قطر میں جاری فیفا ورلڈ کپ 2022 میں سعودی عرب نے اپ سیٹ کرتے ہوئے دو بار کی چیمپیئن ارجنٹائن کو شکست دے دی ہے۔

سعودی عرب نے منگل کو کھیلے جانے والے اپنے پہلے گروپ میچ میں ارجنٹائن کو دو کے مقابلے میں ایک گول سے شکست دی۔

اس فتح کی خوشی میں خادم حرمین شریفین شاہ سلمان بن عبدالعزیز کے حکم پر بدھ  23 نومبر کو مملکت بھر میں عام تعطیل کا اعلان کیا گیا ہے۔

 سعودی خبررساں ادارے ایس پی اے کے مطابق شاہ سلمان بن عبدالعزیز نے ہدایت جاری کی ہے کہ ’بدھ کو تمام سرکاری اور نجی اداروں کے ملازمین کی چھٹی ہوگی۔‘ 

اس کے علاوہ تمام سکولوں، کالجوں اور یونیورسٹیوں کے طلبہ کے لیے بھی چھٹی کا اعلان کیا گیا ہے۔

دوسری جانب پاکستان کے وزیر اعظم شہباز شریف نے بھی ارجنٹائن کے خلاف فتح پر سعودی عرب کو مبارک باد دی ہے۔

شہباز شریف نے ایک ٹویٹ میں لکھا ہے کہ ’کیا خوب فٹ بال میچ تھا! سعودی عرب نے فیفا ورلڈ کپ میں ارجنٹائن کے خلاف سب سے بڑا اپ سیٹ کر کے تاریخ رقم کر دی ہے۔‘

انہوں نے مزید لکھا کہ ’سعودی ولی عہد محمد بن سلمان کو دل کی گہرائیوں سے مبارک باد۔ ہم اپنے سعودی بہن، بھائیوں کی اس خوشی میں شریک ہیں۔‘

میچ میں کیا ہوا

میچ کا آغاز تو ارجنٹائن نے پینلٹی پر گول کر کے کیا تاہم اس کے بعد جس انداز میں سعودی عرب نے میچ میں واپسی کی وہ قابل تعریف ہے۔

ارجنٹائن کی جانب سے پہلا گول لیونل میسی نے میچ کے 10ویں منٹ پر کر کے اپنی ٹیم کو برتری دلاوا دی تھی۔

اس کی یہ برتری 48ویں منٹ تک برقرار رہی۔ میچ کے اس لمحے پر سعودی عرب کی جانب سے صالح الشھری نے پہلا گول کر کے میچ ایک، ایک سے برابر کر دیا۔

سعودی عرب کے گول کیپر ارجنٹائن کے سامنے دیوار کی مانند کھڑے رہے (اے ایف پی)

مگر سعودی عرب یہیں نہیں رکا اور فوراً ہی دوسرا گول کر کے ارجنٹائن پر برتری حاصل کر لی۔

سعودی عرب کی طرف سے دوسرا گول میچ کے 53ویں منٹ پر سالم الدوسیری نے کیا۔

سعودی عرب نے ارجنٹائن کو ایک کے مقابلے میں دو گولز سے شکست دی ہے (سعودی پریس ایجنسی)

3333.jpg, by abdullah.farooqui

اوپر تلے دو گول کرنے کے بعد سعودی عرب کے کھلاڑیوں کا اعتماد آسمان چھوتا دکھائی دے رہا تھا اور انہوں نے ارجنٹائن کو مقابلہ جیتنا تو دور برابر کرنے کا بھی موقع نہیں دیا۔

میسی کی قیادت میں کھیلنے والی ارجنٹائن کی ٹیم دباؤ میں دکھائی دی جس کی سب سے بڑی وجہ سعودی عرب کا ڈیفینس اور خاص طور پر گول کیپر کی کارکردگی تھی۔

سعودی عرب کے گول کیپر دنیا کی نمبر تین ٹیم ارجنٹائن کی جانب سے کیے جانے والے حملوں کو مسلسل ناکام بناتے رہے۔

میچ شروع ہونے سے پہلے کسی کو بھی اس طرح کے نتیجے کی امید نہیں تھی، لیکن سعودی عرب اپنے پہلے ہی میچ میں اپ سیٹ کرنے کے بعد گروپ سی میں پہلے نمبر پر آ گیا ہے۔

سعودی عرب کو اپنے گروپ میں اب میکسیکو اور پولینڈ کے خلاف میچز کھیلنے ہیں۔ اس جیت کے بعد سعودی عرب کا اعتماد تو عروج پر ہوگا، وہیں میکسیکو اور پولینڈ کو یہ نتیجہ ذہن میں رکھتے ہوئے میدان میں اترنا ہوگا۔

ارجنٹائن اور سعودی عرب کے درمیان میچ اس وقت پاکستان کے سوشل میڈیا پر بھی ٹاپ ٹرینڈ بنا ہوا ہے۔

سوشل میڈیا پر قطر میں سٹیڈیم کے باہر سعودی عرب کی جیت کا جشن مناتے شائقین کی تصاویر اور ویڈیوز بھی شیئر کی جا رہی ہیں جبکہ دوسری لیونل میسی کو تنقید کا نشانہ بناتی میمز بھی دکھائی دے رہی ہیں۔