پاکستان کرکٹ بورڈ (پی سی بی) کا کہنا ہے کہ افغانستان کے سہ فریقی سیریز سے باہر ہونے کے بعد زمبابوے کو اس سیریز کا حصہ بننے کی دعوت دی گئی جو اس نے قبول کر لی ہے۔

پی سی بی کی جانب سے ہفتے کو جاری بیان کے مطابق افغانستان کی جگہ اب زمبابوے سہ فریقی سیریز کھیلے گا جس میں اس کا مقابلہ میزبان پاکستان اور سری لنکا سے ہو گا۔

یہ سہ فریقی سیریز 17 سے 29 نومبر تک پاکستان میں کھیلی جائے گی جس میں ابتدائی طور پر پاکستان، سری لنکا اور افغانستان شامل تھے۔

اس سے قبل سرکاری ویب سائٹ پاکستان ٹی وی ڈیجیٹل سے بات کرتے ہوئے پاکستان کرکٹ بورڈ کے ترجمان عامر میر نے سہ فریقی سیریز سے افغانستان کے نکلنے کی تصدیق کی تھی۔

افغانستان کرکٹ بورڈ (اے سی بی) نے جمعے کو اپنے ایک بیان میں کہا تھا کہ ’ایک پاکستانی حملے میں تین مقامی افغان کرکٹر مارے گئے، جس کے بعد افغانستان اگلے ماہ پاکستان اور سری لنکا کے ساتھ ہونے والی سہ فریقی سیریز سے الگ ہوا رہا ہے۔‘

پاکستان کے سکیورٹی حکام نے جمعے کی شب ایک بیان میں بتایا تھا کہ افغان سرزمین سے پاکستان کے اندر متعدد حملوں کے بعد پاکستانی فوج نے جوابی کارروائی میں قبائلی اضلاع شمالی اور جنوبی وزیرستان سے متصل افغانستان کے سرحدی علاقوں میں عسکریت پسند تنظیم حافظ گل بہادر گروپ کے ٹھکانوں پر فضائی حملے کیے، جس میں گل بہادر گروپ کی قیادت سمیت 70 سے زائد عسکریت پسند مارے گئے۔

اس کے بعد افغانستان کرکٹ بورڈ نے ایکس پر اپنے ایک بیان میں کہا تھا کہ ’پاکستانی حملے میں مارے جانے والوں میں تین مقامی کرکٹرز بھی شامل تھے۔‘

بورڈ کا کہنا تھا کہ وہ اسے ’افغانستان کی کھیل برادری، اس کے کھلاڑیوں اور کرکٹ خاندان کے لیے ایک بڑا نقصان‘ سمجھتا ہے اور لواحقین کے لیے ’گہرے تعزیتی جذبات اور یکجہتی‘ کا اظہار کرتا ہے۔

افغان کرکٹ بورڈ کا مزید کہنا تھا کہ اس نے آئندہ ماہ کی سہ ملکی سیریز سے دستبردار ہونے کا فیصلہ ’متاثرین کے احترام میں‘ کیا ہے۔

پاکستان کرکٹ بورڈ کے ترجمان نے افغانستان کے اس فیصلے کی تصدیق کرتے ہوئے کہا تھا کہ سیریز تو پلان کے مطابق ہو گی۔

پی سی بی کا کہنا ہے کہ یہ سیریز پاکستان، سری لنکا اور زمبابوے کے لیے آئندہ سال انڈیا اور سری لنکا میں ہونے والے ٹی ٹوینٹی ورلڈ کپ کی تیاریوں کے لیے بہترین موقع ہو گا۔