خوبصورت ترین خواتین کی فہرست سازی ٹوئٹر پہ

پاکستان میں دنیا کی سو خوبصورت ترین خواتین کی فہرست کے حوالے سے چلنے والے ٹرینڈ میں صارفین شیخ جراح میں احتجاج کے دوران گرفتار ہونے والی مریم العفیفی کو نامزد کر رہے ہیں۔

مریم بیت المقدس کی رہائشی ہیں اور فلسطینی یوتھ آرکیسٹرا کی رکن ہیں۔ (تصویر: ویڈیو سکرین گریب)

دنیا کی خوبصورت ترین سو خواتین کے نام سے بھارتی سوشل میڈیا پر کئی دنوں سے چلنے والا ٹرینڈ جمعرات کو پاکستان میں بھی چل پڑا، جس میں بڑی تعداد میں پاکستانیوں نے فلسطینی خاتون مریم العفیفی کو بھی نامزد کیا ہے۔

ٹوئٹر پر 100mostbeautifulwomen2021 # کے نام سے ٹریند کئی دنوں سے بھارت میں چل رہا تھا جہاں آن لائن میگزین ’انڈیا ٹی وی نیوز‘ کے مطابق صارفین مختلف بھارتی اداکاراوں اور ٹی وی سٹارز کی تصاویر شیئر کرتے ہوئے انہیں دنیا کی خوبصورت ترین خواتین کی فہرست میں شامل قرار دے رہے تھے۔

یہ سلسلہ چھ مئی کو شروع ہوا جب ٹاپ بیوٹی ورلڈ نامی ٹوئٹر اکاؤنٹ نے دنیا کی سو خوبصورت ترین خواتین اور سو خوبصورت ترین مردوں کی نامزدگی کی شروعات کا اعلان کیا۔ اس ٹوئٹر اکاؤنٹ کے مطابق لاس اینجلس کے تین معروف پلاسٹک سرجن ہر سال دنیا کے سو دلکش ترین افراد کی فہرست تیار کرتے ہیں۔ 

اس سال نامزدگیوں میں کئی بھارت فنکار بھی شامل ہیں، جن کے حق میں بھارت میں یہ ٹرینڈ بھی چل پڑا۔ 

تاہم اب پاکستانی صارفین میں بھی یہ ٹرینڈ مقبول ہوگیا ہے جہاں جمعرات کی دوپہر تک اس پر 45 ہزار سے زائد ٹوئٹس ہو چکی تھیں۔ تاہم اداکاراوں اور ماڈلز کے بجائے بہت سے پاکستانی صارفین نے فلسطینی خاتون مریم العفیفی کو دنیا کی خوبصورت ترین خواتین کی فہرست میں نامزد کیا۔

مریم کی ویڈیو گذشتہ ہفتے سوشل میڈیا پر وائرل ہوئی تھی جب انہیں شیخ جراح میں فلسطینیوں کو ان کے گھروں سے بے دخل کرنے کے خلاف ایک احتجاج میں اسرائیلی پولیس نے گرفتار کیا تھا۔

اس واقعے کی ویڈیو میں دیکھا جا سکتا ہے کہ اسرائیلی فوجی انہیں حجاب میں گھسیٹتے ہوئے حراست میں لے رہے ہیں۔ تاہم ہتھ کڑیوں میں بند مریم پھر بھی چہرے پر اطمینان لیے کیمرے کو دیکھ کر مسکرا رہی ہیں۔

اخبار ’مڈل ایسٹرن مانیٹر‘ میں شائع ہونے والی ایک خبر کے ساتھ ویڈیو میں مریم ایک اسرائیلی فوجی سے پوچھ رہی ہیں کہ کیا بے گناہ فلسطینیوں کو ان کے گھر سے بے دخل ہونے سے بچانے کی کوشش کوئی جرم ہے۔

وہ پوچھتی ہیں: ’کیا آپ بچپن سے ہی یہ کرنا چاہتے تھے؟ کیا آپ کا بچپن سے ہی خواب ظالم کا ساتھ دینا تھا؟‘

مزید پڑھ

اس سیکشن میں متعلقہ حوالہ پوائنٹس شامل ہیں (Related Nodes field)

اخبار کے مطابق بیت المقدس کی رہائشی مریم کو گرفتاری کے اگلے روز ہی رہا کر دیا گیا مگر تب تک ان کی بہادری کی داستان اور مناظر سوشل میڈیا پر وائرل ہوچکے تھے۔

غزہ پر دس روز سے جاری اسرائیلی فضائی حملوں میں پاکستانیوں نے سوشل میڈیا اور مظاہروں کے ذریعے فلسطین کے ساتھ یکجہتی کا اظہار قائم رکھا ہوا ہے۔ ایسے میں خوبصورت ترین خواتین کے ٹرینڈ میں مریم العفیفی کو بھی شامل کرنا بھی اسی سلسلے کا ایک خصہ ہے۔

صارف محمد عمیر عامر نے کہا کہ وہ مریم بہادر کو نامزد کرتے ہیں۔

عبدالرحمن اعوان کا کہنا تھا کہ مریم لاکھوں میں ایک ہیں۔

علیزے نے کہا کہ انہیں مریم کی مسکرہٹ سے پیار ہے۔

سید بہار گلانی نے مریم کو سال کی بجائے اس صدی کی سب سے خوبصورت خاتون قرار دیا۔ 

آئسے جٹ نامی صارف نے کہا کہ ہر کوئی شخت مشکل حالات میں مسکرا نہیں سکتا۔

مریم بیت المقدس کی رہائشی ہیں اور فلسطینی یوتھ آرکیسٹرا کی رکن ہیں۔

زیادہ پڑھی جانے والی ٹرینڈنگ