ہربھجن اور عامر کے ایک دوسرے پر ’ذاتی حملے‘

پاکستان کی فتح کے بعد پاکستانی بولر محمد عامر نے ہربھجن سنگھ کو ٹوئٹر پر ٹیگ کرکے ایک ٹویٹ کی جس میں انہوں نے لکھا کہ ’وہ پوچھنا یہ تھا کہ ہربھجن پا جی نے ٹی وی تو نہیں توڑا اپنا، کوئی نہیں ہوتا ہے۔ آخر کار یہ کرکٹ ہے۔‘

پاکستان اور بھارت کے میچ پر ہونے والی ہلکی پھلکی نوک جھونک میں اس وقت تلخی آگئی جب پاکستانی فاسٹ بولر محمد عامر اور بھارتی سپنر ہربھجن سنگھ ایک دوسرے سے مذاق کرتے کرتے ذاتیات پر اتر آئے(تصاویر: اے ایف پی)

پاکستان اور بھارت کے درمیان کھیلے گئے میچ کو تین دن ہو چکے ہیں لیکن اس ہائی وولٹیج میچ کی شدت کو اب بھی محسوس کیا جا رہا ہے کیونکہ بحث اور تبصروں کا سلسلہ تھمنے کا نام ہی نہیں لے رہا۔

اس طرح کے میچوں میں ہمیشہ سے دیکھا گیا ہے کہ کھلاڑی میدان میں کھیلتے ہیں اور لوگ سوشل میڈیا پر بحث کرتے ہیں لیکن اس بار تو کھلاڑی ہی سوشل میڈیا پر بھی کھیل رہے ہیں اور عام صارفین تماشا کر رہے ہیں۔

پاکستان اور بھارت کے درمیان 24 اکتوبر کو کھیلے گئے میچ میں پاکستان نے پہلی مرتبہ کسی ورلڈ کپ میچ میں بھارت کو شکست دی تھی۔

اس میچ میں کامیابی پر جہاں پاکستانی کرکٹ ٹیم کو بشمول بھارت دنیا بھر سے داد و تحسین ملی وہیں پاکستانی اور بھارتی کرکٹرز نے خاص طور پر ایک دوسرے کو طنز و مزاح کا نشانہ بنایا اور مبارک بادیں بھی دیں۔

 تاہم، سوشل میڈیا پلیٹ فارمز کے ذریعے ہونے والی اس ہلکی پھلکی گفتگو میں اس وقت تلخی آ گئی جب پاکستانی فاسٹ بولر محمد عامر اور بھارتی سپنر ہربھجن سنگھ ایک دوسرے سے مذاق کرتے کرتے ذاتیات پر اتر آئے۔

ہوا کچھ یوں کہ پاکستان کی فتح کے بعد پاکستانی بولر محمد عامر نے ہربھجن سنگھ کو ٹوئٹر پر ٹیگ کرکے ایک ٹویٹ کی جس میں انہوں نے لکھا کہ ’وہ پوچھنا یہ تھا کہ ہربھجن پا جی نے ٹی وی تو نہیں توڑا اپنا، کوئی نہیں ہوتا ہے۔ آخر کار یہ ہے کرکٹ۔‘

اس کے جواب میں ہربھجن سنگھ نے 2010 کے ایشیا کپ کے پاکستان اور بھارت کے درمیان ہونے والے میچ کا ایک ویڈیو کلپ شیئر کیا جس میں انہوں نے عامر کی گیند پر چھکا لگا کر وننگ شارٹ کھیلا تھا۔

ساتھ ہی انہوں نے لکھا: ’اب تم بھی بولو گے کہ اس چھکے کی لینڈنگ تمہارے گھر کے ٹی وی پر تو نہیں ہوئی تھی۔ کوئی نہیں ہوتا ہے۔ جیسا کہ تم نے صحیح کہا آخر کار یہ ہے کرکٹ۔‘

ہربھجن کی اس ٹویٹ پر محمد عامر نے 2006 میں لاہور میں ہونے والے ایک ٹیسٹ میچ کا ایک ویڈیو کلپ شیئر کر دیا جس میں شاہد آفریدی نے ہربھجن سنگھ کے اوور میں مسلسل چار چھکے لگائے تھے۔

 

محمد عامر نے ہربھجن کو ٹیگ کرکے لکھا کہ ’میں آپ کی بولنگ دیکھنے میں مصروف تھا۔ جب لالا (شاہد آفریدی) نے آپ کو چار گیندوں پر چار چھکے مارے تھے، کرکٹ ہے لگ سکتا ہے لیکن ٹیسٹ کرکٹ میں۔۔۔ تھوڑا زیادہ ہو گیا تھا۔‘

یہاں تک تو معاملات ٹھیک چل رہے تھے مگر اس کے بعد ہربھجن سنگھ نے محمد عامر کو  ان کے ’ماضی‘ کا حوالہ دیتے ہوئے کہا کہ ’لارڈز میں نو بال کیسے ہو گئی تھی؟ کتنے لیے کس نے دیے؟ ٹیسٹ کرکٹ ہے نو بال کیسے ہو سکتی ہے؟ آپ کو اور آپ کے حامیوں کو اس خوبصورت گیم کو آلودہ کرتے ہوئے شرم آنی چاہیے۔‘

محمد عامر 2010 میں سپاٹ فکسنگ سکینڈل میں ملوث تھے۔ لارڈز کے میدان میں انگلینڈ کے خلاف ٹیسٹ میچ کھیلتے ہوئے انہوں نے ’نو بال‘ کروائی تھی۔ بعد ازاں جس کا اعتراف انہوں نے برطانوی عدالت میں کیا تھا۔ بھاری جرمانہ ادا کرکے اور مقررہ مدت کی پابندی کاٹنے کے بعد وہ واپس کرکٹ کے میدان میں آئے تھے۔

اس کے بعد بھی ہربھجن سنگھ نے محمد عامر کی ’نو بال‘ کرواتے ہوئے تصاویر شیئر کیں جس میں انہوں نے محمد عامر کو مخاطب کرکے تحریر کیا کہ ’آپ جیسے لوگ بس پیسہ پیسہ پیسہ۔۔۔ نہ عزت نہ کچھ اور صرف پیسہ۔۔۔ بتاؤ گے نہیں اپنے ملک والوں اور سپورٹرز کو کہ کتنے پیسے ملے تھے۔ دفعہ ہو جاؤ، مجھے آپ جیسے لوگوں سے بات کرتے ہوئے نفرت محسوس ہوتی ہے کیونکہ انہوں نے اس گیم کی لاج نہیں رکھی اور لوگوں کو بے وقوف بنایا۔‘

اس پر بھی ہربھجن سنگھ کا غصہ ٹھنڈا نہیں ہوا اور انہوں نے ایک بار پھر وہی ویڈیو شیئر کی جس میں انہوں نے محمد عامر کی گیند پر چھکا مارا تھا۔

ساتھ میں انہوں نے لکھا: ’فکسر کو سکسر۔۔۔ گراؤنڈ سے باہر، محمد عامر دفع ہو جاؤ۔‘

جواباً محمد عامر نے ٹویٹ کی کہ ’بڑے ہی ڈھیٹ ہو، میرے ماضی کہ بارے میں بات کرکے آپ یہ حقیقت جُھٹلا نہیں سکتے کہ تین دن پہلے آپ کو منہ کی کھانی پڑی۔ اور اپنے غیرقانونی بولنگ ایکشن کے بارے میں کیا خیال ہے؟ اب ہمیں ورلڈ کپ جیتتا دیکھو، واک اوور تو نہیں ملا جاؤ پارک میں واک کرو، بہتر محسوس کرو گے۔

دونوں ممالک کے ورلڈ کلاس کرکٹرز کے درمیان ہونے والے اس ’آن لائن جھگڑے‘ نے کرکٹ شائقین کو بھی تقسیم کر دیا ہے اور دونوں کھلاڑیوں کے مداح اپنے اپنے پسندیدہ کھلاڑیوں کے حق میں سوشل میڈیا پر پوسٹس شیئر کر رہے ہیں۔

زیادہ پڑھی جانے والی ٹرینڈنگ