پاکستانی اداکارہ ماہرہ خان کی شادی کی خبر جب سے منظر عام پر آئی ہے، سوشل میڈیا پر اس کے چرچے ہیں۔ کہیں ماہرہ کے دلہا سلیم کریم کی نجی زندگی کی تفصیلات زیر بحث ہیں تو کہیں بطور دلہن ماہرہ کا انداز اور لباس۔

ان کی شادی کی تقریب کی پہلی جھلک دیکھنے کے بعد مداح یہ بھی جاننا چاہ رہے تھے کہ یہ دیو مالائی داستان جیسی تقریب آخر منعقد کہاں کی گئی۔ اس تقریب کے انتظامات سے نہ صرف جوڑے کا جمالیاتی ذوق جھلک رہا تھا بلکہ دلہا کا ماہرہ کو دلہن کے روپ میں دیکھنے کے بعد جذباتی انداز میں آبدیدہ ہونا بھی لوگوں کو اپنی جانب متوجہ کرتا رہا۔

ماہرہ کی شادی کا ایک اور پہلو جو سوشل میڈیا پر زیرِ بحث رہا، وہ یہ تھا کہ ان کا بیٹا اذلان شادی کی تقریب کی پہلی ویڈیو کلپ میں دکھائی نہیں دے رہا تھا، جس کے بعد سوشل میڈیا پر چہ مگوئیاں ہونے لگیں کہ کیا اذلان نے اپنی والدہ کی شادی کی تقریب میں شرکت نہیں کی۔

لیکن ان سب قیاس آرائیوں نے اس وقت دم توڑ دیا، جب گذشتہ روز ماہرہ نے اپنے انسٹاگرام اکاؤنٹ پر اپنی شادی کی تصاویر اور ویڈیوز شیئر کیں۔

ماہرہ خان نے شادی کی ویڈیو شیئر کرتے ہوئے ساتھ میں لکھا: ’میرا شہزادہ، سلیم۔‘

اس ویڈیو میں دیکھا جا سکتا ہے کہ دلہن بنی ماہرہ خان اپنے بیٹے اذلان کا ہاتھ تھام کر شادی کی تقریب کے مقام پر آ رہی ہیں۔ ایک اور جھلک میں نکاح کے موقعے پر بھی اذلان ماہرہ کا ہاتھ تھامے ان کے ساتھ بیٹھے ہوئے ہیں۔

ماہرہ کی شیئر کی گئی ویڈیو میں، نکاح کے بعد جب دلہا دلہن پہلی مرتبہ ایک دوسرے کو دیکھتے ہیں تو اس وقت بھی اذلان کو جذباتی انداز میں آبدیدہ ہوتے دکھایا گیا ہے۔

اداکارہ نے اپنے بیٹے کے ساتھ تقریب میں  آتے ہوئے تصاویر بھی شیئر کیں۔

سوشل میڈیا صارفین ماہرہ خان کی اپنی شادی کی تقریب میں اپنے بیٹے کے ساتھ آمد کو بہت سراہ رہے ہیں اور جذباتی انداز میں اپنے تاثرات کا اظہار کر رہے ہیں۔

سندھ کے صحرائی علاقے تھرپارکر سے تعلق رکھنے والی سینیٹر کرشنا کماری نے ماہرہ خان کی شادی شدہ زندگی کے لیے نیک خواہشات اور ان کے اپنے بیٹے اذلان کے ساتھ تقریب میں آنے پر خوشی کا اظہار کرتے ہوئے لکھا: ’دلی مبارک باد ماہرہ، خواشگوار شادی شدہ زندگی کے لیے نیک تمنائیں۔ ماہرہ اپنے بیٹے کے ساتھ شادی کی تقریب میں آئیں اور اذلان نکاح کے وقت بھی ان کے ساتھ بیٹھے رہے۔‘

بینش نامی صارف نے اذلان کے بچپن اور ماہرہ کی شادی کی تصاویر کو پوسٹ کر کے تحریر کیا: ’گود میں اٹھانے سے ہاتھ پکڑ کر شادی کے سٹیج پر آنے تک، ماں بیٹے نے ایک طویل سفر طے کیا ہے۔‘

ایکس صارف ثوبیہ نے اپنے جذبات کا اظہار ان الفاظ میں کیا: ’ماہرہ کا شادی کی تقریب میں اپنے بیٹے کے ساتھ آنا اور نکاح کے موقعے پر ان کے ساتھ بیٹھنا بہت ہی خوبصورت ہے۔‘

شہزادی نامی صارف نے ماہرہ اور ان کے بیٹے اذلان کی تصاویر کو جوڑ کر بنایا گیا ایک ویڈیو کلپ پوسٹ کیا اور اس کے ساتھ لکھا: ’آپ کا بیٹا آپ کا ہاتھ کم وقت کے لیے تھامے گا مگر وہ ساری زندگی آپ کی خواہشات کا احترام کرے گا۔‘

ماہرہ خان کی 2007 میں علی عسکری سے پہلی شادی ہوئی تھی، جو 2015 میں ختم ہو گئی تھی۔ اذلان، ماہرہ خان اور علی عسکری کے بیٹے ہیں۔