|
ایران کے خلاف امریکہ اور اسرائیل کی مشترکہ جنگ نویں روز بھی جاری ہے۔ امریکہ نے اسے ’آپریشن ایپک فیوری‘ جبکہ ایران نے جوابی کارروائی کو ’وعدہ صادق 4‘ کا نام دیا ہے۔ |
نویں دن کے احوال کے لیے یہاں کلک کریں
دن 10 بج کر 30 منٹ: پاکستان سٹاک مارکیٹ میں شدید مندی، 9,780 پوائنٹس کی کمی کے بعد ٹریڈنگ عارضی طور پر معطل
پاکستان سٹاک ایکسچینج (پی ایس ایکس) میں پیر کی صبح شدید مندی دیکھنے میں آئی، جس کے نتیجے میں کے ایس سی 100 انڈیکس تقریباً 9,780.15 پوائنٹس گرنے کے بعد عارضی طور پر معطل کر دیا گیا۔
پی ایس ایکس کی جانب سے جاری نوٹس کے مطابق کے ایس سی 30 انڈیکس اپنے پچھلے تجارتی دن کے اختتام سے پانچ فیصد گرنے پر مارکیٹ ہالٹ کی کارروائی کی گئی اور اس کے بعد تمام ایکویٹی بیسڈ مارکیٹس معطل کر دی گئیں۔
ماہرین کا کہنا ہے کہ یہ شدید فروخت عالمی سطح پر تیل کی قیمتوں میں اضافے اور بڑھتی ہوئی ایران جنگ کے باعث سرمایہ کاروں کے اعتماد پر منفی اثر ڈال رہی ہے۔
ٹریڈنگ کی عارضی معطلی کے وقت 100 انڈیکس 147,715.95 پوائنٹس پر تھا۔
دن 10 بج کر 15 منٹ: ایران جنگ کے اثرات: تیل کی قیمتیں 30 فیصد بڑھ گئیں
ایشیائی سٹاک مارکیٹس پیر کو شدید مندی کا شکار ہو کر گر گئیں کیونکہ امریکہ اور اسرائیل کی ایران کے خلاف جاری جنگ کے باعث مشرق وسطیٰ سے تیل کی فراہمی پر خدشات پیدا ہو گئے اور تیل کی قیمتیں بھی 30 فیصد تک بڑھ گئیں۔
اے ایف پی کے مطابق سرمایہ کار، جو پہلے ہی ٹیکنالوجی کمپنیوں کی بڑھتی ہوئی قیمتوں اور مصنوعی ذہانت کے شعبوں میں بڑے پیمانے پر اخراجات کے حوالے سے پریشان تھے، نے مارکیٹ سے پیچھے ہٹنا شروع کر دیا کیونکہ خام تیل کی قیمتیں روس کے یوکرین پر حملے کے بعد اب اپنی بلند ترین سطح پر پہنچ گئی ہیں۔
امریکی صدر ڈونلڈ ٹرمپ کا یہ اصرار کہ صرف ایران کی ’غیر مشروط ہتھیار ڈالنے‘ سے ہی جنگ ختم ہو سکتی ہے، جس کے بعد سرمایہ کاروں میں مزید خدشات پیدا ہوئے کہ مشرق وسطیٰ کا تنازعہ طویل عرصے تک جاری رہ سکتا ہے۔
ایران کی جانب سے تیل پیدا کرنے والے خلیجی ممالک پر جوابی حملوں کے بعد گذشتہ ہفتے کی طرح دونوں اہم آئل بینچ مارک دوبارہ بلند ہو گئے۔
امریکی تیل کی نمایاں مارکیٹ ڈبلیو ٹی آئی کی قیمت 30 فیصد بڑھ کر 118.88 ڈالر فی بیرل تک پہنچ گئی جبکہ برینٹ کی قیمت 28 فیصد بڑھ کر 118.73 ڈالر فی بیرل ہو گئی۔
یہ ایران جنگ کے آغازکے بعد ڈبلیو ٹی آئی کی قیمت 75 فیصد اور برینٹ کی قیمت 60 فیصد سے زیادہ اضافہ ہے۔
جنوبی عراق اور شمالی خود مختار کردستان کے علاقوں میں امریکی تیل کی تنصیبات پر حملے کی اطلاعات ہیں، جس کے باعث ایک امریکی آئل فیلڈ بند ہو گیا جبکہ متحدہ عرب امارات اور کویت نے بھی اپنی پیداوار کم کرنا شروع کر دی۔
یہ صورت حال آبنائے ہرمز میں سمندری آمد و رفت کے بند ہونے کے بعد سامنے آئی ہے جہاں سے دنیا کے خام تیل اور گیس کا پانچواں حصہ گزرتا ہے۔
صبح 9 بجے: سعودی عرب اور یو اے ای کا متعدد ڈرون گرانے کا دعویٰ
سعودی عرب اور متحدہ عرب امارات نے پیر کو اپنی اپنی فضائی حدود میں کئی ڈرون گرانے کرنے کا دعویٰ کیا ہے۔
سعودی عرب نے کہا ہے کہ اس کے فضائی دفاعی نظام نے روبع الخالی کے صحرا کے اوپر شیبہ آئل فیلڈ کی جانب آنے والے چار ڈرونز کو مار گرایا ہے۔
دوسری جانب متحدہ عرب امارات کی وزارت دفاع نے بھی کہا ہے کہ اس کے فضائی دفاعی نظام مبینہ طور پر ایران کی جانب سے آنے والے میزائلوں اور ڈرونز کے خطرات کا مقابلہ کر رہے ہیں۔
امارات وزارت کے مطابق ’ملک میں سنی جانے والی دھماکوں کی آوازیں دراصل فضائی دفاعی نظام کی جانب سے ان حملوں کو روکنے کے دوران ہونے والی کارروائی کا نتیجہ ہیں۔‘
صبح 8 بج کر 10 منٹ: حملے جاری رہے تو سب سے زیادہ نقصان خود ایران کو ہو گا: سعودی عرب
سعودی عرب نے پیر کو خبردار کیا ہے کہ اگر ایران کے حملے جاری رہے تو اس کے نتجے میں سب سے زیادہ نقصان خود تہران کو ہوگا۔
سعودی وزارت خارجہ نے ایران کی جانب سے مملکت اور دیگر خلیجی، عرب اور اسلامی ممالک پر کیے گئے حملوں کی سخت مذمت کرتے ہوئے انہیں ’گھناؤنا‘ قرار دیا۔
سعودی عرب نے امریکہ اور اسرائیل کی ایران کے ساتھ جاری جنگ میں اپنی پہلی اموات بھی رپورٹ کی ہیں۔
سعودی حکام کے مطابق گولہ رہائشی علاقے میں گرنے سے ایک انڈین اور ایک بنگلہ دیشی شہری جان سے گئے جب کہ 12 دیگر بنگلہ دیشی زخمی بھی ہوئے۔
یہ اعلان اتوار کی شام اس وقت سامنے آیا جب نو روزہ جنگ کے دوران خلیجی اور دیگر ممالک پر ایران کے سینکڑوں میزائل اور ڈرون حملوں کے بعد خطے میں غصہ بڑھ رہا ہے۔
سعودی وزارت کے پیر کو جاری بیان میں کہا گیا کہ شہری تنصیبات، بشمول ہوائی اڈوں اور تیل کی تنصیبات کو نشانہ بنانا سلامتی اور استحکام کو خطرے میں ڈالنے کے مترادف ہے اور یہ بین الاقوامی چارٹرز اور عالمی قانون کی کھلی خلاف ورزی ہے۔
بیان میں ایران کے اس دعوے کو بھی مسترد کر دیا گیا کہ سعودی عرب نے جنگ کے لیے اپنے علاقے سے جنگی طیاروں اور ایندھن فراہم کرنے والے طیاروں کو آپریٹ کرنے کی اجازت دی۔
وزارت کے مطابق یہ طیارے دراصل سعودی عرب اور خلیجی تعاون کونسل (جی سی سی) کی فضائی حدود کو ایرانی میزائلوں اور ڈرونز سے محفوظ رکھنے کے لیے فضائی گشت کر رہے ہیں۔
سعودی وزارت خارجہ نے مزید کہا کہ ایران کے مسلسل حملے کشیدگی میں مزید اضافے کا باعث بنیں گے اور اس کے موجودہ اور مستقبل کے تعلقات پر گہرے اثرات مرتب ہوں گے۔
بیان میں کہا گیا کہ ایران کے موجودہ اقدامات نہ تو دانشمندی کی عکاسی کرتے ہیں اور نہ ہی کشیدگی میں اضافے سے بچنے کے مفاد میں ہیں، اور ایسی صورت حال میں سب سے زیادہ نقصان خود ایران کو ہوگا۔
صبح 8 بج کر 10 منٹ: پاکستان میں امریکی سفارت خانے کی ویزا طے شدہ اپائنٹمنٹس عارضی طور پر منسوخ
امریکی سفارت خانے نے اعلان کیا ہے کہ نو سے 13 مارچ تک امیگرنٹ اور نان امیگرنٹ ویزوں کی تمام طے شدہ اپائنٹمنٹس منسوخ کر دی گئی ہیں۔
یہ پیش رفت ایسے وقت سامنے آئی ہے جب 28 فروری کو امریکہ اور اسرائیل کی جانب سے ایران پر حملے اور سپریم لیڈر آیت اللہ خامنہ ای کے قتل کے بعد کراچی میں امریکی قونصل خانے کے باہر ہنگامہ آرائی اور احتجاج کے دوران کئی افراد جانوں سے گئے اور درجنوں زخمی ہو گئے تھے۔
سفارت خانے کی جانب سے جاری بیان کے مطابق ویزا درخواست گزاروں کو نئی تاریخ کے تعین سے متعلق ہدایات ای میل کے ذریعے فراہم کی جائیں گی۔
بیان میں مزید کہا گیا کہ کراچی اور لاہور میں امریکی قونصل خانوں میں تمام قونصلر خدمات تاحکمِ ثانی معطل رہیں گی۔
تاہم بیان میں بتایا گیا کہ اسلام آباد میں امریکی سفارت خانہ امریکی شہریوں کو معمول اور ہنگامی قونصلر خدمات فراہم کرتا رہے گا۔
صبح 7 بج کر 45 منٹ: سعودی عرب میں موجود پاکستانی نظم و ضبط برقرار رکھیں: پاکستانی سفیر
سعودی عرب میں پاکستان کے سفیر احمد فاروق نے ہم وطنوں سے اپیل کی ہے کہ وہ موجودہ صورتحال میں پرسکون رہیں، مقامی قوانین کا احترام کریں اور غیر مصدقہ اطلاعات پھیلانے سے گریز کریں۔
ویڈیو پیغام میں انہوں نے سعودی عرب میں مقیم 28 لاکھ سے زائد پاکستانیوں سے کہا کہ کسی بھی صورتحال میں صرف سعودی حکومت کے مستند ذرائع پر انحصار کریں۔
سفیر نے کہا کہ سفارت خانہ پاکستان شہریوں کی رہنمائی اور مدد کے لیے ہمہ وقت متحرک ہے اور ہنگامی نمبرز کے ذریعے بھی معاونت فراہم کی جا رہی ہے۔ انہوں نے بتایا کہ پروازوں میں تعطل کے باعث پیش آنے والی مشکلات کے پیش نظر ایئرپورٹس اور سرحدی مقامات پر سفارتی ٹیمیں تعینات ہیں جو پاکستانیوں کو رہائش، خوراک، ادویات اور پروازوں کی دوبارہ بکنگ میں مدد فراہم کر رہی ہیں۔
مزید پڑھ
اس سیکشن میں متعلقہ حوالہ پوائنٹس شامل ہیں (Related Nodes field)
سعودی عرب نے امریکہ اور اسرائیل کی ایران کے ساتھ جاری جنگ میں اپنی پہلی اموات رپورٹ کی ہیں۔
سعودی حکام کے مطابق گولہ رہائشی علاقے میں گرنے سے ایک انڈین اور ایک بنگلہ دیشی شہری جان سے چلے گئے۔
بیان کے مطابق 12 دیگر بنگلہ دیشی زخمی بھی ہوئے۔
یہ اعلان اتوار کی شام اس وقت سامنے آیا جب نو روزہ جنگ کے دوران خلیجی اور دیگر ممالک پر ایران کے سینکڑوں میزائل اور ڈرون حملوں کے بعد خطے میں غصہ بڑھ رہا ہے۔
صبح ساڑھے چار بجے: آیت اللہ مجتبیٰ خامنہ ای ملک کے نئے سپریم لیڈر مقرر
اے ایف پی کے مطابق امریکی-اسرائیلی حملوں میں بزرگ آیت اللہ علی خامنہ ای کے مارے جانے کے بعد علما کی حکومت کی ماہرین کی اسمبلی نے اپنا اگلا رہنما منتخب کرنے کے لیے اجلاس منعقد کیا۔
ایک طویل بیان میں، اسمبلی نے کہا: 'محتاط اور وسیع مطالعہ کے بعد... آج کے غیر معمولی اجلاس میں، آیت اللہ سید مجتبیٰ حسینی خامنہ ای (اللہ انہیں حفاظت میں رکھے) کو اسلامی جمہوریہ ایران کے مقدس نظام کے تیسرے رہنما کے طور پر مقرر اور متعارف کرایا جاتا ہے، جو ماہرین کی اسمبلی کے معزز نمائندوں کی فیصلہ کن رائے پر مبنی ہے۔‘
آیت اللہ مجتبیٰ خامنہ ای نے، جو 56 سال کے ہیں، کہا: 'انہیں اسلامی جمہوریہ ایران کے مقدس نظام کے تیسرے رہنما کے طور پر مقرر اور متعارف کرایا گیا ہے، جو کہ ماہرین کی اسمبلی کے معزز نمائندوں کی فیصلہ کن رائے پر مبنی ہے۔‘
مجتبیٰ خامنہ ای 8 ستمبر 1969 کو مشرقی ایران کے شہر مشہد میں پیدا ہوئے، اور وہ مرحوم سپریم لیڈر کے چھ بچوں میں سے ایک ہیں۔
علما کی اسمبلی نے بیان میں کہا کہ 'نئے رہنما کے انتخاب میں ایک لمحے کی بھی ہچکچاہٹ نہیں کی گئی، حالانکہ یہ سب کچھ مجرم امریکہ اور بدعنوان صیہونی رجیم کی وحشیانہ جارحیت کے باوجود ہوا۔‘
ایران کے انقلابی گارڈز نے اتوار کو ملک کے نئے سپریم لیڈر مجتبیٰ خامنہ ای کے ساتھ وفاداری کا عہد کیا ہے۔
جنگ کے پہلے دن کا احوال — دوسرے دن کا احوال — تیسرے دن کا احوال — چوتھے دن کا احوال — پانچویں دن کا احوال — چھٹے دن کا احوال — ساتویں دن کا احوال — آٹھویں دن کا احوال
