پشاور سے تعلق رکھنے والے انکل ٹونی پاکستان کے نامور فوٹوگرافرز میں سے ایک ہیں، جنہوں نے بین الاقوامی سطح پر نمایاں کامیابیاں حاصل کی ہیں۔

85  سالہ انکل ٹونی کا اصل نام تو فخر زمان آذر ہے، لیکن ٹونی کا یہ لقب انہیں پاکستان کی مشہور گلوکارہ میڈم نور جہاں مرحوم سے ملا جس کے بعد فخر زمان انکل ٹونی کہلانے لگے۔

ان کی بیوی کو ہمیشہ ان سے یہ شکایات رہی ہے کہ وہ آوارہ گردی کرتے ہیں اور گھر کا خیال نہیں رکھتے لیکن انکل ٹونی کا کہنا ہے کہ وہ فوٹوگرافی کے دیوانے ہیں، جس کے لیے وہ کافی عرصے تک گھر نہیں لوٹتے۔

انکل ٹونی نے انڈپینڈنٹ اردو کو بتایا کہ انہوں نے 75 سال فوٹوگرافی کرتے ہوئے گزاری اور اس عرصے میں انہوں نے ایسی ایسی تصاویر بنائیں جس کے لیے انہیں قومی اور بین الاقوامی سطح پر ایوارڈز سے نوازا گیا۔

انہوں نے بتایا کہ انہوں نے اپنی پہلی فوٹو لیڈی ڈیانا کی بنائی تھی جب وہ اپنے شوہر کے ساتھ پشاور کے دورے پر آئی تھیں۔

انکل ٹونی کی بنائی گئی ہر تصویر میں ایک کہانی ہے (سدرہ ایان)

اپنی بنائی ہوئی تصویر کی خوبصورتی کی مزید تشریح کرتے ہوئے انہوں نے کہا کہ اس تصویر میں ڈیانا سائیڈ پر دیکھتی ہوئی مسکرا رہی ہیں، جس میں ان کے دانت نظر آرہے ہیں، ان کے کان میں پہنا ہوا زیور بھی نمایاں ہے اور سب سے دلکش بات یہ ہے کہ ان کے بالوں میں ہائی لائیٹس بھی نظر آرہے ہیں جبکہ انہوں نے آخری تصویر بے نظیر بھٹو کی لی تھی۔

انکل ٹونی نے بتایا کہ انہوں نے بڑی بڑی شخصیات کی فوٹوز بنائی ہیں جیسے ضیا الحق، ذوالفقار علی بھٹو، عمران خان، باچا خان، ولی خان، گاما پہلوان، دلیپ کمار اور ایشوریا رائے وغیرہ۔

بقول انکل ٹونی ان کی بنائی گئی ہر تصویر خاص اور پیاری ہے اور ہر تصویر پر انہوں نے ایک جتنی محنت کی ہے۔

ان کی ہر تصویر میں ایک کہانی ہے۔ انہوں نے شھد کی مکھی کی ایسی تصویر لی تھی، جس پر انہیں ایوارڈ دیا گیا۔ اسی طرح ان کی ایک تصویر میں ایک پرندہ اپنے پنجوں میں سمندر سے مچھلی اٹھا رہا تھا اور مچھلی کے منہ سے پانی گرتا ہوا نظر آیا۔

انکل ٹونی نے بتایا کہ فوٹوگرافی کو کبھی انہوں نے اپنا بزنس نہیں بنایا، یہ صرف ان کا جنون رہا، لیکن انہیں عزت کے ساتھ جو نام ملا ہے، وہ تاریخ میں یاد رکھا جائے گا۔