پاکستان کے وفاقی وزیر اطلاعات و نشریات عطا اللہ تارڑ نے جمعے کو زور دے کر کہا کہ کالعدم تحریک طالبان پاکستان (ٹی ٹی پی) ریاست کی دشمن ہے، جس کا خاتمہ کیا جائے گا۔
اسلام آباد میں پریس کانفرنس سے خطاب کرتے ہوئے وزیر اطلاعات نے کہا کہ ریاست اس کالعدم گروہ کے خلاف کارروائی کرے گی اور اسے مسلح افواج، سکیورٹی اداروں اور نوجوانوں پر مکمل اعتماد ہے۔
انہوں نے کہا ’بطور وزیر اطلاعات میں واضح طور پر کہتا ہوں کہ ٹی ٹی پی پاکستان کی دشمن ہے۔ اپنی آخری سانس تک اور خون کے آخری قطرے تک، ہم اسے ختم کریں گے۔
’میں پوری ثابت قدمی سے یہ کہہ رہا ہوں، ہم اسے ختم کر کے رہیں گے۔‘
انہوں نے کہا کہ ریاست کی طاقت کا سرچشمہ اس کے مسلح اداروں پر ایمان اور اعتماد ہے اور یہ کہ سکیورٹی اہلکار روز گھروں سے نکلتے ہیں، اس یقین کے بغیر کہ وہ واپس لوٹیں گے۔
انہوں نے کہا ’ہم ان کے ساتھ کھڑے ہیں اور ہم کامیاب ہوں گے۔‘
عطا تارڑ نے معیشت پر کہا کہ پاکستان نے دیوالیے کے خطرے سے نکل کر دوبارہ ابھرتی ہوئی معیشتوں کی صف میں جگہ بنا لی ہے۔
’ہم کامیابی سے دیوالیے کے خطرے سے نکل کر ابھرتی ہوئی معیشتوں میں شامل ہو گئے ہیں۔‘
وزیر اطلاعات کے مطابق پاکستان سٹاک ایکسچینج روز ریکارڈز توڑ رہی ہے، جس کا سبب کاروباری برادری، تاجروں اور صنعت کاروں کا حکومتی پالیسیوں پر اعتماد ہے۔
انہوں نے کہا ’ہماری سٹاک ایکسچینج ہر روز نئے ریکارڈ بنا رہی ہے۔ کاروباری طبقہ حکومت کی اصلاحات اور پالیسیوں پر اعتماد رکھتا ہے۔‘
انہوں نے کہا کہ سرمایہ کار اس بات کو تسلیم کر رہے ہیں کہ ملک میں گہرے ساختیاتی اصلاحات جاری ہیں۔ ’وزیر اعظم شہباز شریف نے ملک کے مفاد میں مشکل فیصلے کیے، جن کے مثبت نتائج سامنے آ رہے ہیں۔‘
’وہ جانتے ہیں وزیر اعظم نے ملک کی بہتری کے لیے سخت فیصلے کیے اور اب ان کے ثمرات ظاہر ہو رہے ہیں۔‘
انہوں نے بتایا کہ حالیہ اعداد و شمار کے مطابق دسمبر میں بیرون ملک مقیم پاکستانیوں نے 3.6 ارب ڈالر بھیجے، جو سالانہ بنیاد پر 17 فیصد اور ماہانہ بنیاد پر 13 فیصد اضافہ ہے۔
’میں اپنے اوورسیز پاکستانیوں کا شکریہ ادا کرنا چاہتا ہوں۔ وہ ناصرف پیسہ بھیج رہے ہیں بلکہ ریکارڈ بھی قائم کر رہے ہیں۔‘
انہوں نے کہا کہ حکومت غیر ملکی سرمایہ کاری پر کام کر رہی ہے اور پاکستان کی دیگر ممالک کے ساتھ تجارت بڑھ رہی ہے۔
انہوں نے بتایا کہ سعودی عرب کے ساتھ دفاعی اور معاشی فریم ورک، ملائیشیا اور متحدہ عرب امارات کے ساتھ معاہدے اور چین کے وزیر خارجہ وانگ یی کی جانب سے نائب وزیراعظم اسحاق ڈار کا پرتپاک استقبال—یہ سب حکومت کی بڑی کامیابیاں ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
عطا اللہ تارڑ نے کہا کہ عالمی برادری پاکستان کو سنجیدگی سے دیکھ رہی ہے، جس کا سبب وزیر اعظم شہباز شریف اور فیلڈ مارشل عاصم منیر کی مضبوط قیادت ہے۔
’ہماری مضبوط قیادت کی وجہ سے دنیا پاکستان کو سنجیدگی سے لے رہی ہے۔‘
پی ٹی آئی سے مذاکرات
وزیر اطلاعات نے کہا کہ مختلف گروہوں میں تقسیم پاکستان تحریک انصاف حکومت سے مذاکرات میں سنجیدہ نہیں۔
انہوں نے کہا کہ بات چیت ہونی چاہیے لیکن پی ٹی آئی کو پہلے ریاستی اداروں کے خلاف اپنی منفی روش ترک کرنا ہو گی۔
انہوں نے افسوس کا اظہار کرتے ہوئے کہا کہ پی ٹی آئی نہ عوام کی فلاح کی خواہش مند ہے اور نہ ہی ملکی سیاسی درجہ حرارت کم کرنا چاہتی ہے۔
انہوں نے کہا کہ خیبر پختونخوا میں پی ٹی آئی کی حکومت کے پاس کسی بھی شعبے، چاہے تعلیم ہو یا صحت، میں اصلاحات کا کوئی روڈ میپ نہیں ہے اور وہاں گورننس کا نظام مکمل طور پر ناکام ہو چکا ہے۔
وزیر اطلاعات نے کہا کہ پاکستان دہشت گردی کے خلاف جنگ جیتے گا اور دہشت گرد سخت اہداف کو نشانہ بنانے کی صلاحیت نہیں رکھتے۔
انہوں نے کہا کہ 2025 ہر لحاظ سے پاکستان کے لیے کامیابیوں کا سال رہا، چاہے وہ فوجی طاقت ہو یا معاشی بحالی۔
