انڈیا کی جنوبی ریاست کرناٹک میں محکمہ جنگلات کے حکام نے پانچ شیروں کو زہر دے کر مارنے کے واقعے پر تین افراد کو گرفتار کر لیا ہے۔ یہ واقعہ ریاست میں ایک دن میں شیروں کی سب سے زیادہ ہلاکتوں کا سبب بنا ہے۔

پانچوں شیر ریاست کے مالے مہادیشورا ہلز وائلڈ لائف سینکچری (محفوظ جنگلی علاقہ) میں مردہ حالت میں پائے گئے۔ تمام شیروں، ایک مادہ شیرنی اور اس کے چار بچوں، کی لاشیں ایک دوسرے کے قریب پائی گئیں اور ضلع چامراجنگر کے اس جنگلی علاقے میں جمعرات کو ملی تھیں۔

جنگلی حیات کے حکام نے بتایا کہ ان کے قریب ایک مردہ گائے بھی ملی، بعد ازاں تحقیقات سے انکشاف ہوا کہ قریبی کوپا گاؤں کے دیہاتیوں نے اس گائے کی لاش میں مقامی طور پر دستیاب کھاد ملا کر زہر دیا تاکہ شیرنی اور اس کے بچوں کو مارا جا سکے۔

حکام نے جن تین دیہاتیوں کو گرفتار کیا ہے ان کی شناخت کوپا گاؤں کے کوناپّا، مڈراجا اور ناگراج کے طور پر کی گئی ہے۔ ان پر شیروں کو جان بوجھ کر زہر دینے کا الزام ہے۔

ایڈیشنل پرنسپل چیف کنزرویٹر آف فاریسٹس (ایڈمنسٹریشن اینڈ کوآرڈینیشن) کمار پشکر کے مطابق یہ ایک ’انتقامی قتل‘ کا واقعہ ہے، جس میں دیہاتیوں نے اپنے مویشیوں کا شکار کیے جانے کے جواب میں شیروں کو مار ڈالا۔

محکمہ جنگلات کے حکام نے تینوں افراد کو جنگلی حیات کے تحفظ کے قانون 1972 اور انڈین فاریسٹ ایکٹ 1969 کی دفعات کے تحت گرفتار کر کے مجسٹریٹ کے سامنے پیش کیا ہے۔

کرناٹک سٹیٹ بورڈ برائے جنگلی حیات کے سابق رکن اور کارکن جوزف ہوور کے مطابق، یہ واقعہ ایک ’مثالی اور منظم زہریلا حملہ‘ دکھائی دیتا ہے، جیسا کہ جنگلی حیات کے خلاف منظم جرائم میں ہوتا ہے۔

انہوں نے دی انڈپنڈنٹ کو بتایا کہ عام طور پر اس طریقے کا ہدف شیر ہوتے ہیں، اگرچہ تیندوے اور ہاتھی بھی اس کا شکار بن چکے ہیں۔

ایسے واقعات میں دیہاتی عموماً شیر کو نشانہ بنانے کے لیے زہریلی گائے یا بکری کی لاش استعمال کرتے ہیں، جو ان کے مویشیوں کا شکار کرتا ہے یا ان کے لیے خطرہ ہوتا ہے۔

انہوں نے کہا: ’یہ پانچ شیر اینٹی پوچنگ کیمپ اور مرکزی سڑک سے صرف 871 میٹر کے فاصلے پر زہر دے کر مارے گئے۔ یہ جنگلاتی حکام کی سنگین غفلت کی نشاندہی کرتا ہے۔‘

دی انڈپنڈنٹ نے ایم ایم ہلز کے ڈپٹی کنزرویٹر آف فاریسٹس، چکراپانی وائی سے بھی اس واقعے پر تبصرے کے لیے رابطہ کیا ہے۔

انڈین روزنامہ دی ہندو کی رپورٹ کے مطابق تحقیقات کے دوران، مویشیوں کے مالک کے پاس وہی کیڑے مار دوا پائی گئی جو عام طور پر میریگولڈ کی کاشت میں استعمال ہوتی تھی - جو شیروں کو مارنے کے لیے استعمال ہوتی تھی۔

رپورٹ میں کہا گیا کہ حکام نے جنگلات کے ویٹرنری ماہرین کی جانب سے جمع کیے گئے نمونے بنگلور اور میسور کی فرانزک لیبارٹریوں میں بھیج دیے ہیں تاکہ استعمال شدہ زہر کی تصدیق کی جا سکے، جب کہ ایک اور سیٹ میسور کے چڑیا گھر بھی تجزیے کے لیے بھیجا گیا ہے۔

جوزف ہوور نے دی انڈپینڈنٹ کو بتایا: ’شکار کیے گئے جانور کی لاش میں زہر ملا کر شیروں کو مارنا، کرناٹک میں شیروں کی غیر فطری ہلاکتوں کی سب سے بڑی وجہ بنتا جا رہا ہے۔ اس کے بعد پھندے لگانے سے اموات ہیں، جو اگرچہ ہرن یا جنگلی سور کو پکڑنے کے لیے استعمال ہوتے ہیں، لیکن اکثر تیندوے اور شیر بھی ان میں پھنس کر مارے جاتے ہیں۔‘

انہوں نے مزید کہا کہ ایسے زرعی زہریلے کیمیکل سستے اور آسانی سے دستیاب ہیں اور یہ شیر کے لیے فوری موت کا باعث بنتے ہیں۔

انہوں نے مزید بتایا کہ بعض دیہاتی شیروں کو گولی مار کر بھی ہلاک کرتے ہیں، جیسا کہ رواں سال فروری میں کرناٹک کے ضلع شیوموگا میں دیکھا گیا، جہاں ایک مردہ شیر کے پوسٹ مارٹم سے معلوم ہوا کہ اس کی گردن میں ایک چھرہ پیوست تھا۔

جوزف ہوور نے خبردار کیا کہ ایسے واقعات ظاہر کرتے ہیں کہ ریاست میں انسان اور جنگلی جانوروں کے درمیان تصادم کے واقعات میں اضافہ ہو رہا ہے۔

انہوں نے کہا: ’یہ نہایت تشویشناک صورت حال ہے، اور یہ تنازع اس قدر بڑھ چکا ہے کہ جنگلاتی حکام اس پر قابو پانے سے قاصر دکھائی دے رہے ہیں۔‘

انڈیا کی نیشنل ٹائیگر کنزرویشن اتھارٹی کے مطابق، ملک میں اس سال اب تک 103 شیر مارے جا چکے ہیں، اگرچہ شیروں کی مجموعی آبادی میں بتدریج اضافہ ہو رہا ہے۔