دوحہ میں پاکستانی صدرِ مملکت آصف علی زرداری سے ملاقات کے دوران امیرِ قطر شیخ تمیم بن حمد الثانی نے پاکستان اور سعودی عرب کے درمیان ہونے والے دفاعی معاہدے کو خوش آئند اور بروقت قرار دیا۔

ایوان صدر سے جاری بیان کے مطابق انہوں نے کہا کہ پاکستان ایک منفرد حیثیت رکھتا ہے جو چین، مغربی دنیا اور خلیجی ممالک سے بیک وقت تعلقات رکھتا ہے۔ انہوں نے اس توازن کو خطے کے استحکام کے لیے مثبت قرار دیا۔

آج ہونے والی ملاقات میں پاکستان، قطر اور خطے کے اہم امور پر تفصیلی تبادلۂ خیال کیا گیا۔

ملاقات کے دوران امیرِ قطر نے پاکستان اور اس کی کامیابیوں پر فخر کا اظہار کرتے ہوئے کہا کہ قطر پاکستان کو ایک اہم اور قابلِ اعتماد شراکت دار سمجھتا ہے۔ انہوں نے پاکستانی کمیونٹی کے کردار کی تعریف کرتے ہوئے ان کی تعداد میں خاطر خواہ اضافہ کرنے کی خواہش بھی ظاہر کی۔

صدرِ مملکت آصف علی زرداری نے حکومتِ پاکستان اور عوام کی جانب سے امیرِ قطر کے لیے نیک تمناؤں کا پیغام پہنچایا اور دو طرفہ تعلقات کو مزید وسعت دینے کے عزم کا اظہار کیا۔ انہوں نے قطر کی تیز رفتار ترقی اور امیرِ قطر کی بصیرت افروز قیادت کو سراہا۔

صدرِ مملکت نے ملاقات میں دفاع، دفاعی پیداوار، زراعت اور غذائی تحفظ کے شعبوں میں تعاون بڑھانے کی تجویز دی، جس پر امیرِ قطر نے رضامندی ظاہر کرتے ہوئے متعلقہ حکام کو فوری روابط قائم کرنے کی ہدایت دی۔

صدر زرداری نے قطر کی جانب سے دوحہ مذاکرات کی میزبانی اور افغانستان سے متعلق تعمیری کردار کو سراہا۔ اس موقع پر امیرِ قطر نے امید ظاہر کی کہ پاکستان اور افغانستان باہمی مسائل حل کرکے حالیہ چیلنجز کو پسِ پشت ڈال دیں گے۔

ملاقات کے اختتام پر امیرِ قطر نے صدرِ پاکستان کی دعوت قبول کرتے ہوئے آئندہ سال کے اوائل میں پاکستان کے دورے کا اعلان کیا۔ اس موقع پر بلاول بھٹو زرداری اور پاکستان کے سفیر بھی موجود تھے۔