طالبان کی حکومت نے جمعرات کو کہا ہے کہ مشرقی افغانستان میں پاکستانی توپ خانے اور مارٹر فائر سے دو بچوں سمیت ایک ہی خاندان کے چار افراد جان سے چلے گئے ہیں۔ تاہم پاکستان کا موقف ہے کہ وہ عام شہریوں کو نشانہ نہیں بناتا اور دونوں طرف سے اموات کے دعوؤں کی آزادانہ طور پر تصدیق کرنا مشکل ہے۔

کابل میں طالبان حکام کے مطابق، دونوں فریقوں کے درمیان سرحد پار جھڑپوں کے نتیجے میں منگل سے اب تک افغانستان میں سات افراد مارے جا چکے ہیں۔

پاکستان کے وفاقی وزیر اطلاعات عطا تارڑ نے بدھ کو ایکس پر پوسٹ میں بتایا تھا کہ ’پاکستانی حملوں سے اب تک فتنہ الخوارج اور افغان طالبان کے مجموعی طور پر 641 جنگجو مارے جا چکے ہیں۔‘

اسلام آباد میں وزارت خارجہ کے ترجمان طاہر حسین اندرابی نے نامہ نگاروں کو بتایا کہ پاکستان نے ’مضبوطی کے ساتھ ٹارگٹڈ آپریشنز کیے ہیں، اس اصول کے ساتھ کہ اس بات کو یقینی بنایا جائے کہ کسی شہری کو نقصان نہ پہنچے۔‘

افغان حکومت کے ترجمان حمداللہ فطرت نے کہا کہ افغانستان میں تازہ ترین اموات جمعرات کی صبح صوبہ خوست کے گاؤں صدکو میں ہوئیں، جس میں پاکستان پر الزام لگایا گیا کہ وہ جان بوجھ کر شہریوں کے گھروں اور خانہ بدوشوں کے خیموں کو نشانہ بنا رہا ہے۔

انہوں نے ایکس پر لکھا کہ ’ایک خانہ بدوش خاندان کے چار افراد، جن میں ایک عورت اور ایک مرد، کے علاوہ دو بچے، ایک لڑکی اور ایک لڑکا شامل ہیں، مارے گئے اور تین بچے زخمی ہوئے۔‘ 

صوبائی گورنر کے دفتر نے بھی اموات کی یہی تعداد بتائی۔ منگل کو حمد اللہ فطرت نے کہا کہ سرحدی صوبے پکتیا میں پاکستانی گولہ باری سے تین شہری مارے گئے۔ محکمہ صحت کے ذرائع نے بھی اے ایف پی کو یہی بتایا۔

افغانستان میں اقوام متحدہ کے مشن (یو این اے ایم اے) نے کہا ہے کہ افغانستان میں 26 فروری سے 5 مارچ کے درمیان پاکستانی فوج کی کارروائیوں میں 24 بچوں سمیت 56 شہری مارے گئے ہیں۔

اقوام متحدہ کی پناہ گزین ایجنسی کے مطابق تقریباً 115,000 افراد اپنے گھر بار چھوڑنے پر مجبور ہوئے ہیں۔

کھلی جنگ 

اسلام آباد افغانستان پر پاکستانی طالبان (ٹی ٹی پی) کے عسکریت پسندوں کو پناہ دینے کا الزام لگاتا ہے، جنہوں نے پاکستان میں کئی مہلک حملوں کے ساتھ ساتھ دولت اسلامیہ خراسان صوبہ کی ذمہ داری قبول کی ہے۔

افغان حکام اس الزام کو مسترد کرتے ہیں۔

دونوں ممالک کے درمیان لڑائی 26 فروری کو اس وقت شدت اختیار کر گئی تھی، جب افغانستان نے سرحد کے ساتھ ایک حملہ شروع کیا، جو اس سے قبل کیے گئے ایک پاکستانی فضائی حملوں کے جواب میں ٹی ٹی پی کو نشانہ بنا رہے تھے۔

اس کے بعد پاکستان نے 27 فروری کو دارالحکومت کابل پر بمباری کرتے ہوئے طالبان حکام کے خلاف ’کھلی جنگ‘ کا اعلان کیا۔

اس کے بعد سے سرحدی علاقوں میں جھڑپوں میں اضافہ ہوا ہے۔

افغانستان کی جانب رہائشیوں نے کنڑ، پکتیا اور پکتیکا صوبوں میں ہلکے اور بھاری ہتھیاروں کی فائرنگ کی آوازیں سنیں، جب کہ کابل اور سرحد کے درمیان جلال آباد میں اے ایف پی کے ایک صحافی نے شہر پر ڈرون کی آوازیں سنی۔

جلال آباد سے 50 کلومیٹر کے فاصلے پر قریب ترین سرحدی کراسنگ پر بھی جھڑپوں کی اطلاع ملی۔

پاکستان کے سرحدی علاقوں میں بھی شدید گولہ باری کی اطلاعات ہیں لیکن ابھی تک کسی جانی نقصان کی اطلاع نہیں ہے۔

پشاور کے شمال مغربی شہر میں ایک پاکستانی سینیئر سکیورٹی افسر نے اے ایف پی کو بتایا: ’گذشتہ رات طورخم میں پاک افغان سرحد پر افغان جانب سے شدید گولہ باری کی گئی۔‘

افسر نے نام ظاہر نہ کرنے کی شرط پر مزید کہا، ’پاکستان نے بھی سخت جوابی کارروائی کا جواب دیا۔‘