پاکستان میں سماجی رابطوں کی ویب سائٹ ٹوئٹر پر آج آلو والی بریانی کا ہیش ٹیگ مسلسل ٹرینڈ کر رہا ہے۔ کوئی آلو والی بریانی کی تعریف میں مگن ہے تو کسی کا کہنا ہے کہ بریانی تو آلو کے بغیر ہی اچھی لگتی ہے۔

اس ٹرینڈ کی وجہ ہے سابق وزیر اعظم عمران خان کا وہ انٹرویو جس میں انہوں نے آلو والی بریانی کو اپنی فیورٹ بریانی قرار دیا۔

 گذشتہ روز ٹوئٹر سپیس میں سوالات کے جواب دیتے ہوئے جب مشہور امریکی کامیڈین جیریمی میکلیلن نے عمران خان سے سوال کیا کہ آپ کو بریانی کیسی پسند ہے آلو کے ساتھ یا اس کے بغیر؟

جس پر عمران خان نے کہا کہ 40 سال قبل انہیں ایسے کھانوں کا شوق تھا، جس میں بریانی بھی تھی اور وہ بھی آلو والی۔ 

 ہمیشہ سے کراچی اور لاہور والوں کے درمیان میں بریانی کا آلو زیر بحث رہا ہے کہ آخر بریانی کو کیسے کھایا جائے۔

 اس لیے عمران خان کی پسند کے بعد کراچی والوں کو اپنی بریانی کے دفاع میں ایک مضبوط ووٹ مل گیا ہے۔ 

جیسے ہی یہ بیان سامنے آیا ٹوئٹر پر اردو اور انگریزی دونوں میں آلو والی بریانی ٹاپ ٹرینڈ کرنے لگی اور صارفین کی جانب سے کئی دلچسپ تبصرے سامنے آئے۔ 

مہر ندیم نے اپنی ٹوئٹ میں آلوؤں کے مہنگے ہونے کا خطرہ ظاہر کرتے ہوئے لکھا کہ ’خان صاحب نہ کرو، پہلے مرغی 600 روپے کلو ہے، آلو 100 روپے کلو مل رہا ہے۔ اب آپ نے آلو مزید مہنگے کرا دینے ہیں کیونکہ اب ڈیمانڈ جو بڑھ جانی ہے۔‘

مشکوات خان نے لکھا کہ ’اگر لوگ مجھے دعوت کے لیے مدعو کریں تو میں کال کر کے پوچھوں گا کہ بریانی میں آلو ہے یا نہیں؟ اگر وہ کہتے ہیں نہیں تو میں نہیں جاؤں گا۔‘

مہوش علی نے تو اپنے پورے ہفتے کے کھانے کا ٹائم ٹیبل دے دیا۔ جس میں ہفتے سے لے کر اگلے جمعے تک صرف آلو کی بریانی ہی چلے گی۔ 

اور کسی نے بریانی میں آلو کو ’گیم چینجر‘ کہا تو کسی نے لکھا کہ ’آلو کے بغیر بریانی، بریانی ہی نہیں۔‘

ایک ساتھ دو ٹرینڈ چلتے دیکھ عائشہ نے کہا کہ ’اب ہر سال 17 جولائی کو بریانی ڈے منایا جائے گا۔‘ 

چوہدری عثمان نے انڈین اداکار نواز الدین صدیقی کی فلم کی ایک تصویر کو آلو سے لنک کرتے ہوئے لکھا کہ اس وقت آلو ایسا ہو گا۔ 

تصویر میں لکھا تھا کہ ’میں چاند پر ہوں۔‘