کراچی میں جمعرات کو ہونے والی  442 ملی میٹر طوفانی بارش نے  شہر کو 'تالاب' میں بدلتے ہوئے پچھلے 53 سال کا ریکارڈ توڑ دیا جب 1967 میں 429 ملی میٹر بارش ریکارڈ کی گئی تھی۔ 

فیس بک پر ایک گروپ 'حالات اپڈیٹس' میں اس گروپ کے ممبران نے پل پل کی خبر دینے کا سلسلہ جاری رکھا اور متعدد لوگوں نے مدد فراہم کرنے کے لیے اپنے پوسٹس بھی لگائے۔ ان ہی ممبران میں سے ایک خاتون اوکاشا خالد نے ضرورت مند لوگوں کے موبائل میں بیلنس لوڈ کروانے کی پیشکش کی تاکہ لوگ اپنی مدد کے لیے یا اپنے گھروالوں سے رابطہ کر سکیں۔ ان کا کہنا تھا کہ 'اگر کسی کو ایمرجنسی میں موبائل بیلنس ہی ضرورت ہے تو مجھ سے رابطہ کریں۔' 

 گلستان جوہر میں رہنے والی عصرا جمشید خان نے، جو ریڈیو پاکستان کی ملازمہ بھی ہیں، اپنے فیس بک پوسٹ میں آئی آئی چندریگر روڈ پر پھنسے لوگوں کو ریسکیو کرنے پیشکش کی۔ 'میرے شوہر کے پاس ویگو گاڑی ہے اور انہوں نے کافی لوگوں کو ناصرف ریسکیو کیا ہے بلکہ کھانے کا سامان بھی پہنچایا۔ میرے شوہر اس وقت آئی آئی چندریگر روڈ پر موجود ہیں اور ایچ بی ایل بینک میں پھنسے لوگوں کی مدد کر رہے ہیں، اگر آپ کو کسی قسم کی مدد درکار ہے تو مجھ سے رابطہ کریں۔'