28 سالہ صحافی انس الشریف کو خدشہ تھا کہ اسرائیل انہیں قتل کر دے گا۔
صحافیوں کے تحفظ کی تنظیم کمیٹی ٹو پروٹیکٹ جرنلسٹس (سی پی جے) اور اقوام متحدہ کی آزادیِ اظہارِ رائے کی نمائندہ خصوصی بھی فکر مند تھیں۔
الجزیرہ کے بہترین نامہ نگار کو جنہوں نے انتھک محنت سے شمالی غزہ میں ہونے والی ہولناکیوں کو دستاویزی شکل دی تھی، اسرائیلی فوج کی جانب سے مہلک جان لیوا مہم کا سامنا کرنا پڑا۔ اسرائیلی فوج نے فلسطینی صحافی اور دو بچوں کے والد پر حماس کا رکن ہونے کا الزام لگایا، جسے شریف نے سختی سے مسترد کیا اور سی پی جے نے ان الزامات کو مکمل طور پر بےبنیاد قرار دیا۔
درحقیقت صرف چند ہفتے قبل سی پی جے نے کہا تھا کہ یہ مہم ’الشریف کے قتل کا جواز پیدا کرنے کی کوشش‘ ہے اور ان کی زندگی کو لاحق خطرہ اب نہایت سنگین ہو چکا ہے۔
اقوام متحدہ کی خصوصی نمائندہ ایرین خان نے دنیا سے مطالبہ کیا تھا کہ ’ان کی زندگی کو خطرے میں ڈالنے کی اس کھلی کوشش‘ کے خلاف کارروائی کی جائے۔
کسی نے کچھ نہیں کیا۔
اتوار کی شب اسرائیل نے جان بوجھ کر اس خیمے پر بمباری کی جس میں وہ سو رہے تھے، انس اور الجزیرہ کے ان کے چار ساتھیوں کو قتل کیا، اس کے ساتھ ہی پڑوس میں واقع خیمے میں موجود فری لانس صحافی اور ایک راہ گیر کو بھی قتل کیا۔ یہ سب ایک ہسپتال کے احاطے کے اندر کمپاؤنڈ میں ہوا۔
فوج نے جشن منایا اور دعویٰ کیا کہ یہ ریاستی سرپرستی میں ہونے والا قتل حماس کے ایک کارکن پر ایک کامیاب حملہ تھا۔ سی پی جے نے اسے ’بالکل سیدھا سیدھا قتل‘ قرار دیا اور کہا کہ یہ اس مسلسل طریقہ کار کا حصہ ہے، جس میں فلسطینی صحافیوں پر بغیر کسی قابلِ اعتماد ثبوت کے الزام لگایا جاتا ہے۔
اور یہ سادہ سی بات ہے۔
غزہ پر اسرائیلی حملوں میں اکتوبر 2023 سے اب تک 200 سے زیادہ فلسطینی صحافی اور میڈیا کارکن مارے جا چکے ہیں۔
جتنے زیادہ انس جیسے فلسطینی صحافیوں کو اسرائیل غزہ میں قتل کرتا ہے، اتنے ہی کم لوگ باقی رہ جاتے ہیں جو ہمارے دور کے سب سے بے مثال انسانی المیے کی رپورٹنگ کر سکیں۔
اس سے دنیا کی آنکھوں پر پردہ پڑ جاتا ہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اس جنگ کے آغاز سے اسرائیل نے مجھ جیسے بین الاقوامی صحافیوں کو بھی غزہ میں داخل ہونے اور رپورٹنگ کرنے سے روک رکھا ہے، سوائے کنٹرول شدہ فوجی سرایتوں کے۔
اسی لیے دنیا کے نیوز رومز کو اپنے بہادر فلسطینی ساتھیوں پر انحصار کرنا پڑتا ہے، تاکہ وہ محصور اور مسلسل بمباری کے شکار غزہ کے اندر جو کچھ ہو رہا ہے، اس کی عینی شہادت فراہم کر سکیں۔ یہ صحافی دنیا کی آنکھیں ہیں۔
میں نہیں سمجھتی کہ بین الاقوامی صحافیوں کو غزہ میں داخل ہو کر رپورٹنگ کرنے سے روکنے کی کوئی وجہ ہے۔ میں اور مجھ جیسے سینکڑوں دیگر نامہ نگار، 2012 اور 2014 کی تباہ کن غزہ جنگوں کی رپورٹنگ غزہ کے اندر سے کر چکے ہیں۔ اس وقت اسرائیل نے ہمیں زمینی راہداریوں کے ذریعے داخل ہونے کی اجازت دی۔
میں نے بارہا اسرائیلی حکام سے پوچھا ہے کہ وہ ہمیں اندر کیوں نہیں جانے دیتے، مگر آج تک کوئی واضح وضاحت نہیں ملی۔
یہ سوال پیدا ہوتا ہے: وہ کیا ہے جو ہمیں نہیں دیکھنا چاہیے؟
فلسطینی صحافیوں کو ذبح کرنا اور بین الاقوامی رپورٹرز کی ناکہ بندی کا مطلب یہ ہے کہ آپ، میں، ہم سب اپنے اپنے کمروں میں آرام سے بیٹھے ہیں، غزہ میں کیا ہو رہا ہے، اس کے بارے میں کم ہی جانتے ہیں۔
غزہ میں، جہاں اسرائیل کی بمباری اور حماس کے ساتھ لڑائی میں مقامی حکام کے مطابق 61 ہزار سے زائد افراد قتل کیے جا چکے ہیں، جہاں اقوام متحدہ کے حمایت یافتہ قحط کے عالمی نگران ادارے کے مطابق قحط جنم لے رہا ہے، جہاں 23 لاکھ کی آبادی کا 90 فیصد سے زیادہ بار بار اپنے گھروں سے بے دخل ہو کر قتل کے ڈبے میں پھنسا ہوا ہے۔
اس کا مطلب ہے کہ ہم غزہ کے حالات کے بارے میں کم جانتے ہیں، جہاں کم از کم 50 یرغمالیوں اور قیدیوں کو رکھا ہے جو حماس کے عسکریت پسندوں نے سات اکتوبر کو جنوبی اسرائیل پر کیے گئے مہلک حملوں کے دوران پکڑے تھے۔
صحافیوں کو جان بوجھ کر نشانہ بنانا اور قتل کرنا، بین الاقوامی انسانی قانون کے تحت جنگی جرم ہے۔
اگر الجزیرہ کے صحافیوں، اور فری لانس محمد الخالدی، کے قتل کا کوئی جواب نہ ملا، اگر ان اور دیگر تمام صحافیوں کے قتل کی غیر جانبدارانہ تحقیقات اور ان کے اہل خانہ کے لیے انصاف نہ ملا، تو یہ غزہ میں بمشکل زندہ اور خطرے میں موجود ہمارے بہادر ساتھیوں کے لیے ایک خطرناک مثال قائم کرے گا۔
اور یہ دنیا بھر کے صحافیوں اور سچ کی تلاش کے لیے بھی خطرناک مثال ہو گی۔
اس سے یہ اشارہ ملتا ہے کہ ایک مغربی اتحادی، برطانیہ اور امریکہ کے لیے قابل قبول ہے کہ وہ صحافیوں کے قتل میں بلاوجہ ملوث ہوں۔
یہ ہم سب کو کم محفوظ بناتا ہے۔
اس وقت، غزہ ایک صحافی کے لیے زمین پر سب سے خطرناک جگہ ہے۔
ایمنسٹی کے مطابق: ’جدید تاریخ میں کسی بھی تنازع میں صحافیوں کی اتنی بڑی تعداد قتل نہیں ہوئی جتنی اسرائیل کی فلسطینیوں کے خلاف غزہ پٹی میں نسل کشی کے دوران ہوئی۔‘
غزہ کے اندر ابھی بھی موجود فلسطینی صحافیوں کی خاطر۔
غزہ میں اس وقت موجود تمام متاثرہ لوگوں کی خاطر۔
صحافت کے مستقبل کی خاطر۔
اور سچ کے مستقبل کی خاطر، ہمیں جواب اور انصاف کا مطالبہ کرنا ہو گا۔
© The Independent
