ہم میں سے بہت سے لوگ بچپن میں اپنے گھر کے باہر گلی میں لٹو کھیلتے ہوئے بڑے ہوئے ہوں گے۔ وقت کے ساتھ ساتھ اس روایت کو بھی ختم ہوتے دیکھا۔

 تاہم راولپنڈی کے محمد عظیم نے اس چھوٹے سے کھلونے کو اب بھی زندہ رکھا ہوا ہے۔ عظیم ان کچھ ہنر مندوں میں سے ایک ہیں جو لٹو بناتے ہیں۔

ان کے آباواجداد کی وجہ سے راولپنڈی کا محلہ لٹو محلے کے نام سے جانا جاتا ہے جہاں آج سے چند سالوں پہلے درجنوں لٹوؤں کی دکانیں تھیں اور اس فن سے وابستہ کاریگر کام کرتے تھے۔ لیکن اب اس محلے میں عظیم اپنے آبا واجداد کے اس فن کو زندہ رکھے ہوئے واحد کاریگر ہیں۔

عظیم کا کہنا ہے کہ پہلے ہاتھ سے لٹو بنتے تھے مگر اب مشینیں آ گئی ہیں جس سے کام تو آسان ہوگیا ہے لیکن دور حاضر میں نہ صرف لٹو سے کھیلنے کا شوق کم ہو گیا ہے بلکہ لٹو بنانے والے بھی گنے چنے رہ گئے ہیں۔

ان کا کہنا تھا کہ پہلے یہ سادہ بنتا تھا لیکن اب خوبصورتی کے لیے ان پر رنگ کیا جاتا ہے۔ نیچے سپیشل پِن لگاتے ہیں اور وزن بڑھانے کے لیے اس کے اوپر لوہے کا کڑھا چڑھاتے ہیں جس سے وزن زیادہ ہو جاتا ہے اور زیادہ دیر چلتا ہے۔

عظیم کا کہنا تھا کہ سکول سے چھٹیوں میں وہ بچوں کو لٹو بنانا اور چلانا سکھاتے ہیں اور یہاں پر ٹورنامنٹ بھی کراتے ہیں۔

 ان کا کہنا تھا: 'یہ ہماری ثقافت ہے۔ یہ ہمارے پاکستان کا ورثہ ہے۔ ہم چاہتے ہیں کہ اس کو زندہ رکھا جائے۔'