پاکستان نے جمعرات کو کہا ہے کہ بنگلہ دیش کی جانب سے انڈیا کے بغیر کسی بلاک کے بنانے کی تجویز موصول ہونے کی صورت میں غور کیا جا سکتا ہے۔
اسلام آباد میں وزارت خارجہ کی ہفتہ وار بریفنگ میں ترجمان طاہر اندرابی بنگلہ دیشی مشیر خارجہ محمد توحید حسین کے اس بیان پر کہ بنگلہ دیش کے لیے تزویراتی طور پر ممکن ہے کہ وہ خطے میں پاکستان کے ساتھ ایسا نیا گروپ بنائے جس میں انڈیا شامل نہ ہو ایک سوال کا جواب دے رہے تھے۔
طاہر اندرابی کا کہنا تھا کہ ’انہوں نے ایسا کوئی بیان ابھی نہیں دیکھا لیکن پاکستان ہمیشہ سے کثیرالملکی فورمز اور بات چیت پر یقین رکھتا ہے اور اگر بنگلہ دیش کی طرف سے ایسا کوئی پروپوزل سامنے آتا ہے تو غور کیا جا سکتا ہے۔‘
بنگلہ دیشی میڈیا کے مطابق بدھ کو ڈھاکہ میں صحافی کے ایک سوال کے جواب میں بنگلہ دیش کے امور خارجہ کے مشیر محمد توحید حسین نے کہا تھا کہ ’یہ ہمارے (بنگلہ دیش) کے لیے تزویراتی طور پر ممکن ہے … (لیکن ایسا) نیپال یا بھوٹان کے لیے انڈیا کو چھوڑ کر پاکستان کے ساتھ گروپ بنانا ممکن نہیں ہے۔‘
توحید حسین ان کے ریمارکس کو حالیہ ’اسلام آباد کنکلیو‘ میں پاکستان کے وزیر خارجہ اسحٰق ڈار کے ایک بیان کے ردعمل کے طور پر تعبیر کیا جا رہا ہے، جہاں انہوں نے کہا تھا کہ بنگلہ دیش، چین اور پاکستان پر مشتمل سہ فریقی اقدام شروع ہو چکا ہے اور اس میں خطے کے اندر اور اس سے باہر کے ممالک کو بھی شامل کیا جا سکتا ہے۔
بنگلہ دیشی میڈیا نے رپورٹ کیا کہ توحید حسین نے کہا کہ مسٹر (اسحٰق) ڈار نے ’کچھ کہا ہے اور شاید کسی وقت اس میں کچھ پیش رفت ہو سکتی ہے۔‘
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اگست میں وزیر خارجہ اسحٰق ڈار نے 13 سال میں پہلی مرتبہ بنگلہ دیش کا دورہ کیا تھا۔
وزیر اعظم شہباز شریف اور بنگلہ دیش کے چیف ایڈوائزر محمد یونس نے بھی حالیہ مہینوں میں چند خوشگوار ملاقاتیں کی ہیں۔
بنگلہ دیش میں گذشتہ سال اگست میں شیخ حسینہ واجد کی حکومت کا تختہ الٹنے کے بعد سے اسلام آباد اور ڈھاکہ کے درمیان فاصلے کم ہوئے ہیں جبکہ سابق بنگلہ دیشی وزیر اعظم کو پناہ دینے والا دہلی نسبتاً دور ہوا ہے۔
