونا چاہیے، اپنے پیاروں کے پاس کھڑے ہو کر دعا کرنے کے بجائے کہ وہ زندہ بچ جائیں۔‘
حکام نے فوری طور پر متاثرہ افراد کی حالت کے بارے میں مزید معلومات فراہم نہیں کیں، تاہم پہلے بتایا گیا تھا کہ متعدد افراد کو ہسپتال منتقل کیا گیا۔
