پاکستان میں سعودی عرب کے سفیر نواف بن سعید المالکی نے ہفتے کو وزیراعظم شہباز شریف سے ملاقات میں سعودی ولی عہد شہزادہ محمد بن سلمان کی جانب سے نویں فیوچر انویسٹمنٹ انیشی ایٹو فورم میں شرکت کی باضابطہ دعوت دی، جسے وزیر اعظم نے قبول کر لیا۔
وزیر اعظم ہاؤس نے ایک بیان میں بتایا کہ سعودی سفیر نے 27 تا 30 اکتوبر 2025 کو ریاض میں منعقد ہونے والے فیوچر انویسٹمنٹ انیشی ایٹو فورم میں شرکت کے لیے ولی عہد شہزادہ محمد بن سلمان بن عبدالعزیز آل سعود کا دستخط شدہ دعوت نامہ پیش کیا۔
بیان کے مطابق وزیراعظم نے کانفرنس میں شرکت کی دعوت قبول کرتے ہوئے دعوت نامہ بھیجنے پر ولی عہد کا شکریہ ادا کیا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
وزیر اعظم نے خادم حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان کے لیے نیک خواہشات کا اظہار کیا۔
بیان کے مطابق ملاقات کے دوران خطے کی حالیہ پیش رفت پر بھی تبادلہ خیال کیا گیا۔
ملاقات میں نائب وزیر اعظم اور وزیر خارجہ اسحاق ڈار اور وزیر اعظم کے مشیر طارق فاطمی اور ڈاکٹر توقیر شاہ بھی موجود تھے۔
فیوچر انویسٹمنٹ انیشی ایٹو عالمی پالیسی سازوں، سرمایہ کاروں، کاروباری شخصیات اور موجدین کو یکجا کرتا ہے تاکہ سعودی عرب کے وژن 2030 کے تحت سرمایہ کاری کے رجحانات، ابھرتی ہوئی ٹیکنالوجیز اور عالمی معاشی حکمت عملیوں کا جائزہ لیا جا سکے۔
شہباز شریف شریف نے گذشتہ سال اکتوبر میں دو روزہ سرکاری دورے کے دوران ریاض میں اس تقریب میں شرکت کی تھی، جہاں انہوں نے سعودی قیادت سے ملاقات کی اور اقتصادی و سٹریٹجک تعاون پر اعلیٰ سطحی مذاکرات میں حصہ لیا۔
اس دورے کے دوران دونوں ممالک نے 2.8 ارب ڈالر مالیت کی 34 مفاہمت کی یادداشتوں پر دستخط کیے تھے، جن میں سے سات بعد میں 560 ملین ڈالر مالیت کے معاہدوں میں تبدیل ہو گئیں۔
