پاکستان کے وزیر برائے اوورسیز پاکستانیز چوہدری سالک حسین نے اتوار کو کہا کہ اسلام آباد کویت کے ساتھ مجوزہ لیبر تعاون معاہدے پر دستخط کے لیے تیار ہے، جو ممکنہ طور پر کویتی ولی عہد کے آئندہ دورۂ پاکستان کے دوران حتمی شکل پا سکتا ہے۔

سوشل میڈیا پلیٹ فارم ایکس پر ایک پیغام میں وفاقی وزیر برائے اوورسیز پاکستانی چوہدری سالک حسین نے بتایا کہ کویت کی پبلک اتھارٹی فار مین پاور (PAM) کی ڈائریکٹر جنرل رباب عبداللہ العثیمی سے ملاقات کے دوران دونوں ممالک کے درمیان برادرانہ تعلقات اور لیبر تعاون پر تفصیلی تبادلۂ خیال کیا گیا۔

یہ گفتگو ایسے وقت میں ہوئی جب پاکستان اندرونی معاشی دباؤ کے تناظر میں اپنے کارکنوں کے لیے بیرونِ ملک روزگار کے مواقع بڑھانے کی کوشش کر رہا ہے، جبکہ خلیجی ممالک انفراسٹرکچر اور سروسز کے شعبوں میں اب بھی بڑی حد تک غیر ملکی افرادی قوت پر انحصار کرتے ہیں۔

بیرونِ ملک ملازمتیں پاکستان کے لیے ترسیلاتِ زر کا ایک اہم ذریعہ ہیں، جو زرمبادلہ کے ذخائر اور گھریلو آمدن کو سہارا دینے میں کلیدی کردار ادا کرتی ہیں۔

چوہدری سالک حسین نے ایکس پر جاری بیان میں مزید کہا: ’پاکستان کویت کے ساتھ اپنے دیرینہ اور مضبوط تعلقات کو نہایت احترام کی نظر سے دیکھتا ہے اور لیبر سے متعلق مجوزہ مفاہمتی یادداشت (MoU) پر دستخط کے لیے تیار ہے، جسے کویت کے ولی عہد کے دورۂ پاکستان کے دوران حتمی شکل دی جا سکتی ہے۔‘

تاہم، دورے کی حتمی تاریخ کا ابھی اعلان نہیں کیا گیا۔

ملاقات میں حالیہ اعلیٰ سطحی روابط کے نتائج اور لیبر تعاون کے فروغ کے حوالے سے کویتی حکام کے مثبت ردِعمل کا جائزہ لیا گیا۔ وزیر نے پاکستان کو کویت کی پبلک اتھارٹی فار مین پاور کے ڈیجیٹل پورٹل تک رسائی دینے کی درخواست بھی کی، جو غیرملکی کارکنوں کی بھرتی، ورک پرمٹس اور آجران کی رجسٹریشن کے لیے سرکاری نظام کے طور پر استعمال ہوتا ہے۔

پی اے ایم پورٹل تک رسائی سے پاکستانی حکام اور لائسنس یافتہ اوورسیز ایمپلائمنٹ پروموٹرز کو کویت کے لیبر سسٹم سے براہِ راست رابطہ قائم کرنے میں مدد ملے گی، جس سے بھرتی کے عمل میں آسانی، تاخیر میں کمی اور غیر قانونی یا غیر رسمی بھرتیوں کی روک تھام ممکن ہو سکے گی۔

چوہدری سالک حسین نے کہا کہ ماضی میں پاکستانی کارکنوں نے کویت کی ترقی میں اہم کردار ادا کیا ہے اور وہ مستقبل میں بھی بالخصوص انفراسٹرکچر اور دیگر اہم شعبوں میں ضروری افرادی قوت کی ضروریات پوری کرنے کی صلاحیت رکھتے ہیں۔

بیان کے مطابق، دونوں فریقین نے مضبوط دوطرفہ تعلقات کے مطابق لیبر تعاون کو آگے بڑھانے اور باقاعدہ مشاورت و رابطوں کے نظام کو ادارہ جاتی شکل دینے پر اتفاق کیا۔

پاکستان خلیجی شراکت داروں کے ساتھ لیبر فریم ورک کو باضابطہ بنانے کی کوشش کر رہا ہے تاکہ بیرونِ ملک ہنر مند اور نیم ہنر مند روزگار کے مواقع میں توسیع ہو، کارکنوں کے تحفظ کو مضبوط بنایا جا سکے اور اوورسیز بھرتی کے عمل میں شفافیت بہتر ہو، جبکہ ترسیلاتِ زر کے تسلسل کو مستحکم اور اندرونی بے روزگاری کے دباؤ کو کم کیا جا سکے۔