دریائے سندھ کے کنارے واقع کالا باغ پنجاب کے ضلع میانوالی کا تاریخی و قدیمی شہر ہے، جہاں واقع منزل در منزل ایک ہزار سے زائد گھروں کی بے مثال تعمیر نے یہاں آنے والے سیاحوں کو دہائیوں سے اپنے سحر میں جکڑ رکھا ہے۔
لیکن یہ بھی ایک حقیقت ہے کہ وقت کی دھول مٹی اور ماضی میں معمولی جبکہ 1976، 2010 کے غیر معمولی سیلابوں کے علاوہ دریائی نمی کی وجہ سے بالکل دریا کے عین اوپر کنارے پر واقع مکانوں کے جہاں خدوخال متاثر ہوئے، وہیں ان کے رنگ و روغن اڑنے کے علاوہ پھیکے بھی پڑ گئے، جس سے کالا باغ کا یہ حسین منظر کافی حد تک دھندلا گیا۔
دریا کے عین اوپر کنارے پر واقع مکانوں کے مکین اپنے آباؤ اجداد کے زمانے سے یہاں رہتے آرہے ہیں، جن میں سے اکثریت غریب محنت کشوں اور ان لوگوں کی ہے جو اپنے آبائی اور قدیمی متاثرہ مکانات کو وسائل نہ ہونے سے کبھی رنگ و روغن نہ کروا سکتے تھے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
اتلا پتن کالاباغ کے 55 سالہ محنت کش محمد فیروز بھی انہی لوگوں میں سے ایک ہیں، جو اپنے دو بیٹوں اور بیوی سمیت دریائے سندھ کے عین اوپر پرانے اسی آبائی مکان میں رہتے ہیں، جو خوش قسمتی سے 500 سے زائد ان مکانات میں شامل ہے، جن پر حال ہی میں ٹورازم ڈویلپمنٹ کارپوریشن آف پنجاب ( ٹی ڈی سی پی) کی جانب سے ایک منصوبے کے تحت پینٹ اور ویدر شیٹ کیا گیا ہے۔
فیروز کے مطابق اتلا پتن کے دیگر گھروں کی طرح ان کے گھر کے رنگ و روغن بھی ماضی کے سیلابوں اور دریائی نمی سے بالکل اتر چکے تھے جبکہ وسائل نہ ہونے کی وجہ سے وہ اپنے گھروں پر کبھی رنگ و روغن نہ کروا سکتے تھے۔
لہذا اس صورت حال کے پیش نظر وہ ٹی ڈی سی پی کے اس اقدام سے انتہائی خوش نظر آتے ہیں کیونکہ بقول ان کے ویدر شیٹ کے بعد ایک تو ان کے بچوں کو یہ پرانا گھر نیا نیا لگ رہا ہے، دوسرا ایک ہی قسم کا پینٹ ہونے سے یہاں امیروں اور غریبوں کے گھر ایک ہی رنگ میں رنگ چکے ہیں اور سب سے بڑھ کر یہ سہولت انہیں آسانی سے مفت میں مل گئی ہے۔
میانوالی کے ٹورازم آفیسر جلیل خٹک کے مطابق محکمہ ٹورازم پنجاب کی جانب سے سیاحوں کے لیے کالا باغ کی خوبصورتی اجاگر کرنے اور پرکشش بنانے کے لیے دو کروڑ سے زائد لاگت کے اس منصوبے کے تحت پس منظر کو سامنے رکھتے ہوئے دریائے سندھ کی جانب سے سامنے نظر آنے والے مکانات پر مشتمل ایک کلومیٹر سے زائد ایریا میں قیمتی اور معیاری ویدر شیٹ پینٹ ہلکے آسمانی اور نیوی بلیو رنگ میں کیا گیا، جس سے اب کالا باغ کی سحر انگیزی اور سیاحوں کی دلچسپی میں اضافہ ہوا ہے۔
