پاکستان کے وزیر اعظم شہباز شریف پیر کو مصر پہنچے ہیں جہاں وہ شرم الشیخ امن کانفرنس میں غزہ امن معاہدے پر دستخط کی تقریب میں شریک ہوں گے، انہوں نے مصر پہنچنے پر کہا کہ صدر ٹرمپ کی خصوصی توجہ اور جستجو کی بدولت ہی غزہ میں جاری  قتل و غارت کو روکنا ممکن ہوا۔ 

مصر پہنچنے کے بعد ایکس پر جاری بیان میں وزیر اعظم شہباز شریف نے کہا: ’آج صبح شرم الشیخ پہنچا ہوں تاکہ تاریخی غزہ امن منصوبے پر دستخط کی تقریب میں شرکت کر سکوں جو مشرق وسطیٰ میں پائیدار امن کی سمت ایک نہایت اہم قدم ہے۔‘

انہوں نے مزید لکھا: ’اپنے شریک میزبانوں، صدر السیسی اور صدر ٹرمپ کا شکر گزار ہوں۔ صدر ٹرمپ کی شاندار قیادت اور غیر متزلزل عزم کے بغیر ہم یہ لمحہ کبھی نہ دیکھ پاتے۔ امن کے حصول کے لیے ان کی یکسو جدوجہد ہی نے اس بلاوجہ خونریزی اور تباہی کا خاتمہ ممکن بنایا۔‘

شہباز شریف کا مزید کہنا تھا: ’آج کی یہ تقریب نسل کشی کے ایک سیاہ باب کے اختتام کی علامت ہے، ایک ایسا باب جسے عالمی برادری کو یقینی بنانا ہوگا کہ دنیا میں کہیں دوبارہ نہ دہرایا جائے۔ بہادر اور ثابت قدم فلسطینی عوام ایک آزاد فلسطین میں جینے کے حقدار ہیں، جو 1967 سے پہلے کی سرحدوں پر مشتمل ہو اور جس کا دارالحکومت القدس الشریف ہو۔‘

وزیراعظم ہاؤس سے پیر کو جاری بیان میں کہا گیا کہ شہباز شریف امریکی صدر ڈونلڈ ٹرمپ اور مصری صدر عبدالفتاح السیسی کی خصوصی دعوت پر شرم الشیخ کا دورہ کر رہے ہیں۔

وزیراعظم ہاؤس سے جاری بیان میں کہا گیا کہ ’وزیراعظم شرم الشیخ میں منعقدہ غزہ میں جنگ بندی کے لیے شرم الشیخ امن سربراہی اجلاس میں شرکت کریں گے۔

نائب وزیراعظم و وزیرخارجہ محمد اسحاق ڈار اور وزیر اطلاعات و نشریات عطا اللہ تارڑ وزیر اعظم کے ہمراہ وفد میں شریک ہیں.

بیان میں کہا گیا کہ ’وزیراعظم پاکستان، امریکی صدر ڈونلڈ ٹرمپ، مصری صدر عبدالفتاح السیسی، امیر قطر شیخ تمیم بن حمد آل ثانی,  ترکیہ کے صدر رجب طیب ایردوان اور دیگر عالمی رہنماؤں کی موجودگی میں غزہ امن معاہدے پر دستخط کی تقریب میں خصوصی شرکت کریں گے۔‘

شرم الشیخ میں ہونے والا امن سربراہی اجلاس، صدر ڈونلڈ ٹرمپ، وزیراعظم شہباز شریف اور عرب اسلامی رہنماؤں کی اقوام متحدہ جنرل اسمبلی کے موقع پر غزہ میں جنگ بندی  کے لیے خصوصی کوششوں کا نتیجہ ہے۔

مشترکہ اعلامیے کے ذریعے وزیرِ اعظم سمیت ان ممالک کے سربراہان نے امریکی صدر ڈونلڈ ٹرمپ کے غزہ میں جنگ بندی، پائیدار امن اور خطے کی ترقی کے حوالے سے منصوبے کا خیرمقدم کیا تھا۔