ورلڈ ایتھلیٹکس اورجاپان ایسوسی ایشن آف ایتھلیٹکس فیڈریشنز کے زیر اہتمام جاپان میں جاری ورلڈ ایتھلیٹکس چیمپین شپ کے 20ویں ایڈیشن میں جیولن تھرو مقابلے میں پاکستانی اتھلیٹ ارشد ندیم نے فائنل کے لیے کوالیفائی کر لیا ہے۔
ورلڈ ایتھلیٹکس چیمپین شپ کی ویب سائٹ پر جاری کیے جانے والے نتائج کے مطابق پاکستانی اتھلیٹ ارشد ندیم نے 85.28 میٹرز کی تھرو کی جبکہ انڈیا کے نیرج چوپڑا 84.85 میٹرز کی تھرو کر سکے۔
ارشد ندیم اس چیمپیئن شپ میں حصہ لینے والے واحد پاکستانی ایتھلیٹ ہیں اور انہوں نے کوالیفائر بی میں سب سے پہلی تھرو کی تھی۔
پاکستانی ایتھلیٹ ارشد ندیم نے پہلی بار میں 76.9 میٹرز کی تھرو کی، دوسری بار میں 74.17 میٹر کی تھرو البتہ تیسری بار میں ارشد ندیم نے 85.28 میٹر کی تھرو کی اور فائنل کے لیے کوالی فائی کرلیا جہاں ان کا مقبلہ دیگر اتھلیٹس سمیت انڈیا کے نیرج چوپڑا سے بھی ہوگا۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
جیولن تھرو کوالیفائنگ راؤنڈ کے لیے پاکستان کے ارشد ندیم اور انڈیا کے نیرج چوپڑا کو علیحدہ گروپس میں شامل کیا گیا تھا۔
ارشد ندیم کو گروپ بی میں رکھا گیا تھا، کوالیفائنگ راؤنڈ میں 84.50 میٹر لمبی تھرو کرنے والے کو براہ راست فائنل میں کوالیفائی کرنے کی سہولت تھی۔
مجموعی طور پر 12 بہترین تھرو کرنے والے کھلاڑی فائنل کھیل رہےہیں۔
اولمپک گولڈ میڈلسٹ ارشد ندیم نے ورلڈ اتھلیٹکس چیمپین شپ میں شاندار کارکردگی کے لیے فینز سے دعاؤں کی درخواست کی ہے۔
ارشد ندیم نے اپنے ایک بیان میں کہا ہے کہ آپ سب کو معلوم ہے کہ میں ٹوکیو میں ورلڈ اتھلیٹکس چیمپئن شپ کے لیے آیا ہوں، کل بدھ کو میں ایونٹ کا کوالیفائنگ راؤنڈ کھیلوں گا۔انہوں نے کہا کہ میرے لیے دعا کریں کہ اچھا پرفارم کر کے فائنل کے لیے کوالیفائی کرپائوں ۔ ورلڈ اتھلیٹکس چیمپئن شپ کا فائنل 18 ستمبر کو ہوگا۔
پاکستان کی مختلف ٹیلی کام کمپنیوں نے ارشد ندیم کا یہ پیغام اپنے صارفین کو کال کی صورت میں سنایا تھا۔
