پاکستان فوج کے محکمہ تعلقات عامہ (آئی ایس پی آر) کے مطابق صوبہ خیبر پختونخوا کے ضلع بنوں میں خود کش دھماکے کے نتیجے میں دو افراد جان سے گئے جبکہ دس دوسرے زخمی ہوئے ہیں۔

آئی ایس پی آر کی جانب سے پیر کو جاری ہونے والے ایک بیان کے مطابق گذشتہ شب ضلع بنوں کے علاقے بکہ خیل میں ایک موٹر سائیکل سوار نے سکیورٹی فورسز کے قافلے میں گھس کر خود کو دھماکے سے اڑا دیا۔ 

’خود کش حملے کے نتیجے میں دو عام شہری جان سے گئے، جب کہ سات دوسرے شہری اور تین فوجی اہلکار زخمی ہوئے۔‘

آئی ایس پی آر کے بیان کے مطابق خود کش حملہ آور حافظ گل بہادر گروپ سے وابستہ تھا اور بعد ازاں اس کی شناخت ایک افغان شہری کے طور ہوئی ہے۔

بیان میں کہا گیا: ’علاقے میں پائے جانے والے دیگر دہشت گردوں کو ختم کرنے کے لیے سینی ٹائزیشن آپریشن کیا جا رہا ہے۔‘