غزہ کے شہری دفاع کے ادارے نے جمعے کو بتایا ہے کہ جمعرات کی شب سے اب تک اسرائیلی حملوں میں فلسطینی علاقے میں مزید 50 افراد قتل کر دیے گئے۔
اس طرح بدھ سے جمعے تک تین دن میں اموات کی تعداد 180 ہو گئی ہے۔
سول ڈیفنس کے عہدیدار محمد المغیر نے اے ایف پی کو بتایا کہ ’شمالی غزہ پٹی میں شہریوں کے گھروں کو نشانہ بنانے والی اسرائیلی گولہ باری میں گذشتہ نصف شب سے لے کر آج (جمعے کی) صبح تک شہید ہونے والوں کی تعداد 50 تک پہنچ گئی ہے۔ ہماری ٹیمیں اب بھی ان علاقوں میں کام کر رہی ہیں۔‘
قبل ازیں غزہ کے شہری دفاع کے اداروں نے بین الاقوامی خبر رساں اداروں کو بتایا کہ فلسطینی علاقوں پر اسرائیل کے فضائی حملوں اور توپ خانے کی گولہ باری کے نتیجے میں بدھ اور جمعرات کو کم از کم 130 افراد قتل کر دیے گئے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
غزہ کے شہری دفاع کے ترجمان محمود بصل نے فرانسیسی خبر رساں ادارے اے ایف پی کو بتایا کہ جنوبی غزہ کے شہر خان یونس میں علی الصبح حملے کے بعد کم از کم 13 افراد کو ’ملبے سے نکالا گیا‘ جبکہ غزہ کی پٹی میں پانچ مختلف حملوں میں مزید 20 افراد جان سے گئے اور جنوبی غزہ میں توپ خانے کی گولہ باری میں ایک خاتون قتل کر دی گئیں۔
غزہ کے ریسکیو حکام نے بتایا کہ بدھ کو فلسطینی علاقے میں اسرائیلی بمباری کے نتیجے میں کم از کم 80 قتل کر دیے گئے۔
غزہ میں شہری دفاع کے اہلکار محمد المغیر نے اے ایف پی کو بتایا کہ جمعرات کو صبح سے اسرائیلی بمباری کے نتیجے میں 80 افراد جان سے جا چکے ہیں، جن میں سے 59 اموات شمالی علاقوں میں ہوئیں۔
شمالی غزہ کے جبالیہ پر حملے کے نتیجے میں اے ایف پی کی فوٹیج میں منہدم عمارتوں سے ملبے اور دھات کے ڈھیر دکھائی دے رہے ہیں۔
