خیبر پختونخوا میں صوبائی ڈیزاسٹر مینیجمنٹ اتھارٹی (پی ڈی ایم اے) نے اتوار کو ایک ہدایت نامے میں ضلعی انتظامیہ اور محکمہ سیاحت کو کہا ہے کہ وہ اس ہفتے صوبے میں متوقع شدید بارشوں اور برف باری کے پیش نظر حفاظتی انتظامات کو یقینی بنائیں۔

پاکستان کے محکمہ موسمیات نے اس ہفتے خبردار کیا ہے کہ مغربی ہواؤں کا ایک سلسلہ 25 جنوری سے ملک کے مغربی علاقوں میں داخل ہو گا اور 26 جنوری کو شمالی علاقوں کو اپنی لپیٹ میں لے لے گا۔

اس نظام کے باعث منگل تک ان علاقوں میں شدید بارش اور برف باری کا امکان ہے۔

جمعرات کی رات خیبر اور سوات کے شمال مغربی اضلاع کی انتظامیہ نے ریسکیو آپریشن کیے اور مختلف مقامات پر گاڑیاں پھنس گئیں۔

سوشل میڈیا پر جاری فوٹیج میں ریسکیو اہلکاروں کو دکھایا گیا جو تیرہ روڈ، ملم جبہ روڈ اور نتھیا گلی میں بھاری برف باری کے باعث پھنسے لوگوں کی مدد کر رہے تھے۔

اس کے علاوہ ہوٹلوں اور گیسٹ ہاؤسز کو ہدایت کی گئی ہے کہ وہ سیاحوں کو ممکنہ خطرات سے آگاہ کریں اور برف باری اور لینڈ سلائیڈنگ سے متعلق بروقت انتباہ جاری کریں۔

پی ڈی ایم اے نے خبردار کیا کہ 25 سے 27 جنوری کے دوران بارش اور برف باری سے مختلف علاقوں میں سڑکیں بند ہونے، پھسلن، لینڈ سلائیڈنگ، برفانی تودے گرنے اور اچانک سیلاب کا خطرہ ہے، جس سے عام عوام اور سیاح متاثر ہوسکتے ہیں۔

اتھارٹی نے لوگوں کو غیر ضروری سفر سے گریز کی ہدایت کرتے ہوئے سیاحوں کو مشورہ دیا کہ وہ موجودہ برف باری اور شدید بارشوں کے دوران بالائی اور دور دراز علاقوں کا رخ نہ کریں۔

ڈیزاسٹر مینجمنٹ اتھارٹی نے شہریوں کو یقین دلایا کہ وہ صورتحال پر قریبی نظر رکھے ہوئے ہے اور کسی بھی ہنگامی صورتِ حال میں شہری پی ڈی ایم اے کی ہیلپ لائن 1700 پر رابطہ کریں۔