’حجاب کرنے والی خواتین بھی دوسروں کی طرح نارمل ہوتی ہیں‘

نجی ٹی وی چینل سما سے منسلک اینکر کرن ناز نے اپنے پروگرام کے دوران حجاب پہنا اور ساتھ میں کہا کہ ’یقیناً حجاب کرنے والی خواتین بھی اسی طرح نارمل ہوتی ہیں جتنی کہ حجاب نہ کرنے والی۔‘

پاکستان کے نجی ٹی وی چینل سما پر ایک خاتون میزبان کرن ناز برقع پہن کر حالات حاضرہ کے پروگرام کی میزبانی کر رہی ہیں (سکرین گریب سما ٹی وی)

سائنس دان اور تجزیہ کار ڈاکٹر پرویز ہود بھائی کا چند روز قبل حجاب سے متعلق دیا جانے والا بیان سوشل میڈیا پر زیرِ بحث ہے۔

بیان میں انہوں نے کہا تھا کہ ’میں نے 1973 میں قائداعظم یونیورسٹی میں پڑھانا شروع کیا تھا تب وہاں ایک لڑکی بھی بمشکل برقعے میں دکھائی دیتی تھی، اب تو حجاب، برقع عام ہو گیا ہے آپ کو شاذ ونادر ہی ’نارمل لڑکی‘ وہاں نظر آتی ہے۔

پرویز ہود بھائی نے مزید کہا کہ ’جب وہ کلاس میں بیٹھتی ہیں تو برقعے یا حجاب میں لپٹی ہوئی، تو ان کی کلاس میں شمولیت بہت گھٹ جاتی ہے۔‘

پرویز ہود بھائی کے اس بیان پر جہاں سوشل میڈیا پر تنقید ہوئی وہیں نجی ٹی وی چینل سما سے منسلک اینکر کرن ناز نے اپنے پروگرام کے دوران حجاب پہنا اور ساتھ میں کہا کہ ’یقیناً حجاب کرنے والی خواتین بھی اسی طرح نارمل ہوتی ہیں جتنی کہ حجاب نہ کرنے والی۔‘

’اسے پہننے کے بعد نہ میرے لفظوں میں کوئی کمی آئے گی نہ ہی سوچ میں کوئی تبدیلی۔ میں صرف چند ایسی مثالیں دے رہی ہوں، ایسی ہزاروں نہیں لاکھوں ہوں گی، کیپٹن پائلٹ شہناز لغاری: وہ پہلی خاتون جو باقاعدہ حجاب کرکے جہاز اڑاتی ہیں۔ پچھلے سال تاریخ رقم کرنے والی فیصل آباد میڈیکل یونیورسٹی سے گریجویٹ کرنے والی لڑکی جنہوں نے 18 گولڈ میڈل حاصل کیے وہ بھی حجاب کرتی تھیں۔ نصرت سحر عباسی جو اب حجاب کرتی ہیں اور سندھ کے عوام کے لیے آواز اٹھاتی ہیں۔ کسی طور بھی حجاب کرنے والی لڑکی حجاب نہ کرنے والی لڑکیوں سے کم نہیں ہے۔‘


اس کے بعد ٹوئٹر پر SamaaTv #HijabIsObligatory#  اور KiranNaz# ٹرینڈ کرنے لگا۔

کئی لوگ کرن ناز کی حمایت اور کچھ ان کے مخالفت میں دلائل دیتے نظر آئے۔

مزید پڑھ

اس سیکشن میں متعلقہ حوالہ پوائنٹس شامل ہیں (Related Nodes field)

ٹوئٹر صارف ڈاکٹر حسن کا کہنا تھا کہ ’کرن ناز آپ نے بہت اچھا کام کیا۔ حجاب کرنے والی خواتین کی حمایت کرنے کا بہت شکریہ۔‘

ملک رضا نامی صارف کا کہنا تھا: ’یہ دیکھ کر انتہائی خوشی ہوئی کہ ہر کوئی کرن ناز کے انتخاب کی تعریف کر رہا ہے۔ اصل بات یہ ہے کہ ان کے انتخاب پر کوئی حاوی نہیں ہوا۔‘

طاہر چوہدری نے فیس بک پر اپنے تاثرات کا اظہار کرتے ہوئے تحریر کیا کہ ’کرن ناز نے حجاب پہننے کے بعد بریک لیتے ہوئے بولا کہ بریک کے بعد نارمل طریقے سے پروگرام کا آغاز کریں گے، مطلب برقعے کے بغیر۔ کیا یہ کہہ کرخاتون نے بھی پروفیسر ہود بھائی کے بیان کی تائید نہیں کی؟‘

احسن علی نے ٹوئٹر پر پرویز ہود بھائی کی حمایت کرتے ہوئے لکھا کہ ’پرویز ہود بھائی اپ لمبی عمر جیئیں۔‘

 

زیادہ پڑھی جانے والی ٹرینڈنگ