آصف علی زرداری دوسری مرتبہ صدر پاکستان منتخب

9 مارچ، 5 بج کر 40 منٹ

صدارتی الیکشن، پہلی بار ووٹوں کی خرید و فروخت نہیں ہوئی: اچکزئی

سنی اتحاد کونسل کے صدارتی امیدوار محمود خان اچکزئی نے کہا ہے کہ آج الیکشن اچھے ماحول میں ہوا اور پہلی بار نہ کوئی ووٹ فروخت کیا گیا نہ خریدا گیا۔

پارلیمنٹ ہاؤس کے باہر میڈیا سے بات چیت میں ان کا کہنا تھا کہ بعض لوگ سمجھتے ہیں کہ پاکستان میں سب کچھ بیچا اور خریدا جا سکتا ہے، لیکن بعض لوگوں کا خیال ہے کہ ایسا نہیں اور وہ ان لوگوں میں شامل ہیں۔

’یہ بات خوش آئند ہے کہ خریدوفروخت کا عمل نہیں ہوا۔ یہ نئے دور کا آغاز ہے۔‘

انہوں نے مزید کہا کہ خیبرپختونخوا کے تمام ارکان نے انہیں ووٹ دیا۔ ان کا کہنا تھا کہ وہ صدارتی امیدوار نامزد کرنے پر پاکستان تحریک انصاف کے شکرگزار ہیں۔

ان کا مزید کہنا تھا کہ ملک کے سیاسی ماحول میں گرمی ہے لہٰذا نوازشریف اپنے پارٹی رہنماؤں کو سیاسی گرمی کو قابو میں رکھنے کی ہدایت کریں۔

اچکزئی کے مطابق: ’ہم چھوٹے اور ہمارے مسائل بڑے ہیں۔ چھوٹی چھوٹی غلطیاں سب کچھ تباہ کر دیں گی۔ ہمیں ملک کی خاطر ایک ساتھ بیٹھ کرمسائل کو حل کرنا ہو گا۔‘

9 مارچ، 5 بج کر 30 منٹ

زرداری سندھ میں باآسانی جیت گئے

پی پی پی کے شریک چیئرمین آصف علی زرداری سندھ اسمبلی میں بھی کامیاب رہے۔ یہاں انہیں 151 ووٹ پڑے جبکہ محمود خان اچکزئی کو صرف نو ووٹ ملے۔

الیکٹورل ووٹوں کی تقسیم کچھ یوں رہی۔ زرادری کو 58 جبکہ اچکزئی کو تین ووٹ ملے۔

9 مارچ، 5 بج کر 40 منٹ

صدارتی الیکشن: بلوچستان میں زرداری کا کلین سوئپ

اتحادی حکومت کے صدارتی امیدوار آصف علی زرداری بلوچستان اسمبلی میں 47 ووٹ لے کر جیت گئے۔

صوبائی اسمبلی میں سنی اتحاد کونسل کے امیدوار محمود خان اچکزئی کو کوئی ووٹ نہیں ملا۔ آج کے انتخاب میں 15 ارکان اسمبلی غیر حاضر رہے۔

9 مارچ، 5 بج کر 20 منٹ

آصف علی زرداری پاکستان کے 14ویں صدر منتخب

حکمران اتحاد کے آصف علی زرداری نے پارلیمنٹ (قومی اسمبلی اور سینیٹ) سے 255 ووٹ لیے جبکہ ان کے مخالف سنی اتحاد کونسل کے امیدوار محمود خان اچکزئی کو 119 ووٹ ملے۔

زرداری کو ملنے والے الیکٹورل ووٹوں کی تعداد 411 رہی جبکہ اچکزئی کو 181 الیکٹورل ووٹ ملے۔

9 مارچ، 5 بج کر 15 منٹ

خیبر پخونخوا سے صدارتی امیدوار محمود اچکزئی کامیاب

خیبر پختونخوا اسمبلی میں ہونے والے صدارتی انتخاب میں سنی اتحاد کونسل کے امیدوار محمود خان اچکزئی 91 ووٹ لے کر کامیاب ہو گئے۔

پریذائڈنگ افسر جسٹس ابراہیم خان کے مطابق اچکزئی کے حریف آصف علی زرداری کو 17 ووٹ ملے۔ انتخابی عمل میں صوبائی اسمبلی کے کل 109 اراکین نے ووٹ کاسٹ کیا لیکن ایک ووٹ مسترد ہو گیا۔

صدراتی الیکشن کے گنتی کے فارمولے کے مطابق زرداری کو 8 الیکٹورل ووٹ جب کہ محمود خان اچکزئی کو 41 الیکٹورل ووٹ ملے۔

9 مارچ، 5 بج کر 00 منٹ

پنجاب اسمبلی: حکمران اتحاد کے زرداری بھاری اکثریت سے کامیاب

حکمران اتحاد کے صدارتی امیدوار آصف علی زرداری پنجاب اسمبلی میں بھاری اکثریت سے جیت گئے۔ انہوں نے پنجاب اسمبلی میں 246 الیکٹورل ووٹ حاصل کیے جبکہ ان کے مخالف سنی اتحاد کونسل کے صدارتی امیدوار محمود خان اچکزئی 100 ووٹ حاصل کر سکے۔

پنجاب اسمبلی میں کل 353 ارکان میں سے 352 نے اپنا حق رائے دہی استعمال کیا۔ الیکٹورل ووٹوں کے حساب زرداری کو 43 جبکہ اچکزئی کو 18 ووٹ ملے۔

پنجاب اسمبلی میں پریزائیڈنگ آفیسر نثار درانی نے صدارتی الیکشن کے نتائج کا اعلان کرتے ہوئے بتایا کل چھ ووٹ مسترد ہوئے۔

تحریک لبیک پاکستان نے پنجاب اسمبلی میں صدارتی الیکشن میں ووٹنگ میں حصہ نہیں لیا۔ نتائج کے اعلان پر پیپلزپارٹی کے ارکان اسمبلی نے خوشی میں نعرے لگائے۔

9 مارچ، 4 بج کر 10 منٹ

صدارتی الیکشن: پولنگ ختم، ووٹوں کی گنتی جاری

پاکستان میں صدر مملکت کے عہدے کے لیے قومی اسمبلی، سینیٹ اور چاروں صوبائی اسمبلیوں میں چار بجے پولنگ کا اختتام ہو گیا، جس کے بعد ووٹوں کی گنتی جاری ہے۔

صدارتی الیکشن آصف علی زرداری اور محمود خان اچکزئی مدمقابل ہیں۔

9 مارچ: دن 1 بج کر 10 منٹ

پنجاب اسمبلی: مسلم لیگ ن نے سنی اتحاد کونسل کی رکن کا ووٹ چیلینج کر دیا

پنجاب اسمبلی میں صدارتی انتخاب کے دوران مبینہ طور پر دکھا کر ووٹ ڈالنے پر مسلم لیگ ن نے سنی اتحاد کونسل کی رکن اسمبلی سونیا علی کا ووٹ کا چیلینج کر دیا۔

مسلم لیگ ن کے پولنگ ایجنٹ طاہر خلیل سندھو کی جانب الیکشن کمیشن کے پریزائیڈنگ آفیسرز کو ووٹ منسوخ کرنے کی تحریری درخواست دے دی گئی۔

WhatsApp Image 2024-03-09 at 1.04.36 PM.jpeg

9 مارچ: دن 1 بج کر 00 منٹ

صدارتی انتخاب: محمود خان اچکزئی نے بھی ووٹ کاسٹ کر دیا

قومی اسمبلی میں صدارتی انتخاب کی پولنگ کے دوران سنی اتحاد کونسل کے امیدوار محمود خان اچکزئی نے بھی ووٹ کاسٹ کر دیا۔

نو مارچ، 2024 کی اس تصویر میں سنی اتحاد کونسل کے امیدوار محمود خان اچکزئی قومی اسمبلی پہنچتے ہوئے(اے ایف پی)

9 مارچ: دن 12 بج کر 30 منٹ

صدارتی انتخاب: وزیراعظم شہباز شریف نے بھی اپنا ووٹ کاسٹ کر دیا

(تصویر: حکومت پاکستان ایکس اکاؤنٹ)

وزیراعظم پاکستان شہباز شریف نے صدارتی انتخاب کے لیے پولنگ کے دوران اپنا ووٹ کاسٹ کر دیا۔

9 مارچ: دن 12 بج کر 20 منٹ

صدارتی انتخاب: خیبرپختونخوا اسمبلی میں 118 اراکین ووٹ کاسٹ کریں گے

خیبر پختونخوا اسمبلی میں صدر کے انتخاب کے لیے رائے دہی کا عمل جاری ہے جس میں 118 اراکین اسمبلی ووٹ دینے کے اہل ہیں۔

خیبر پختونخوا اسمبلی میں سنی ستحاد کونسل کے نامز صدارتی امیدوار محمون خان اچکزئی کے پولنگ ایجنٹ سنی اتحاد کونسل کے سید فخر جہان جبکہ امیدوار آصف علی زرداری کے پولنگ ایجنٹ پاکستان پیپلز پارٹی کے رکن صوبائی اسمبلی احمد کریم کنڈی ہے۔

نامہ نگار اظہار اللہ کے مطابق خیبر پختونخوا اسمبلی میں صدارتی انتخابات کے ووٹوں کے گنتی کے فارمولے کے مطابق کل ایکٹورل ووٹوں کی تعداد 53 ہیں۔

خیبر پختونخوا اسمبلی میں سنی اتحاد کونسل کے اراکین کی اکثریت ہے اور مجموعی طور پر 91 آزاد اراکین منتخب ہوئے تھے۔

اسی حساب سے خیبر پختونخوا اسمبلی میں ان اراکین کے الیکٹورل ووٹ 91 بنتے ہیں اور اگر جمیعت علمائے اسلام کے اراکین نے ووٹ کا استعمال نہیں کیا تو خیبر پختونخوا اسمبلی میں ممکنہ طور پر آصف زرداری کو آٹھ الیکٹورل ووٹس جبکہ محمود خان اچکزئی کو 41 ووٹ ملنے کی توقع ہے۔

9 مارچ: دن 12 بج کر 10 منٹ

صدارتی انتخاب: بلوچستان میں 62 اراکین ووٹ کاسٹ کریں گے

بلوچستان اسمبلی میں بھی 14 ویں صدارتی انتخاب کے لیے پولنگ جاری ہے۔ پہلا ووٹ پیپلز پارٹی رکن علی مدد جتک نے کاسٹ کیا۔

صحافی اعظم الفت کے مطابق صدارتی انتخاب میں بلوچستان اسمبلی کے 65 میں سے 62 ارکان ووٹ کاسٹ کرسکیں گے۔

 پریزائیڈنگ آفیسر چیف جسٹس بلوچستان ہائی کورٹ نعیم اختر افغان کی نگرانی میں ووٹنگ شام چار بجے تک جاری رہے گی۔

بی این پی عوامی کے سربراہ میر اسد بلوچ نے صدارتی انتخاب سے بائیکاٹ کا اعلان کیا ہے۔

9 مارچ: صبح 11 بج کر 45 منٹ

مراد علی شاہ، ناصر حسین شاہ اور ضیالنجار آصف علی زرداری کے پولنگ ایجنٹ

سندھ اسمبلی میں صدارتی انتخاب کے لیے مراد علی شاہ، ضیا لنجار اور ناصر حسین شاہ صدارتی امیدوار آصف زرداری کے پولنگ ایجنٹ ہیں۔

دوسری جانب جماعت اسلامی نے سندھ اسمبلی میں صدارتی انتخاب کے لیے ووٹنگ کا حصہ نہ بننے کا اعلان کیا ہے۔

سندھ اسمبلی میں صدارتی الیکٹورل ووٹوں کی تعداد 65 ہے(تصویر: انڈپینڈنٹ اردو)

اسمبلی کے باہر مقامی میڈیا سے گفتگو کرتے ہوئے رکن جماعت اسلامی محمد فاروق نے کہا ہم اس صدارتی انتخاب کا حصہ نہیں ہیں۔ اپنی پارٹی قیادت کی ہدایت کے مطابق ووٹ نہیں ڈال رہا۔ میں الیکشن کے لیے نہیں بلکہ  اپنے ذاتی کام کے لیے سندھ اسمبلی آیا تھا۔

9 مارچ: صبح 11 بج کر 30 منٹ

صدارتی انتخاب: سندھ اسمبلی میں پولنگ جاری

صدارتی انتخاب کے لیے سندھ اسمبلی میں صبح 10 سے پولنگ کا آغاز ہو گیا جو شام چار بجے تک جاری رہے گا۔

نامہ نگار امر گرڑو کے مطابق سندھ اسمبلی کا ایوان مجموعی طور پر 168 ارکان پر مشتمل ہے۔ جن میں صوبے کی حکمران جماعت پاکستان پیپلز پارٹی کے پاس 116 ارکان جب کہ متحدہ قومی موومنٹ پاکستان کے 36 ارکان ہے ۔

سندھ اسمبلی میں صدارتی الیکٹورل ووٹوں کی تعداد 65 ہے۔ پی پی پی اور ایم کیو ایم ارکان صدارتی امیدوار آصف زرداری کو ووٹ دیں گے۔ آصف علی زرداری کو سندھ اسمبلی سے صدارتی انتخاب کے لیے 61 ووٹ ملنے کا امکان ہے۔

9 مارچ: صبح 11 بج کر 00 منٹ

صدارتی الیکشن: ووٹنگ کا عمل جاری، ایوان میں کیا ہو رہا ہے؟

9 مارچ: صبح 10 بج کر 55 منٹ