راولپنڈی میں پیر کو جنوبی افریقہ کے خلاف دوسرے اور آخری ٹیسٹ کے پہلے روز پاکستان نے پانچ وکٹوں پر 259 رنز بنا لیے۔
اس سے قبل شان مسعود نے ٹاس جیت کر بیٹنگ کا فیصلہ کیا۔
پاکستان کی بیٹنگ کی شروعات اوپنرز عبداللہ شفیق اور امام الحق نے کی۔
امام الحق صرف 17 رنز بنا سکے اور سائمن ہارمر کی گیند پر بولڈ ہو گئے۔
اس کے بعد عبداللہ شفیق نے بہتر کھیل کا مظاہرہ کرتے ہوئے 57 رنز کی اننگز کھیلی۔ عبداللہ شفیق کے آؤٹ ہونے پر بابر اعظم کریز پر آئے تو ایک بار پھر لمبی اننگز کھیلنے میں ناکام رہے اور 16 رنز بنا کر کیشؤ مہاراج کا شکار بنے۔
کپتان شان مسعود نے شاندار 87 رنز بنائے۔ ان کے بعد آنے والے محمد رضوان نے 19 رنز بنا کر آؤٹ ہوئے۔
پہلے دن کے اختتام پر سعود شکیل 42 اور آغا سلمان 10 رنز کے ساتھ کریز پر موجود تھے۔
جنوبی افریقہ کی جانب سے کیشؤ مہاراج اور سائمن ہارمر نے دو دو وکٹیں حاصل کیں جب کہ کاگیسو ربادا نے ایک کھلاڑی کو آؤٹ کیا۔
لاہور میں پہلے ٹیسٹ کو 93 رنز سے جیت کر دو میچز کی سیریز میں برتری حاصل کرنے والی پاکستانی ٹیم نے اس میچ میں تین سپنرز کے ساتھ میدان پر اتری ہے۔
میزبان ٹیم نے 38 سالہ سپن بولر آصف آفریدی کو ٹیسٹ ڈیبیو کا موقع دیا جبکہ نعمان علی اور ساجد خان بھی ٹیم میں شامل ہیں۔ فاسٹ باؤلر حسن علی کو باہر کیا گیا ہے۔
جنوبی افریقہ نے تجربہ کار سپنر کیشؤ مہاراج اور فاسٹ بولر مارکو جانسن کو ٹیم میں شامل کیا جبکہ پرینیلن سبریئن اور ویان مولڈر کو ٹیم میں جگہ نہیں ملی۔
کیشؤ مہاراج لاہور ٹیسٹ کے لیے دستیاب نہیں تھے کیونکہ وہ ٹانگ کی انجری سے صحت یاب ہو رہے ہیں۔ انہوں نے آف سپنر پرینیلن سبریئن کی جگہ ٹیم میں واپسی کی، جو ورلڈ ٹیسٹ چیمپیئنز کی جانب سے کی گئی، دو تبدیلیوں میں سے ایک تھی۔
سیمنگ آل راؤنڈر مارکو جانسن نے ویان مولڈر کی جگہ ٹیم میں واپسی کی، جو پہلے ٹیسٹ میں صرف دو اوورز ہی بول کر سکے تھے اور دونوں اننگز میں سپنرز کے خلاف مشکل کا سامنا کرتے ہوئے نمبر 3 پر بیٹنگ کرتے رہے۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
ٹاس کے بعد گفتگو کرتے ہوئے جنوبی افریقہ کے کپتان ایڈن مارکرم نے کہا کہ ان کی ٹیم نے پہلے ٹیسٹ میں شکست سے کچھ سبق سیکھے ہیں اور یہی وجہ ہے کہ انہوں نے ٹیم میں دو تبدیلیاں کیں ہیں۔
چونکہ راولپنڈی کرکٹ سٹیڈیم سپنرز کے لیے موزوں لگ رہا ہے، پاکستان نے تیسرے سپیشلسٹ سلو بولر کو ٹیم میں شامل کیا۔
پاکستان کے کپتان شان مسعود نے کہا کہ خشک اور سست وکٹ نے انہیں ٹاس جیت کر پہلے بلے بازی کرنے کی ترغیب دی۔
شان مسعود نے کہا: ’پنڈٰی کی وکٹ کچھ خشک ہے، اس لیے پہلے بیٹنگ کرنا بہتر ہے۔‘
ٹیمیں:
پاکستان: عبد اللہ شفیق، امام الحق، شان مسعود (کپتان)، بابراعظم، سعود شکیل، محمد رضوان، سلمان علی آغا، نعمان علی، ساجد خان، شاہین شاہ آفریدی، آصف آفریدی
جنوبی افریقہ: ایڈن مارکرم (کپتان)، رائین ریکیلٹن، ڈیوالڈ بریوس، ٹونی ڈی زورزی، ٹرسٹن سٹبز، کائل ویریئن، مارکو جانسن، کیشؤ مہاراج، سینوران موتھوسامی، سائمن ہارمر، کاگیسو ربادا
